2024ގެ މަޖިލީހުގެ އިންތިޚާބަށް ޕީއެންސީގެ ސަރުކާރުން ނުފޫޒު ފޯރުވާތަން ފެންނާނެ: މެންބަރު ރާއީ
އިންތިޚާބުތަކާއި ދިމާކޮށް ކެންޕޭނަށް ރަށްރަށަށް ގޮސް ވަކި ކެންޑިޑޭޓަށް ވޯޓު ދިނުމަށް މަޖުބޫރު ކުރޭ
މަކުނުދޫ ދާއިރާގެ މެންބަރު މުޙައްމަދު ރާއީ
2024 ވަނަ އަހަރު ބޭއްވުމަށް ހަމަޖެހިފައިވާ ރައްޔިތުން މަޖިލީހުގެ އިންތިޚާބަށް ޕީއެންސީގެ ސަރުކާރުން ނުފޫޒު ފޯރުވާތަން ފެންނާނެ ކަމަށް މަކުނުދޫ ދާއިރާގެ މެންބަރު މުހައްމަދު ރާއީ ވިދާޅުވެއްޖެއެވެ.
ހޯމަ ދުވަހުގެ ރައްޔިތުން މަޖިލީހުގެ ޖަލްސާގައި، މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ ހުށަހަޅުއްވާފައިވާ، އިންތިޚާބުތަކަށް ސަރުކާރުން ނާޖާއިޒު ނުފޫޒާއި ބާރުފޯރުވަމުންދާތީ، އިންތިޚާބުތައް އިންސާފުވެރިކުރުމަށާއި މިނިވަންކުރުމަށް ވެފައިވާ ވައުދާ އެއްގޮތަށް ސަރުކާރުން ކަންކަން ތަންފީޒުކޮށް މަގުފަހިކުރުމަށް ގޮވާލާފައިވާ ގަރާރުގެ ބަހުސްގައި ވާހަކަފުޅުދައްކަވަމުން މެންބަރު ރާއީ ވިދާޅުވީ ކޮންމެ އިންތިޚާބަކާއި ގުޅިގެން އެއިރެއްގައި އޮންނަ ސަރުކާރަކުން އިންތިޚާބަށް ނުފޫޒު ފޯރުވާ ކަމަށް އަޑު ފެތުރޭ ކަމަށެވެ. އަދި ކުރިއަށް އޮތް 2024 ވަނަ އަހަރު ބޭއްވުމަށް ހަމަޖެހިފައިވާ ރައްޔިތުން މަޖިލީހުގެ އިންތިޚާބަށް ސަރުކާރުގެ ނުފޫޒު ވަންނަތަން މިހާރު ވެސް ފެންނަމުންދާ ކަމަށް މެންބަރު ރާއީ ވިދާޅުވިއެވެ.
އޭނާ ވިދާޅުވީ އިންތިޚާބުތަކާއި ދިމާކޮށް ކެންޕޭނަށް ރަށްރަށަށް ގޮސް ވަކި ކެންޑިޑޭޓަށް ވޯޓު ދިނުމަށް މަޖުބޫރު ކުރާ ކަމަށެވެ. އަދި ތަރައްގީގެ މަޝްރޫއުތައް ކުރިއަށް ގެންދަން ބޭނުންވާނަމަ ސަރުކާރުން ނެރޭ ކެންޑިޑޭޓް ހޮވަންޖެހޭ ކަމަށް އަންގާ ކަމަށް މެންބަރު ރައީ ވިދާޅުވިއެވެ. އަދި ވިދާޅުވީ މިއުސޫލުތައް ބަދަލުކުރަންޖެހޭ ކަމަށާއި، މިމައްސަލައަށް ހައްލު ގެނައުމަށް ރައްޔިތުންގެ މަޖިލީހުގެ ތެރެއިން ވެސް ކުރެވޭނެ ކަންކަން ބަލަންޖެހޭ ކަމަށެވެ.
މެންބަރު ރައީ ވިދާޅުވީ އިންތިޚާބަށް ނުކުންނަ ކެންޑިޑޭޓެއްގެ ގާބިލްކަމުން އޭނަ އެމަގާމަށް ހޮވޭނެ ގޮތަށް ގާނޫނުތަކާއި އުސޫލުތައް ބައްޓަންކުރަން ޖެހޭ ކަމަށެވެ. އެހެންނޫން ނަމަ އިންތިޚާބުތަކަށް ސަރުކާރުން ނުފޫޒު ފޯރުވަން ކުރާ މަސައްކަތަށް ހައްލެއް ނުހޯދާނެ ކަމަށް މެންބަރު ރައީ ވިދާޅުވިއެވެ.
