ދެ ހަފްތާ ތެރޭގައި އިސްރާއީލުން އަސީރުންގެ ގޮތުގައި ހައްޔަރުކުރި މީހުންގެ އަދަދު 10،000ށް
އޮކްޓޯބަރު މަހުގެ 7 ވަނަ ދުވަހުން ފެށިގެން ޣައްޒާއިން 4000 މަސައްކަތު މީހުން ހައްޔަރުކޮށްފައިވޭ
އިސްރާއީލް އަސްކަރިއްޔާއިން ފަލަސްތީނުގެ މީހަކު ހައްޔަރުކުރަނީ
ފާއިތުވި ދެ ހަފްތާގެ ތެރޭގައި އިސްރާއީލުން އަސީރުންގެ ގޮތުގައި ހައްޔަރު ކުރި ފަލަސްތީނު މީހުންގެ އަދަދު 10،000 އަށް އަރައިފިއެވެ.
މީޑިއާ ރިޕޯޓްތައް ބުނާގޮތުން އިސްރާއީލުން ވަނީ އޮކްޓޯބަރު މަހުގެ 7 ވަނަ ދުވަހުން ފެށިގެން ޣައްޒާއިން 4000 މަސައްކަތު މީހުން ހައްޔަރުކޮށްފައެވެ. އަދި ހުޅަނގުއައްސޭރިން 1000 އަށް ވުރެ ގިނަ މީހުން ހައްޔަރުކޮށްފައިވާ ކަމަށް ފަލަސްތީނުގެ އޮފިޝަލުންނާއި ހަވާލާދީ މީޑިއާތަކުން ވަނީ ރިޕޯޓްކޮށްފައެވެ. މީގެ އިތުރުން ގުދުސް އިން ވެސް އިސްރާއީލުގެ އަސްކަރިއްޔާ އިން ވަނީ އަސީރުންގެ ގޮތުގައި މީހުން ހައްުޔަރުކޮށްފައެވެ.
އަދި ނަމާދުކުރުމަށް ޓަކައި ވެސް ގުދުސްގައި ބައެއް ހިސާބުތަކުގައި ބޭރަށް ނުކުމެ އުޅުމުގެ ފުރުސަތު ދެމުން ދަނީ އުމުރުން ދުވަސްވީ ފިރިހެނުންނާއި އަންހެނުންނާއި ކުޑަކުދިންނަށް އެކަނި ކަމަށް އަލްޖަޒީރާ ނޫހުގައި ވަނީ ރިޕޯޓްކޮށްފައެވެ. ޣައްޒާ އަށް ދެމުންދާ ހަމަލާތައް އިތުރުކުރުމާއެކު، އިސްރާއީލުން މިހާރު މަސައްކަތް ކުރަމުން ދަނީ ފަލަސްތީން އިތުރަށް ބަލިކަށިކޮށްލުމަށެވެ. އެތައް ހާސް ބަޔަކު އަސީރުންގެ ގޮތުގައި އިސްރާއީލުން ދަނީ ހައްޔަރުކުރަމުންނެވެ.
މިހާރު އިސްރާއީލާއި ފަލަސްތީނާ ދެމެދު ބަދަލުކުރަމުންދާ ހަމަލާތަކުގެ ކުރިން އިސްރާއީލުގެ ޖަލުތަކުގައި ތިބި ފަލަސްތީނު މީހުންގެ އަދަދަކީ 5200 އެވެ. އެހެންކަމުން މިހާރު އެ އަދަދު މި ވަނީ ދެގުނަ ވެފައެވެ. ކުރިއަށް އޮތްތަނުގައި ވެސް ފަލަސްތީނުގެ އިތުރު މީހުން ހައްުޔަރުކުރާނެ ކަމަށް ބެލެވެއެވެ. ހައްޔަރު ކުރާ މީހުން ހައްޔަރުކުރަމުން ދަނީ ހަނގުރާމައިގެ މައިދާނުގައި އަމަލުކުރަމުންދާ އުސޫލުތަކާއި ވެސް ޚިލާފަށެވެ.
