ނިއުކާސަލްގެ ސަޕޯޓަރުން ދައްކާލީ ޓޮނާލީ އަށް އޮތް ލޯބި

ފުލުހުން ޖިނާއީ ތަހުގީގެއް ކުރިއަށް ގެންދާ އިޓަލީގެ މިޑްފީލްޑަރު ސަންޑްރޯ ޓޮނާލީ ކުޅެމުން އަންނަ ނިއުކާސަލް ޔުނައިޓެޑުގެ ސަޕޯޓަރުން އޭނާ އަށް އޮތް ލޯބި ދައްކާލައިފި އެވެ.

ބައިނަލްއަޤުވާމީ ބްރޭކުގައި ޓޮނާލީ އިޓަލީ އާއެކު އެ ޓީމުގެ ފަރިތަކުރުންތަކުގައި ބައިވެރިވަމުން ދަނިކޮށް، ފުލުހުން ވަނީ އޭނާގެ ތަހުގީގެއް ކުރިއަށް ގެންދާ ކަމަށް އަންގައިފަ އެވެ. އެއާއެކު ޓޮނާލީ އާއި ނިކޮލޯ ޒަނިއޯލޯ ވަނީ ޤައުމީ ޓީމުގެ ސްކޮޑުން އެކަހެރިކޮށްފަ އެވެ. އޭގެ ފަހުން އިޓަލީން ކުޅުނު ދެ މެޗުގައި ވެސް އެ ދެ ކުޅުންތެރިންނަށް ފުރުސަތު ދީފައެއް ނުވެ އެވެ.

ބައިނަލްއަޤުވާމީ ބްރޭކަށްފަހު އިނގިރޭސި ޕްރިމިއާ ލީގުގެ ކުޅުން ފަށާފައިވާއިރު، ހޮނިހިރު ދުވަހުގެ ރޭ ނިއުކާސަލް އިން ކްރިސްޓަލް ޕެލެސްއާ ދެކޮޅަށް ކުޅުނު މެޗުގައި ސަޕޯޓަރުން ވަނީ ޓޮނާލީ އަށް އޮތް ސަޕޯޓާއި ލޯބި ދައްކާލައިފަ އެވެ. ސަޕޯޓަރުން ވަނީ ޓޮނާލީ އަށް އުނދަގޫ ވަގުތުގައި ވެސް ހިތްވަރު ދިނުމުގެ ބަސްތައް ލިޔެފައިވާ ބެނާތައް ދަނޑުގައި ގެންގުޅެފަ އެވެ. އެ މެޗުން ނިއުކާސަލް މޮޅުވީއިރު، ޓޮނާލީ ވަނީ ކުޅެފަ އެވެ. ނަމަވެސް އެ މެޗުގައި އޭނާ ކުޅެފައި ވަނީ ބަދަލު ކުޅުންތެރިޔެއްގެ ގޮތުގަ އެވެ.

އޭސީ މިލާންގައި ހުރުމަށްފަހު، ޓޮނާލީ ނިއުކާސަލަށް ބަދަލުވީ މިއަހަރުގެ ޖުލައި މަހުގެ ތެރޭގަ އެވެ. އެ ކުލަބާއެކު އޭނާ ވަނީ ފަސް އަހަރު ދުވަހުގެ އެއްބަސްވުމެއްގައި ސޮއި ކޮށްފަ އެވެ. މިހާތަނަށް ޓޮނާލީ ވަނީ ނިއުކާސަލަށް ކުޅެދިން ދިހަ މެޗުން އެއް ލަނޑު ޖަހައިފަ އެވެ.

އިޓަލީގެ މީޑިއާ ތަަކުގައި ބުނެފައިވާ ގޮތުން ޓޮނާލީގެ މައްޗަށް ކުރަނީ ޤަވާއިދާ ޚިލާފަށް ބެޓިންގެ ކަންތަކުގައި ބައިވެރިވި ކަމުގެ ތުހުމަތެވެ. ފުޓުބޯޅަ މެޗުތަކަށް ބެޓްކުރި ކުޅުންތެރިއަކު، މަދުވެގެން ތިން އަހަރަށް ސަސްޕެންޑުކޮށް، އިޓަލީގެ ފުޓުބޯޅަ ފެޑެރޭޝަންގެ ޤަވާއިދުގައި ވާގޮތުން މަދުވެގެން 25،000 ޔޫރޯ (26،520 ޑޮލަރު)ން ޖޫރިމަނާ ކުރުމުގެ ފުރުސަތު އޮވެއެވެ.