ސްޕެނިޝް ލީގުގައި ސެވިއްޔާއާ ދެކޮޅަށް ކުޅުނު މެޗުން ރެއާލް މެޑްރިޑު އެއްވަރުވެއްޖެ އެވެ.

ލީގުގައި ހޮނިހިރު ދުވަހުގެ ރޭ ސެވިއްޔާގެ ދަނޑުގައި ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗު ފަށައިގެން ހަތަރު ވަނަ މިނެޓުގައި ރެއާލުން ވަނީ ލަނޑެއް ޖަހައިފަ އެވެ. އުރުގުއޭގެ ފެޑެރިކޯ ވަލްވާޑޭ ލަނޑެއް ޖަހައި ރެއާލަށް ކުރި ހޯދައިދިން ނަމަވެސް، ވީއޭއާރު ބެލުމަށްފަހު ރެފްރީ ނިންމީ އެ ލަނޑު ބަލައި ނުގަތުމަށެވެ. އޭގެ ފަހުން ދެ ވަނަ ހާފުގައި ސެވިއްޔާ އަށް ވަނީ ލީޑު ލިބިފަ އެވެ. އެއީ 74 ވަނަ މިނެޓުގައި ރެއާލްގެ ޑިފެންޑަރު ޑޭވިޑް އަލަބާ އަތުން ބައި ކޮޅަށް ވަތް ލަނޑުންނެވެ. ނަމަވެސް އޭގެ ހަތަރު މިނެޓު ފަހުން ޑެނީ ކާވަހާލް ވަނީ ލަނޑު ޖަހައި ރެއާލް މެޗުން ސަލާމަތް ކޮށްދީފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޓޯނީ ކްރޫސް އެވެ.

ނަތީޖާ އާއެކު ރެއާލަށް ވަނީ އެއް ވަނައިގައި ލީޑު ނެގުމުގެ ފުރުސަތު ގެއްލިފަ އެވެ. މިހާތަނަށް ކުޅުނު 10 މެޗުން އެ ޓީމަށް ލިބެނީ 25 ޕޮއިންޓެވެ. ރެއާލަށް ވުރެ މެޗެެއް މަދުން ކުޅެގެން ދެ ވަނައިގައި ޖިރޯނާ އޮތީ 22 ޕޮއިންޓާއެކު އެވެ. ލީގުގައި އާދިއްތަ ދުވަހުގެ ރޭ ކުޅޭ މެޗުން ޖިރޯނާ މޮޅުވެއްޖެ ނަމަ، ރެއާލާ ހަމަ ކުރުމުގެ ފުރުސަތު އޮންނާނެ އެވެ.