ފުޓުބޯޅަ ނުހިންގޭނެ ކަމަށް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނުމަކީ ކުޑަކުދިން ދައްކާ ކަހަލަ ވާހަކައެއް ކަމަށް، އެފްއޭއެމްގެ ކުރީގެ ޖެނަރަލް ސެކްރެޓަރީ ޙާމިދު ޢަބްދުލް ޣަފޫރު ވިދާޅުވެއްޖެ އެވެ.

އެފްއޭއެމަށް ކުރެވޭ މަނީ ލޯންޑަރިންގެ ތުހުމަތާ ގުޅިގެން، މިދިޔަ އާދީއްތަ ދުވަހު ދިވެހި ފުލުހުން ވަނީ އެފްއޭއެމަށް ވަދެ، ބަލައި ފާސްކުރުން ކުރިއަށް ގެންގޮސްފަ އެވެ. އެކަމާ ގުޅިގެން އެފްއޭއެމުން ވަނީ ބުރާސްފަތި ދުވަހު ބަޔާނެއް ނެރެފަ އެވެ. އެ ބަޔާނުގައި އެފްއޭއެމުން ބުނެފައި ވަނީ، އެ އިދާރާ ބަލައި ފާސްކުރުމަށް ފަހު، ދުވަހުން ދުވަހަށް ކުރަން ޖެހޭ މަސައްކަތަށް ބޭނުންވާ ސާމާނު ފުލުހުން ގެންގޮސްފައިވާ ކަމަށެވެ. އެކަމުގެ ސަބަބުން ދިވެހި ލީގުގެ އިތުރުން، ކުރިއަށް ރާވާފައިވާ އެހެނިހެން މުބާރާތްތައް ވެސް ކުރިއަށް ނުގެންދެވޭނެ ކަމަށް އެފްއޭއެމުން ވަނީ ބުނެފަ އެވެ.

އެކަމާ ގުޅިގެން "ރާއްޖެ އެމްވީ"އާ ވާހަކަ ދައްކަވަމުން ޙާމިދު ވިދާޅުވީ އެއީ އެއްވެސް ގޮތަކަށް އޮއްޓަރު ހުރި ވާހަކައެއް ނޫން ކަމަށެވެ. އެއީ ކުޑަކުދިން ދައްކާ ކަހަލަ ވާހަކައެއްކަން ފާހަގަކޮށް ޙާމިދު ވިދާޅުވީ، ފުލުހުން ބޭނުންވާ ސާމާނު ގެންދިޔުމަށް ފަހު، ދެ ދުވަހެއްގެ ތެރޭގައި އަނބުރާ ރައްދު ކުރާނެ ކަމަށެވެ. އެއީ ފުލުހުން ބޭނުންވާ މައުލޫމާތު ނެގުމަށް ފަހު ކަމަށް ވެސް ޙާމިދު ވިދާޅުވި އެވެ. އެހެންކަމުން އެފްއޭއެމާ ދެކޮޅަށް ކުރެވޭ މަނީ ލޯންޑަރިން ނުވަތަ ޚިޔާނާތުގެ މައްސަލައަކާ ގުޅިގެން ދިވެހި ފުޓުބޯޅަ ކުރިއަށް ނުގެންދެވި ހުއްޓާލަން ޖެހޭ ކަމަށް ޙާމިދު ދެއްކިއެއް ނުލައްވަ އެވެ.

މީގެ އިތުރުން ޙާމިދު ވިދާޅުވީ އެފްއޭއެމުން ނެރުނު ބަޔާނުގައި ހަވާލާދީފައިވާ ފީފާ ޤަވާއިދުގެ މާއްދާތަކީ، މައްސަލައާ ގުޅުމެއް ނެތް މާއްދާ ތަކެއް ކަމަށެވެ. ނަމަވެސް، ހަވާލާދީފައިވާ މާއްދާތުގެ ތެރެއިން އެ މާއްދާ އިން ސާފުވާން އޮތް ކަމަކީ، އެފްއޭއެމް ހިންގަން ތިބި ވެރިންގެ އިހުމާލެއްގެ ސަބަބުން ހިނގާކަމެއްގައި، އެ މައްސަލަ ބަލައި ތަހުގީގު ކުރެވޭނެ ކަމަށެވެ. އަދި އެއަށްފަހު އެ ބަޔަކާ މެދު ފިޔަވަޅު އަޅާނެ ކަމަށް ވެސް ބަޔާންކޮށްފައިވާ ކަމަށް ޙާމިދު ވަނީ ވިދާޅުވެފަ އެވެ.

ޕްރޮސެކިއުޓާ ޖެނެރަލް (ޕީޖީ) އޮފީހުން ބުނެފައިވާ ގޮތުގައި، އެފްއޭއެމަށް އެކި ފަރާތްތަކުން ދެމުން އަންނަ ފައިސާތަކަށް އެ އިދާރާގެ އިސްވެރިން ޚިޔާނާތްތެރިވެ، އިތުރު ކުށުގެ އަމަލުތައް ހިންގާކަމަށް ތުހުމަތުކުރެވޭ މައްސަލައިގެ އެއްވެސް ހިސާބެއްގައި؛ މަނީ ލޯންޑަރިން، ވައްކަން، ޚިޔާނާތް އަދި މަކަރާއި ހީލަތް ނުވަތަ އެ ނޫންވެސް ޖިނާއީ ކުށެއްގެ މައްސަލައެއް ހިނގަމުންދާނަމަ، އެ ކަމެއް ތަހުގީގުކޮށް، އެ މައްސަލާގައި ދައުވާއެއް ކުރެވެން އޮތް ބައެއްގެ މައްޗަށް ދައުވާކުރުމަށް ފޮނުވައިދިނުމަށް އެދޭކަމަށެވެ.

އެފްއޭއެމާ ދެކޮޅަށް ފުލުހުން ކުރަމުންދަނީ ސީރިއަސް ތުހުމަތުތަކެކެވެ. އެގޮތުން އެ އިދާރާއަށް އެކި ގޮތްގޮތުން ލިބެމުން އަންނަ ފައިސާ، އިދާރާގެ އިސްވެރިންނާއި، އިސްވެރިންނާ ގާތް ގުޅުން އޮތް ފަރާތްތަކުގެ އިތުރުން، އެކިއެކި ކުންފުނިތަކަށްވެސް ވަނީ ޖަމާކޮށްފައިވާ ކަމަށް ތުހުމަތު ކުރެ އެވެ.