މިސްރުގެ ރައީސް އަބްދުލް ފައްތާހު އަލް ސީސީ އާއި އެމެރިކާގެ ރައީސް ޖޯ ބައިޑަން ފޯނުން ގުޅުއްވައި ޣައްޒާއަށް އިންސާނީ އެހީ "ދެމެހެއްޓެނިވި ގޮތެއްގައި" ގެނައުމަށް އެއްބަސްވެވަޑައިގެންފައިވާ ކަމަށް މިސްރުގެ ރައީސް ބުދަ ދުވަހުގެ ރޭ ނެރުއްވި ބަޔާނެއްގައި ވިދާޅުވެފައިވެ އެވެ.

މިސްރުގެ ރައީސްގެ ތަރުޖަމާނު ވެސް ވިދާޅުވީ އދގެ ބެލުމުގެ ދަށުގައި ވާ ބައިނަލްއަގްވާމީ އިންސާނީ އެހީދޭ ޖަމާއަތްތަކާ ގުޅިގެން އެހީ ގެނައުމަށް ދެ ގައުމުން މަސައްކަތް ކުރަމުން އަންނަ ކަމަށެވެ.

ޣައްޒާއަށް އިންސާނީ އެހީ ގެނައުމުގެ ފުރުސަތު ދީފައި މިވަނީ އިސްރާއީލާއި ފަލަސްތީނުގެ ހަމާސްއާ ދެމެދު ހިނގަމުންދާ ހަނގުރާމަހުއްޓާލުމަށް ގޮވާލާ އދ.ގެ ސަލާމަތީ މަޖިލީހުގެ ގަރާރު އެމެރިކާއިން ވީޓޯކުރިތާ ގަޑިއިރުތަކެއް ފަހުންނެވެ.

ބްރެޒިލް އިން ޑްރާފްޓް ކޮށްފައިވާ ލިޔުމަށް އދ.ގެ ސަލާމަތީ މަޖިލީހުގައި ވޯޓަށް އެހުން ދެ ފަހަރެއްގެ މަތިން ލަސްވީ އެމެރިކާއިން ޣައްޒާއަށް އެހީ ގެނައުމަށް މަސައްކަތް ކުރަމުން ދަނިކޮށެވެ. ބުދަ ދުވަހު ޑްރާފްޓް ލިޔުމަށް ތާއީދުކޮށް 12 މެމްބަރަކު ވޯޓު ދެއްވިއިރު، ރަޝިއާ އާއި އިނގިރޭސިވިލާތުން ވޯޓު ނުދެއެވެ.

އޮކްޓޯބަރު މަހުގެ 7 ވަނަ ދުވަހު ހަމާސް އިން ދިން ކުއްލި ހަމަލާގެ ބަދަލު ހިފުމުގެ ގޮތުން އިތުރު ހަމަލާތަކެއް ދިނުމަށް، އިސްރާއީލުން މިދިޔަ ހަފުތާގައި ވަނީ ޣައްޒާގެ 1.1 މިލިއަން މީހުން ދެކުނުގެ ސަރަހައްދުތައް ދޫކޮށް ދިއުމަށް އަންގާފައެވެ. އަދި ގިނަ އަދަދެއްގެ ބަޔަކު ދަތުރު ކުރަމުން ދަނިކޮށް ވަނީ ވަރުގަދަ ހަމަލާތަކެއްދީ ގިނަބަޔަކު ޝަހީދު ކޮށްލާފައެވެ. މިގޮތުން ޣައްޒާ މުޅިން ވަށާލައި ވަރުގަދަ ބޮމުގެ ހަމަލާތަކެއް ދީ، 3،000 އަށް ވުރެ ގިނަ މީހުން ޝަހީދުކޮށް، 12،000 އަށް ވުރެ ގިނަ މީހުން ޒަހަމްކޮށްލާފައެވެ. އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ.

ޣައްޒާގެ ހޮސްޕިޓަލެއްގެ ކޮމްޕައުންޑަކަށް އަންގާރަ ދުވަހުގެ ރޭ ދިން ހަމަލާގައި 471 މީހުން މަރުވެފައިވާ ކަމަށް އެ ގައުމުގެ ސިއްހީ އޮފިޝަލުން ބުނެއެވެ. މިއީ ޣައްޒާއަށް މިހާތަނަށް ދިން އެންމެ ނުރައްކާތެރި ހަމަލާއެވެ.

މި ހަމަލާގެ ފަހަތުގައި ވަނީ އިސްރާއީލު ކަމަށް ޣައްޒާގައި ދިރިއުޅޭ ފަލަސްތީނު މީހުން ތުހުމަތު ކުރެ އެވެ. ނަމަވެސް އިސްރާއީލުން ބުނަމުން ދަނީ އިސްލާމިކް ޖިހާދު ޖަމާއަތުން ދިން ނާކާމިޔާބު ރޮކެޓް ހަމަލާއެއް އެ ހޮސްޕިޓަލަށް އަރާފައިވާ ކަމަށެވެ.

ނަމަވެސް ފަލަސްތީނުގެ ޖަމާއަތްތަކުން މިހާތަނަށް ފޮނުވާލި އެއްވެސް ރޮކެޓަކުން އެފަދަ ނުރައްކާތެރި އަސަރެއް ކޮށްފައި ނުވާއިރު އިސްލާމިކް ޖިހާދާއި ހަމާސް އިން ވެސް ވަނީ އިސްރާއީލުގެ ވާހަކަތަކަކީ ދޮގެއް ކަމަށް ސިފަކޮށްފަ އެވެ.

އަހްލީ އަރަބް ހޮސްޕިޓަލުގައި ހިނގި ކުރިމަތިލުންތަކުގެ ބިރުވެރިކަމާއި، އަވަސް ރައްދުގެ ސަބަބުން އެމެރިކާގެ ރައީސް ޖޯ ބައިޑަން މެދުއިރުމައްޗަށް ކުރައްވަމުން ގެންދަވާ ދަތުރުފުޅަށް ހިޔަނި އެޅޭނެ ކަމުގެ ބިރު ވަނީ ހީވެފަ އެވެ.

ބައިޑަން ބުދަ ދުވަހު އިޒްރޭލަށް ވަޑައިގެން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާ ބައްދަލުކުރެއްވި ނަމަވެސް، އަރަބި އިސްލާމީ އެއްވެސް ގައުމެއްގެ ލީޑަރަކާ ބައްދަލުކުރެއްވި ފައެއް ނުވެއެވެ.

ބައިޑަން އަށް ފަހު އިގިރޭސި ބޮޑުވަޒީރު ރިޝީ ސުނާކްވެސް ބުރާސްފަތިދުވަހު ވަނީ އިސްރާއީލަށް ކުރައްވާ ދަތުރުފުޅެއް ފައްޓަވާފައެވެ.