އުރީދޫ ނޭޝަންސް ގޭމާސް ލޭންޑް ފެސްޓިވަލް ފަށައިފި
މި ފެސްޓިވަލް ކުރިއަށްދާނީ ހޮނިހިރު ދުވަހުގެ ނިޔަލަށް
އުރީދޫ ގޭމިންގ ފެސްޓިވަލްގެ ބައިވެރިންތަކެއް
ރާއްޖޭގައި ބާއްވާ އެންމެ ބޮޑު ގޭމިން ފެސްޓިވަލް "އުރީދޫ ނޭޝަން ގޭމާސް ލޭންޑް" ފަށައިފިއެވެ.
ބުރާސްފަތި ދުވަހުގެ ރޭ ފެށި މި ފެސްޓިވަލް މި މަހުގެ 21 ވަނަ ދުވަހާ ހަމައަށް ކުރިއަށްދާނެއެވެ. ގޭމާސް ލޭންޑަކީ މި ހަފުތާ ބަންދުގައި ގޭމިންއަށް ޝައުގުވެރިވާ ހުރިހާ ފަރާތްތަކަށް އުފާވެރި ގޭމިންގ ތަޖުރިބާއެއް ކުރެވިގެންދާނެ ފެސްޓިވަލެއް ކަމަށް އުރީދޫއިން ބުންޏެވެ.
ގޭމާސް ލޭންޑްގެ ހަރަކާތްތަކުގެ ތެރޭގައި ބުރާސްފަތި ދުވަހު ވަނީ ޕަބްޖީ މޮބައިލް ޗެމްޕިއަންޝިޕާއި އީއޭއެފްސީ ފޭސް އޮފް، ޓެކްކެން މުބާރާތް ފަށައިފައެވެ. އަދި ރޭސިން ސިމިއުލޭޓާ މުބާރާތް ވެސް ފަށާފައިވަނީ ބުރާސްފަތި ދުވަހުއެވެ. ހުކުރު ދުވަހު ވެސް 100ކޭ ޕަބްޖީ މޮބައިލް ޗެމްޕިއަންޝިޕާއި، އީއޭއެފްސީ ފޭސް އޮފް އާއި، ޓެކްކެން މުބާރާތާއި ރޭސިން ސިމިއުލޭޓާ މުބާރާތުގެ މެޗުތައް ކުރިއަށްދާނެއެވެ.
މީގެ އިތުރުން ހޮނިހިރު ދުވަހު މި މުބާރާތްތަކުގެ މެޗުތަކުގެ އިތުރުން ކޮސްޕްލޭ ޝޯޑައުންއާއި ނިންމުމުގެ ރަސްމިއްޔާތު ބޭއްވުމަށް ވަނީ ތާވަލު ކޮށްފައެވެ.
މި މުބާރާތްތަކުގައި ރެޖިސްޓަރ ވެގެން ވާދަކުރާ ގޭމަރުންގެ އިތުރުން ގޭމާސް ލޭންޑަށް ޒިޔާރާތް ކުރާ ފަރާތްތަކަށްވެސް ބައިވެރިވެވޭނެ ހަރަކާތްތައް ވަނީ ހިމަނާފައެވެ. އޭގެތެރޭގައި ވީއާރް އެކްސްޕީރިއަންސް ސެންޓަރާއި ކްލޯމެޝިނާއި ފުޑްސްޓޯލްތައް ހިމެނެއެވެ،
ވީއާރު އެކްސްޕީރިއަންސްގައި އޮކިއުލަސް ސްޓޭޝަންގައި ވާޗުއަލް ރިއަލިޓީގެ ދުނިޔެއަކަށް ޒިޔާރަތްކޮށް ތަފާތު ގޭމްތައް ކުޅުވޭނެއެވެ. ފަސް މިނެޓަށް އެންމެ 25 ރުފިޔާ އަދި 10 މިނެޓަށް 40 ރުފިޔާއަށް، އޮކިއުލަސް ގެ ގޭމުތައް ތަޖުރިބާކޮށްލެވޭނެ ކަމަށް އުރީދޫއިން ބުނެއެވެ. ކްލޯ މެޝިން ކުޅެން ބޭނުންވާ ފަރާތްތަކަށް އެންމެ 20 ރުފިޔާއަށް ކްލޯ ކޮއިން އެއް ލިބޭއިރު ކްލޯ މެޝިނުން އަގުހުރި އިނާމު ހޯދުމުގެ ފުރުސަތު ލިބިގެންދާނެ ކަމަށް އުރީދޫއިން ބުންޏެވެ.
މި ގޭމިންގް ފެސްޓިވަލް ގައި ބައިވެރިވުމަށް އުރީދޫ ނޭޝަން އިން ހުރިހާ ގޭމަރުންނަށާއި ގޭމު ކުޅުމަށް ޝައުގުވެރިކަން ހުންނަ ހުރިހާ ފަރާތްތަކަށް ދައުވަތު އަރުވައެވެ.
