ދެވަނަ ފިޔަވަހީގެ ގޯއްޗާއި ފްލެޓަށް އެދި ހުށަހެޅި ފޯމުތައް އިވެލުއޭޓްކޮށް، ދާއިމީ ލިސްޓު ނެރުމަށް ކުރަންޖެހޭ މަސައްކަތް ދަނީ ކުރަމުން: ހައުސިން މިނިސްޓްރީ

މިދައުރުގައި ގެދޮރުވެރިޔާއާއި ބިންވެރިޔާ މަޝްރޫއުގެ ދެވަނަ ބުރުގައި ހުށަހެޅި ފޯމުތައް އިވެލުއޭޓްކޮށް، ދާއިމީ ލިސްޓު ނެރުމަށް ކުރަންޖެހޭ މަސައްކަތް ކުރަމުންދާ ކަމަށް ހައުސިން މިނިސްޓްރީން ބުނެފިއެވެ.

ރާއްޖެއެމްވީއަށް ހައުސިންގ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ ދެވަނަ ބުރުގައި ގިނަ ބަޔަކު ފޯމް ހުށަހަޅާފައިވާ ކަމަށާއި، ކޮންމެ ފޯމެއްގެ މައުލޫމާތު ކަށަވަރުތޯ ޔަގީންކުރަންޖެހޭ ކަމަށެވެ. އެހެންކަމުން ފޯމްތައް އިވެލުއޭޓް ކުރުމަށް ވަގުތު ބޭނުންވާނެ ކަމަށާއި، މިދައުރުގެ ތެރޭގައި އެމަސައްކަތް ނިންމޭނެ ކަމަށް ލަފާނުކުރެވޭ ކަމަށެވެ. އަދި ފޯމްތައް އިވެލުއޭޓްކޮށް ނުނިންމޭނަމަ ދާއިމީ ލިސްޓް އާއްމު ނުކުރެވޭނެ ކަމަށް އަކްރަމް ވިދާޅުވިއެވެ.

Advertisement

އަކްރަމް ވިދާޅުވީ އަވަސްއަރުވާލައިގެން ލިސްޓް ނެރެ ގޯތީގެ ރަޖިސްޓްރީ ދޫނުކުރާނެ ކަމަށާއި، މަސައްކަތްތައް ކުރާނީ އުސޫލުގެ ތެރެއިން ކަމަށެވެ.

މިދައުރުގައި ގެދޮރުވެރިޔާއާއި ބިންވެރިޔާ މަޝްރޫއުގެ ދެވަނަ ބުރުގައި ހުށަހެޅި ފޯމުތައް އިވެލުއޭޓްކޮށް، ދާއިމީ ލިސްޓު ނެރެވިދާނެ ކަމަށް ލަފާނުކުރެވޭ ކަމަށް އަކްރަމް ވިދާޅުވެފައިވާއިރު، މި މަޝްރޫއާއި ގުޅޭގޮތުން 25 އޮކްޓޫބަރު 2023 ވީ ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި އިންތިޚާބީ ރައީސް އޮފީހުގެ ތަރުޖަމާނު ފިރުޒުލް އަބްދުﷲ ވިދާޅުވީ، އެ ފޯމުތަކާމެދު ގޮތެއް ނިންމުމަށް މަޝްވަރާކުރަމުން ދާކަމަށެވެ. ނަމަވެސް މިހާތަނަށް ފޯމުތަކާމެދު ކަންކުރާނެ ގޮތަކާމެދު ގޮތެއް ނުނިންމޭ ކަމަށެވެ.

މި ސަރުކާރުން ގޯއްޗާއި ފްލެޓަށް އެދި ހުށަހެޅުމުގެ ފުރުސަތު ދެވަނަ ބުރަށް ހުޅުވާލީ، މާލޭގައި ދިރިއުޅޭ އެހެން ރަށްރަށުގެ ރައްޔިތުންނަށްވެސް ބޯހިޔާވަހިކަން ލިބޭ ގޮތަށެވެ. އެގޮތުން މާލޭގައި ދިރިއުޅޭތާ 20 އަހަރުވެފައިވާ ފަރާތްތަކަށް ގޯއްޗަށް އެދި ހުށަހެޅުމުގެ ފުރުސަތު ހުޅުވާލިއިރު، ފްލެޓަށް އެދި ހުށަހެޅުމުގެ ފުރުސަތު ހުޅުވާލީ މާލޭގައި ދިރިއުޅޭތާ 15 އަހަރުވެފައިވާ ފަރާތްތަކަށެވެ.

"ބިންވެރިޔާ" ސްކީމުގެ ދެވަނަ ފިޔަވަހިން ބަންޑާރަ ގޯއްޗަށް އެދި 19،347 ފޯމާއި، "ގެދޮރުވެރިޔާ" ސްކީމުގެ ދެވަނަ ފިޔަވަހިން ފުލެޓަށް އެދި 21،247 ފޯމް ހުށަހަޅާފައިވެއެވެ.

މާލެއަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށްޓަކައި ސަރުކާރުން އެކަށައަޅައިފައިވާ ބޯހިޔާވަހިކަމުގެ ސިޔާސަތުގެ ދަށުން، "ގެދޮރުވެރިން" މި ނަމުގައި ކުރިޔަށްގެންދާ ޕްރޮގްރާމުގެ ތެރެއިން ހިންގާ "ބިންވެރިޔާ" ސްކީމުގެ ދެވަނަ ފިޔަވަހިން ބަންޑާރަގޯތި ދޫކުރުމުގެ އުސޫލުގެ ދަށުން ގޯއްޗަށް އެދި ހުށަހެޅުމަށާއި، "ގެދޮރުވެރިޔާ" ސްކީމުގެ ދެވަނަ ވިޔަވަހިން ފުލެޓް ދޫކުރުމުގެ އުސޫލުގެ ދަށުން ފުލެޓަށް އެދި ހުށަހެޅުމަށް ހުޅުވާލީ 24 ސެޕްޓެމްބަރު 2023 އިން 24 އޮކްޓޫބަރު 2023 ވީ އަންގާރަ ދުވަހުގެ މެންދުރުފަހު 3:00ށެވެ.

ބޯހިޔާވަހިކަމުގެ މަޝްރޫއުގައި، ދެވަނަ ބުރަށް 6،000 ފްލެޓާއި 4،500އަށްވުރެ ގިނަ ގޯތި ދިނުމަށް ސަރުކާރުން ވަނީ ނިންމާފައެވެ.