ރައްޔިތުންގެ މަޖިލީހުގެ އިދާރީ ދާއިރާތަކާއި ގުޅޭގޮތުން 65 ޝަކުވާ ލިބިފައިވޭ

ރައްޔިތުންގެ މަޖިލީހުގެ 2024 ވަނައަހަރުގެ އިންތިޚާބީ ދާއިރާތަކަށް އާބާދީ ކަނޑައަޅާފައިވާގޮތުގެ ވަގުތީ ރިޕޯޓަށް 65 ޝަކުވާ ލިބިފައިވާކަމަށް އިލެކްޝަންސް ކޮމިޝަން (އީސީ)ން ބުނެފިއެވެ.

އެކޮމިޝަނުން ބުނީ ހުށަހަޅާފައިވާ ޝަކުވާ އާއި ޚިޔާލުތަކަށް ނޮވެމްބަރ މަހުގެ 5 ވަނަ ދުވަހުގެ ކުރިން އީސީން ގޮތެއް ކަނޑައަޅާނެކަމަށެވެ. އަދި ޝަކުވާ އާއި ޚިޔާލު ހުށަހެޅި ފަރާތްތަކަށް އީސީން ނިންމާ ނިންމުން ސަބަބާއެކު އަންގާނެކަމަށްވެސް އީސީން ބުނެއެވެ.

އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިޚާބުގައި ހަ ގޮނޑި އިތުރުވާނެއެވެ. މިއާއެކު މަޖިލީހުގެ ގޮނޑީގެ އަދަދު 93ށް އަރާނެއެވެ. މިހާރު މަޖިލީހުގައި ތިއްބަވަނީ 87 މެމްބަރުންނެވެ. އަންނަ އަހަރުގެ އިންތިޚާބަށް އިތުރު ކުރުމަށް އީސީން ނިންމާފައިވަނީ މާލެ ސިޓީއަށް 2 ގޮނޑި، އައްޑޫ ސިޓީއަށް ގޮނޑިއެއް، ބ އަދި ލ އަތޮޅަށް ގޮނޑިއެއް، މާލެ އަތޮޅަށް ގޮނޑިއެއް އަދި ގއ އަތޮޅަށް ގޮނޑިއެކެވެ.

ހުށަހަޅާފައިވާ ޝަކުވާތަކުގައި އެންމެ ގިނައިން ޝަކުވާ ހުށަހަޅާފައިވަނީ އައްޑޫ ސިޓީގެ ފޭދޫ އުތުރު ދާއިރާއަށެވެ. އެއިދާރާއާ ގުޅޭގޮތުން 44 ޝަކުވާއެއް ހުށަހަޅާފައިވެއެވެ.

ރައްޔިތުންގެ މަޖިލީހުގެ އިންތިޚާބީ ދާއިރާތައް ކަނޑައެޅުމުގެ ގާނޫނުގައި ވާގޮތުން، ހިނގަމުންދާ ރައްޔިތުންގެ މަޖިލީހުގެ ދައުރު ނިމުމުގެ 12 މަސް ނުވަތަ 10 މަސް ދުވަހުގެ ތެރޭގައި، ދިވެހިރާއްޖޭގެ ކޮންމެ އިދާރީ ދާއިރާއަކަށް ވާ ރައްޔިތުންގެ މަޖިލީހުގެ މެންބަރުންގެ އަދަދު އީސީން ކަނޑައަޅަން ޖެހެއެވެ.