ޒުވާން އުމުރުގައި ހައްޖާއި އުމްރާގެ އަޅުކަން އަދާކުރުމަށް ބާރުއަޅައި، ޕެކޭޖްތައް ތައާރަފްކުރަން: ހައްޖު ކޯޕްރޭޝަން

ޒުވާން އުމުރުގައި ހައްޖާއި އުމްރާގެ އަޅުކަން އަދާކުރުމަށް ބާރުއަޅާ ކަމަށާއި، ޒުވާނުންނަށް އަޅުކަމަށް ދިއުމަށް ފަސޭހަވާނެ ގޮތަށް ޕެކޭޖްތައް ތައާރަފްކުރާ ކަމަށް ހައްޖު ކޯޕްރޭޝަނުން ބުނެފިއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަފުޅުދައްކަވަމުން، މެނޭޖަރު ލީގަލް ކާމް ކޮމްޕެނީގެ ސެކްރެޓަރީ އަބްދުﷲ ނާހިދު ވިދާޅުވީ، ޒުވާން އުމުރުގައި ހައްޖާއި އުމްރާގެ އަޅުކަން އަދާކުރުމަށް ބާރު އަޅާ ކަމަށާއި، އެކަމަށް ޒުވާނުން އަހުލުވެރިކުރުމަށް ގިނަ މަސައްކަތްތައް ކުރަމުންދާކަމަށެވެ. ނަމަވެސް ހައްޖާއި އުމްރާގެ އަޅުކަން އަދާކުރަންޖެހޭނީ އުމުރުން ދުވަސްވުމުން، ކުށްފާފަތަކުން ދުރުހެލިވެ، އަޅުކަމަށް އެއްކޮށް ހުސްވުމަށްފަހު ކަމަށް ބައެއް މީހުން ގަބޫލުކުރާ ކަމަށެވެ. އެއީ ރަނގަޅު ވިސްނުމެއް ނޫންކަމަށާއި، މިހާރުވެސް އުމުރުން ދުވަސްވީ މީހުން ހައްޖާއި އުމްރާއަށް ދިއުމަށްފަހު ރަނގަޅަށް އަޅުކަން އަދާނުކުރެވުމުގެ ސަބަބުން ހިތާމަކުރާ މަންޒަރު ފެނިވަޑައިގަންނަވާ ކަމަށް ނާހިދު ވިދާޅުވިއެވެ.

ޒުވާނުން ހޭލުންތެރިކުރުމަށް ގިނަ މަސައްކަތްތައް ކުރަމުންދާކަން ފާހަގަކުރައްވައި ނާހިދު ވިދާޅުވީ، ފަސްވަނަ ރުކުން ޕްރޮގްރާމް ކުރިއަށް ގެންދާކަމަށެވެ. މި ޕްރޮގްރާމުގައި ހައްޖާއި އުމްރާގެ މުހިންމުކަމާއި، ހައްޖާއި އުމްރާ އަދާކުރާނެ ގޮތާއި، އެކަމަށް ތައްޔާރުވާނެ ގޮތްތައް ކިޔައިދޭ ކަމަށް އޭނާ ވިދާޅުވިއެވެ. އަދި ވިދާޅުވީ މި ޕްރޮގްރާމުން ޒުވާނުންނަށް ގިނަ މެސެޖްތަކެއް ފޯރުކޮށްދިނުމަށް މަސައްކަތް ކުރަމުންދާކަމަށެވެ.

މީގެ އިތުރުން ނާހިދު، ވިދާޅުވީ ހޭލުންތެރިކުރުމަށް ހިންގާ ޕްރޮގްރާމްތަކުގެ ނަތީޖާ ރަނގަޅު ކަމަށާއި، ކުރިއާ ޚިލާފަށް ގިނަ އަދަދެއްގެ ޒުވާނުން ހައްޖާއި އުމްރާގެ އަޅުކަން އަދާކުރާކަން ފާހަގަކުރެއްވޭ ކަމަށެވެ.

ނާހިދު ވިދާޅުވީ، ޒުވާނުންނަށް އަޅުކަމަށް ދެވޭ ގޮތަށް ފުރުސަތުތައް ފަހިކޮށްދޭ ކަމަށާއި، ތައާރަފްކުރާ ޕެކޭޖްތަކުގައި ވެސް ޒުވާނުންނަށް ފަސޭހައިން ދަރިންނާއި އާއިލާ ގޮވައިގެން ދެވޭގޮތަށް ދުވަސްތައް ކަނޑައަޅާ ކަމަށެވެ.