ތިލަފުށި ފޭސް 2ގެ ފުރަތަމަ ބައި ހިއްކައި ނިންމައި، އިތުރު ބައި ހިއްކަން ފަށައިފި
31 އޮކްޓޯބަރު 2023 | އަންގާރަ 17:14އޭރިއާ އޭ ހިއްކުމުގެ މަސައްކަތް އަންނަ އަހަރު ފެބްރުއަރީ މަހުގެ ތެރޭގައި ނިންމާލެވޭނެ
ތިލަފުށި ފޭސް 2
ތިލަފުށީ ފޭސް 2 ހިއްކުމަށް ކަނޑައެޅިފައިވާ އޭރިއާތަކުގެ ތެރެއިން ފުރަމަތަމަ އޭރިއާ (އޭރިއާ ބީ) ހިއްކައި ނިމިފައިވާކަމަށް އަރބަންކޯއިން ބުނެފިއެވެ.
މިއީ 39.6 ހެކްޓަރުގެ ސަރަހައްދެކެވެ. މި އޭރިއާ ހިއްކައި ނިމުމާއެކު، އޭރިއާ އޭ ހިއްކުމުގެ މަސައްކަތް މިހާރު ދަނީ ކުރަމުންނެވެ.
އޭރިއާ އޭ ހިއްކުމުގެ މަސައްކަތް އަންނަ އަހަރު ފެބްރުއަރީ މަހުގެ ތެރޭގައި ނިންމާލެވޭނެކަމަށް އަރބަންކޯއިން ބުނެއެވެ. އޭރިއާ އޭގެ ގޮތުގައި ހިއްކުމަށް ހަމަޖެހިފައިވަނީ 71.5 ހެކްޓަރުގެ ސަރަހައްދެކެވެ.
ތިލަފުށީ ސިނާއީ މަޝްރޫއަކީ ދިވެހި ސަރުކާރުގެ ލަފަޔާއި އިރުޝާދުގެ ދަށުން އަރބަންކޯއިން ކުރިއަށްގެންދާ މަޝްރޫއެކެވެ. ތިލަފުށީގެ ބިން ހިއްކައި ނިމުމުން، ތިލަފުށި މާސްޓަރ ޕްލޭންގެ ދަށުން އުމްރާނީ މަސައްކަތްތައް ކުރުމަށާއި ވިޔަފާރީގެ ބޭނުންތަކަށް ޖާގަ ތަނަވަސްކޮށްދިނުމުގެ ގޮތުން ބޮޑެތި ބިންތައް ދޫކުރުމަށް ކަނޑައެޅިފައި ވެއެވެ. މިކަމުގެ ސަބަބުން ތަރައްގީގެ މަސައްކަތްތަކާއި އިގްތިސާދީ ހަރަކާތްތައް އިތުރަށް ފުޅާކޮށް ކުރިއަށް ގެންދިއުމަށް މަގުފަހިވާނެއެވެ. އަދި ތިލަމާލެ ބްރިޖުން ހުޅުމާލެ، މާލެ، ވިލިމާލެ، އަދި ގުޅީފަޅު ތިލަފުއްޓާ ގުޅުވާލެވުމުން މި ސަރަހައްދަށް އިގްތިސާދީ ގޮތުން އިންގިލާބީ ކުރިއެރުންތަކެއް އަންނާނެކަމަށް އަރބަންކޯއިން ބުނެއެވެ.
