ގިނަ މެމްބަރުންގެ ސޮޔާއި އެކު އިތުބާރު ނެތްކަމުގެ މައްސަލަ ހުށަހެޅުމުން އެހެން ޤައުމެއްގައި ނަމަ އިސްތިއުފާދޭނެ - ރިޒާ
ރައްޔިތުންގެ މަޖިލީހުގެ ރައީސްގެ އިތުބާރުނެތް ކަމުގެ މައްްސަލައިގައި މަޖިލީހުގެ އިދާރާާއިން ވެސް އަމަލުކުރަމުން ދަނީ ރަނގަޅަށް ނޫން
ރައްޔިތުންގެ މަޖިލީހުގެ މިލަންދޫ ދާއިރާގެ މެމްބަރު އަލީ ރިޒާ
ގިނަ އަދަދެއްގެ މެމްބަރުންގެ ސޮޔާއި އެކު އިތުބާރު ނެތްކަމުގެ މައްސަލަ ހުށަހެޅުމުން، ރާއްޖެ ނޫން އެހެން ގައުމެއްގައި ނަމަ މިހާރު އަމިއްލަ އަށް އިސްތިއުފާ ދެއްވާފައި މަޖިލީހުގެ ރައީސް ގެއަށް ވަޑައިގަންނަވާނެކަމަށް ރިޒާ ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅުދައްކަވަމުން ރައްޔިތުން މަޖިލީހުގެ މިލަންދޫ ދާއިރާގެ މެމްބަރު އަލީ ރިޒާ ވިދާޅުވީ، ރައްޔިތުންގެ މަޖިލީހުގެ ރައީސްގެ އިތުބާރުނެތް ކަމުގެ މައްްސަލައިގައި މަޖިލީހުގެ އިދާރާާއިން ވެސް އަމަލުކުރަމުން ދަނީ ރަނގަޅަށް ނޫން ކަމަށެވެ. އެގޮތުން މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ކުރިއަށް ގެންދާ އިރު ރިޔާސަތުގައި އިންނަވަން ވާނީ މަޖިލީހުގެ ނައިބު ރައީސް ކަަމަށް ބުނާ ބުނުން ބަހުން ބަހަށް މަޖިލީހުގެ އިދާރާއިން މާނަކުރައްވާ ކަމަށް އޭނާ ވިދާޅުވިއެވެ. ނަމަވެސް އިތުބާރު ނެތްކަމުގެ މައްސަލަ ކުރިއަށް ނުގެންގޮސް އެހެން މައްސަލަ އެއް އެޖެންޑާ ނުކުރެވޭނެކަން މަޖިލީހުގެ ޤަވާއިދުގައި ސާފުކޮށް ބުނި ނަމަވެސް އެކަން މަޖިލީހުގެ އަމީން އާއްމާއި ކައުންސިލަރ ޖެނެރަލް މާނަކުރައްވަނީ ތަފާތުކޮށް ކަމަށް އޭނާ ވިދާޅުވިއެވެ. އެހެންކަމުން މަޖިލީހުގެ ޤަވާއިދު މާނަކުރާ އިރު އެކި މައްސަލަތަކުގައި ތަފާތުކޮށް އަމަލުކުރުމަކީ ކަންބޮޑުވެވަޑައިގަންނަވާ ކަމެއް ކަަމަށް ރިޒާ ވިދާޅުވިއެވެ.
ރިޒާ ވަނީ މަޖިލީހުގެ ރިޔާސަތުގައި ނަޝީދު އިންނަވަނީ ބަގުޑިބައްދަވައިގެން ގަދަކަމުން ކަމަށް ވިދާޅުވެފައެވެ. އަދި ނަޝީދުގެ އަމަލުތަކަކީ ޑިމޮކްރަސީ އާއި ބީރައްޓެހި ޢަމަލުތަކެއް ކަމަށް ފާހަގަކުރައްވާ ނަޝީދަށް ވަރަށް ބޮޑަށް ފާޑު ވިދާޅުވިއެވެ. އަދި ނަޝީދު މަޖިލީހުގެ ކުރީގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލަ މަޖިލީހަށް ހުށަހެޅުމުން އޭރު ނަޝީދު ކުރައްވާފައިވާ ޓްވީޓެއް ރިޒާ ވަނީ ވިދާޅުވެދެއްވާފައެވެ. އެ ޓްވީޓުގައި ނަޝީދު ވިދާޅުވީ ގިނަ މެމްބަރުން ސޮއިކޮށްގެން މަސީހުގެ އިތުބާރު ނެތްކަމުގެ މައްސަލަ ހުށަހެޅުމުން ރިޔާސަތުގައި އިންނަވައިގެން މަޖިލީސް ހިންގެވުމުގެ ހައިސިއްޔަތެއް މަސީހުގެ ނޮއޮންނާނެ ކަމަށެވެ. އެހެންކަމުން މިހާރު އަމިއްލަ ފުޅަށް ރިޔާސަތާއި ދުރަށް ވަޑައިނުގަންނަވަން އަމަލުކުރައްވާ ގޮތަކީ ލަދުވެތި ގޮތެއް ކަމަށް އޭނާ ވިދާޅުވިއެވެ.
