އެސްޓީއޯއިން އިންޑިޔާގެ ކުންފުންޏަކުން ބޭސް ގެނައުމަށް އެއްބަސްވުމެއްގައި ސޮއިކުރަމުގެ މަސައްކަތް ކުރަމުންދާކަން ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)އިން ދޮގުކޮށްފިއެވެ.

އެސްޓީއޯއިން މިކަން ދޮގުކޮށްފައި މިވަނީ އިންތިޚާބީ ރައީސް އޮފީހުގެ ތަރުޖަމާނު މުހައްމަދު ފިރުޒުލް ހޮނިހިރު ދުވަހު ބޭއްވެވި ނޫސްވެރިންގެ ބައްދަލުވުމުގައި، އެސްޓީއޯއިން އިންޑިޔާގެ ކުންފުންޏަކުން ބޭސް ގެނައުމަށް އެއްބަސްވުމެއްގައި ސޮއިކުރުމުގެ މަސައްކަތް ކުރަމުންދާކަމަށް ވިދާޅުވެ، އެ މަސައްކަތް މަޑުޖައްސާލަން އިންތިޚާބީ ރައީސް ޑރ. މުހައްމަދު މުއިއްޒު ވިދާޅުވިކަމަށް ވިދާޅުވުމާ ގުޅިގެންނެވެ.

އެކަމާ ގުޅިގެން އެސްޓީއޯއިން މީޑިޔާތަކަށް ފޮނުވި މެސެޖެއްގައި ބުނީ އެކުންފުނިން މި ވަގުތު އެފަދަ އެއްބަސްވުމެއްގައި ސޮއިކުރަން މަސައްކަތް ނުކުރާކަމަށާއި އަދި އެފަދަ ކަމެއް ހުއްޓާލުމަށް އެއްވެސް ފަރާތަކުން އެ ކުންފުންޏަށް އަދި އަންގާފައި ނުވާކަމަށެވެ.

މިކަމާ ގުޅޭގޮތުން، ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ފިރުޒުލް ވިދާޅުވީ އިންޑިޔާގެ ކުންފުންޏަކާއެކު އެސްޓީއޯއިން ބޭސް ގެނައުމަށް ވަމުންދާ އެއްބަސްވުމުގެ މަސައްކަތް މަޑު ޖައްސާލަން އިންތިޚާބީ ރައީސް އެދިވަޑައިގެންނެވީ މި މަރުހަލާގައި އެ މަސައްކަތް "އެގޮތަށް ކުރިއަށް ނުގެންދިޔުމަށް" ކަމަށެވެ.

އެހެން ނަމަވެސް އެ މަސައްކަތް މަޑުޖައްސާލަން ޑރ. މުއިއްޒު އެންގެވީ ކޮން ސަބަބަކާހުރެ ކަމެއް ފިރުޒުލް ވިދާޅެއްނުވެއެވެ. އަދި މި ދުވަސްވަރު އެ މަސައްކަތް ކުރިއަށް ގެންގޮސްފައިވާގޮތުގެ މައުލޫމާތުވެސް ފިރުޒުލް ދެއްވާފައެއްނުވެއެވެ.