ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)އާ ދެކޮޅަށް ދިވެހި ފުލުހުން ކުރިއަށްގެންދާ ޖިނާއީ ތަހުގީގުގައި، އެ އިދާރާ ބަލައި ފާސް ކުރުމަށްފަހު ތަހުގީގުގެ ބޭނުމަށް ގެންދިޔަ ސާމާނުގެ ތެރޭގައި، އެފްއޭއެމްގެ ހިންގުން ހުއްޓޭފަދަ އެއްވެސް އެއްޗެއްވާ ނަމަ، ވީ އެންމެ އަވަހަކަށް ހަވާލުކުރުމުގެ މަސައްކަތް ކުރަމުން އަންނަ ކަމަށް ދިވެހި ފުލުހުންގެ އިދާރާ އިން ބުނެފި އެވެ.
ދިވެހި ފުލުހުން އެފްއޭއެމް ބަލައި ފާސްކޮށްފައިވާއިރު، އެކަމާ ގުޅިގެން އެފްއޭއެމުން ވަނީ ބަޔާނެއް ވެސް ނެރެފަ އެވެ. އެގޮތުން އެ ތަހުގީގުގައި ފުލުހުން ވަނީ ދުވަހުން ދުވަހަށް ކުރަން ޖެހޭ މަސައްކަތަށް ބޭނުންވާ ބައެއް ސާމާނު ގެންގޮސްފައި ކަމަށް ބުނެފައިވެ އެވެ. އެކަމާ ގުޅިގެން ދިވެހި ޕްރިމިއާ ލީގުގެ ކުޅުމާއި، ކުރިއަށް ރާވާފައިވާ އެހެނިހެން މުބާރާތްތައް ވެސް ކުރިއަށް ނުގެންދެވޭނެ ކަމަށް އެފްއޭއެމުން ވަނީ ބުނެފަ އެވެ. ދިވެހި ލީގު އަލުން ފެށުމަށް ތާވަލްކޮށްފައި އޮތީ މިދިޔަ ހޮނިހިރު ދުވަހަށެެވެ. ނަމަވެސް އެ ދުވަހު ލީގު އަލުން ފެށިފައި ނުވާއިރު، އެފްއޭއެމުން އެ ދުވަހު ބުނީ ދުވަހުން ދުވަހަށް ކުރަން ޖެހޭ މަސައްކަތް ނުކުރެވިގެން ލީގު ނުފެށުނު ކަމަށެވެ. އަދި ފުލުހުންނާ ވާހަކަ ދައްކައިގެން ތަހުގީގު އަވަސް ކުރުމުގެ މަސައްކަތް ކުރަމުން އަންނަ ކަމަށް ވެސް ވަނީ ބުނެފަ އެވެ.
އެކަމާ ގުޅިގެން "ރާއްޖެ އެމްވީ" އިން ސުވާލު ކުރުމުން ފުލުހުން ބުނީ، އެފްއޭއެމްގެ އެއްވެސް މުބާރާތެއް ހުރަސް އެޅޭ ފަދަ އެއްވެސް އެއްޗެއް ތަހުގީގުގެ ބޭނުމަށް ނެގިފައިވާ ނަމަ، އެފްއޭއެމާ ވާހަކަ ދައްކައިގެން އެ އެއްޗެއް ވީ އެންމެ އަވަހަކަށް ހަވާލު ކުރުމުގެ މަސައްކަތް ކުރަމުން އަންނަ ކަމަށެވެ.
ފުލުހުން އެފްއޭއެމްއަށް ވަނުމުގެ ކުރިން ވެސް އެ އިދާރާއަކީ އެކަށީގެންވާ މިންވަރާ ގާތަށް ވެސް ހިންގަމުންދާ އިދާރާއެއް ނޫނެވެ. މުވައްޒަފުންނަށް މުސާރަ ނުދޭތާ އެތައް މަހެއް ވެފައިވާ އިރު، މުވައްޒަފުންގެ ޕެންޝަން ފައިސާ އަށް ވެސް ވަނީ ޚިޔާނާތްތެރިވެފަ އެވެ. ޤައުމީ ޓީމަށް ގެނައި ކޯޗުންނާއި, ޓެކްނިކަލް އޮފިޝަލުންނަށް މުސާރަ ނުދީގެން، އެ ފައިސާ ދިނުމަށް ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ވަނީ އަންގާފަ އެވެ. އެކި ފަރާތްތަކަށް ދައްކަން ޖެހޭ ފައިސާ ނުދައްކައި އޮތުމުން، ކޯޓު ހުކުމްތައް އައިސްފައި އެބަހުއްޓެވެ. މުބާރާތްތައް ފެށުމަށް ކަނޑައެޅިފައިވާ ތާރީޚުތަކަށް ތަކުރާރުކޮށް ބަދަލު އައިސް، މުބާރާތްތައް ފެށުން ލަސްވެ އެވެ.
