ވ. ރަކީދޫ ސްކޫލްގައި ސެޓެލައިޓް ސްކޫލް ނިޒާމުން ކިޔަވައިދޭން ފަށައިފި
މި ސްކޫލްގައި ތިން ދަރިވަރުން ކިޔަވާނެ
ވ. ރަކީދޫ ސްކޫލް
ވ. ރަކީދޫ ސްކޫލްގައި ސެޓެލައިޓް ސްކޫލް ނިޒާމުން ކިޔަވައިދޭން ފަށައިފިއެވެ.
އާދިއްތަ ދުވަހު އެޑިއުކޭޝަން މިނިސްޓްރީ އިން ބުނީ ރަކީދޫ ސްކޫލުގައި ސެޓެލައިޓް ސްކޫލް ނިޒާމުން ކިޔަވާދޭން ފެށިފައިވާކަމަށެވެ. އަދި މި ސްކޫލްގައި ތިން ދަރިވަރުން ކިޔަވާނެކަމަށްވެސް މިނިސްޓްރީ އިން ވަނީ ބުނެފައެވެ.
ރާއްޖޭގެ 6 ރަށެއްގައި މިހާރު ވަނީ ސެޓެލައިޓް ސްކޫލް ޤާއިމްކުރެވިފައެވެ. އެގޮތުން، ބ. ފެހެންދޫ، ބ. ފުޅަދޫ، ގއ. ކޮނޑޭ، އދ. ދިއްދޫ، ވ. ތިނަދޫ އަދި ވ. ރަކީދޫގައެވެ. ރަކީދޫ ސްކޫލްގައި ކިޔަވައިދޭން ފެށުމާއެކު، ރާއްޖޭގައި މީހުން ދިރިއުޅޭ ކޮންމެ ރަށެއްގައި މިހާރު ކިޔަވައިދޭ ސްކޫލެއް ހުންނާނެކަމަށްވެސް އެޑިއުކޭޝަން މިނިސްޓްރީ އިން ވަނީ ބުނެފައެވެ.
މި އަހަރުގެ ދިރާސީ އަހަރުގެ ކިޔެވުން 84200 އެއްހާ ދަރިވަރުންނާއެކު ފަށައިފައިވަނީ 6 އޮގަސްޓު 2023 ގައެވެ. އެއީ ސަރުކާރު ސްކޫލްތަކުގައި ކިޔަވާ 73078 ދަރިވަރުންނާއި އަދި އަމިއްލަ ސްކޫލްތަކުގައި ކިޔަވާ ދަރިވަރުންނާ އެކުގައެވެ. މީގެތެރެއިން 24000ށްވުރެ ގިނަ ދަރިވަރުން ކިޔަވަނީ މާލެ ސަރަހައްދުގައެވެ.
ސަރުކާރުގެ 216 ސްކޫލެއްގައި ކިޔަވައިދޭއިރު، މީގެތެރެއިން 156 ސްކޫލެއްގައި ކިޔަވައިދެނީ އެއްދަންފަޅިއަށެވެ. ހުރިހާ ސްކޫލެއް އެއްދަންފަޅިއަށް ބަދަލުކުރުމަކީ މިސަރުކާރުގެ އަމާޒެކެވެ.
