ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)އާ ދެކޮޅަށް ދިވެހި ފުލުހުން ކުރިއަށް ގެންދާ ތަހުގީގާ ގުޅިގެން، ހަތަރު ދުވަސް ފަހުން އެފްއޭއެމްއިން އެކަމަށް ރައްދުދީ ބަޔާން ނެރެފިއެވެ.
އެފްއޭއެމާ ދެކޮޅަށް ކުރިއަށްގެންދާ ތަހުގީގާ ގުޅިގެން މި ހަފުތާގެ އާދީއްތަ ދުވަހު ފުލުހުން ވަނީ އެފްއޭއެމްގެ އޮފީހަށް ވަދެފައެވެ. ޕްރޮސެކިއުޓާ ޖެނެރަލް (ޕީޖީ) އޮފީހުން ބުނެފައިވާ ގޮތުގައި، އެފްއޭއެމަށް އެކި ފަރާތްތަކުން ދެމުން އަންނަ ފައިސާތަކަށް އެ އިދާރާގެ އިސްވެރިން ޚިޔާނާތްތެރިވެ، އިތުރު ކުށުގެ އަމަލުތައް ހިންގާކަމަށް ތުހުމަތުކުރެވޭ މައްސަލައިގެ އެއްވެސް ހިސާބެއްގައި؛ މަނީ ލޯންޑަރިން، ވައްކަން، ޚިޔާނާތް އަދި މަކަރާއި ހީލަތް ނުވަތަ އެ ނޫންވެސް ޖިނާއީ ކުށެއްގެ މައްސަލައެއް ހިނގަމުންދާނަމަ، އެ ކަމެއް ތަހުގީގުކޮށް، އެ މައްސަލާގައި ދައުވާއެއް ކުރެވެން އޮތް ބައެއްގެ މައްޗަށް ދައުވާކުރުމަށް ފޮނުވައިދިނުމަށް އެދޭކަމަށެވެ.
މައުލޫމާތު ލިބިފައިވާގޮތުގައި، އެފްއޭއެމާ ދެކޮޅަށް ފުލުހުން ކުރަމުންދަނީ ސީރިއަސް ތުހުމަތުތަކެކެވެ. އެގޮތުން އެ އިދާރާއަށް އެކި ގޮތްގޮތުން ލިބެމުން އަންނަ ފައިސާ، އިދާރާގެ އިސްވެރިންނާއި، އިސްވެރިންނާ ގާތް ގުޅުން އޮތް ފަރާތްތަކުގެ އިތުރުން، އެކިއެކި ކުންފުނިތަކަށްވެސް ވަނީ ޖަމާކޮށްފައެވެ.
އެކަމާ ގުޅިގެން އެފްއޭއެމްގެ ރައީސް ބައްސާމް އަދީލް ޖަލީލް އެންމެ ފުރަތަމަ ވިދާޅުވީ، ތަހުގީގު ނިމުމާއެކު އެކަމާ ގުޅިގެން ވާހަކަދައްކަވާނެ ކަމަށެވެ. އޭގެ ފަހުން އެއްވެސް ވާހަކައެއް އެފްއޭއެމްއިން ދައްކާފައެއް ނުވެއެވެ. އޭގެ ފަހުން ބުރާސްފަތި ދުވަހު ބައްސާމާއި އެފްއޭއެމްގެ ޖެރަނަލް ސެކްރެޓަރީ ހުސައިން ޖަވާޒް (ޖަވާ) ވަނީ، ފީފާގެ ރައީސް ޖިއާނީ އިންފަންޓީނޯއާ ބައްދަލު ކުރައްވާފައެވެ. އެއަށްފަހު އެފްއޭއެމުން ވަނީ ބުރާސްފަތި ދުވަހުގެ ހަވީރު ބަޔާނެއް ނެރެފައެވެ.
އެ ބަޔާނުގައި އެފްއޭއެމުން ވަނީ، އެ އިދާރާއާ ދެކޮޅަށް ކުރާ އެންމެހައި ތުހުމަތުތައް ދޮގުކޮށްފައެވެ. އެގޮތުން އެ އިދާރާއަށް އެކި ގޮތްގޮތުން ލިބެމުން އަންނަ ފައިސާ، އެ އިދާރާގެ އެއްވެސް އިސްފަރާތަކާއި، އެ ފަރާތްތަކާ ގުޅުން އޮންނަ މީހެއްގެ އެކައުންޓަށް ޖަމާކޮށްފައި ނުވާނެކަމަށް ބުނެފައިވެއެވެ. ހަމައެއާއެކު އެ އިދާރާއަށް ލިބެމުން އަންނަ ފައިސާ ޚަރަދުކުރާ ގޮތުގެ އޮޑިޓުތައް ބަރާބަރަށް ކުރިއަށްގެންދާ ކަމަށްވެސް ބުނެފައިވެއެވެ.
އިތުރަށް އެފްއޭއެމުން ބުނެފައިވަނީ، ފުލުހުން އެ އިދާރާ ބަލައިފާސްކުރުމަށްފަހު އެތަނުގައި ހުރި ގިނަ އަދަދެއްގެ ލިޔެކިޔުމާއި، މަސައްކަތުގެ މާހައުލުގައި ކޮންމެހެން ބޭނުންކުރަންޖެހޭ އެތައް އާލާތްތަކެއް ފުލުހުންހެ ބެލުމުގެ ދަށަށް ގެންގޮސްފައިވާތީ، އެ އިދާރާގައި ދުވަހުން ދުވަހަށް ކުރަންޖެހޭ ކަންކަން ހުއްޓުމަކަށް އައިސްފައިވާކަމަށެވެ. އެހެންކަމުން މި ހާލަތުގައި ދިވެހި ފުޓުބޯޅަ ލީގާއި، ރޭވިފައި ހުރި އެހެން މުބާރާތްތައްވެސް ކުރިއަށް ގެންދިޔުމަކީ ކުރެވެނޭ ކަމެއް ނޫން ކަމަށްވެސް އެފްއޭއެމުން ވަނީ ބުނެފައެވެ.
ބަޔާން ނިންމާލަމުން އެފްއޭއެމުން ބުނެފައިވަނީ، މިވަގުތު ވެސް ފުލުހުން ކުރިއަށް ގެންދާ ތަހުގީގަށް އެ އިދާރާއިން އެންމެ ފުރިހަމައަށް އެއްބާރުލުން ދޭނެކަމަށެވެ. ހަމައެއާއެކު ތަހުގީގު މަރުހަލާ ވީހާވެސް އަވަހަކަށް ކުރިއަށް ގެންގޮސް، ނިންމައިދިނުމަށްވެސް އެ އިދާރާއިން ވަނީ އެދިފައެވެ.
ފަހަކަށްއައިސް އެފްއޭއެމްގެ މާލީ މައްސަލަ ބޮޑުވެ، އެ އިދާރާ ވަނީ ބަނގުރޫޓުވުމާ ގާތްވެފައެވެ.
