ފަލަސްތީނުގެ މައްސަލައަށް އަވަސް ހައްލެއް ހޯދައިދިނުމަށް އޯއައިސީގެ ބައްދަލުވުމުގައި ރާއްޖެއިން ގޮވާލައިފި
ސަރަހައްދީ ހަމަޖެހުން އޮތީ މިނިވަން ފަލަސްތީނުގެ ދައުލަތެއް ގާއިމުކުރެވިގެން
ޣައްޒާގެ ހޮސްޕިޓަލެއް ގޮއްވާލައި، އެތައް ސަތޭކަ ބަޔަކު މަރުވުން
ފަލަސްތީނުގެ މައްސަލައަށް އަވަސް ހައްލެއް ހޯދައިދިނުމަށް އޮގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ ބައްދަލުވުމުގައި ރާއްޖެއިން ގޮވާލައިފިއެވެ.
ދިވެހި ރާއްޖެއިން މިގޮތަށް ގޮވާލީ އިސްރާއީލުން ފަލަސްތީނުގެ ރައްޔިތުންނާ ދެކޮޅަށް މިހާރު ދެމުންދާ އުދުވާނީ ހަމަލާތަކާ ގުޅޭގޮތުން ސައޫދީ އަރަބިއްޔާގެ ޖިއްދާގައި ހުންނަ އޯއައިސީގެ މައި މަރުކަޒުގައި ބޭއްވި އެ ޖަމިއްޔާގެ އެގްޒެކެޓިވް ކޮމިޓީގެ އޯޕަން-އެންޑެޑް ޚާއްސަ ބައްދަލުވުމުގައެވެ. މި ބައްދަލުވުމުގައި ދިވެހިރާއްޖޭގެ ފަރާތުން މިނިސްޓަރ އޮފް ސްޓޭޓް ފޯ ފޮރިން އެފެއާޒް، އަހުމަދު ޚަލީލް ވަނީ ތަގުރީރު ކުރައްވާފައެވެ.
ޚަލީލްގެ ތަގުރީރުގައި ވަނީ ޣައްޒާގައި ދިރިއުޅޭ އާއްމު ރައްޔިތުންނާ ދެކޮޅަށް އިސްރާއީލުން ދެމުންގެންދާ އުދުވާނީ ހަމަލާތައް އެންމެ ހަރުކަށި ޢިބާރާތުން ކުށްވެރި ކުރައްވާފައެވެ. އަދި ބޭހާއި ކާބޯތަކެއްޗާއި ޒަރޫރީ ތަކެތި ޣައްޒާއަށް ފޯރުކޮށްދިނުން ކަށަވަރުކުރުމަށްޓަކައި އިންސާނިއްޔަތުކަމުގެ ކޮރިޑޯތަކެއް ގާއިމުކުރުމަށް އެއްބާރުލުން ދިނުމަށްވެސް ގޮވާލެއްވިއެވެ.
ފަލަސްތީނުގެ ބިންތަކަށް އިސްރާއީލުން ވެރިވެގެންފައިވަނީ ބައިނަލްއަގުވާމީ ގާނޫނުތަކާއި އދ.ގެ ސަލާމަތީ މަޖިލީހާއި އޯއައިސީގެ ގަރާރުތަކާ ޚިލާފަށްކަން ފާހަގަކޮށް، އިސްރާއީލުން ވެރިވެގެންފައިވާ ބިންތަކުން އެއްކޮށް ފައިބައިގެން ދިއުމަށްވެސް ރާއްޖޭގެ ފަރާތުން ވަނީ ގޮވާލާފައެވެ. އަދި، ސަރަހައްދުގެ އަމާންކަމާއި ހަމަޖެހުން ކަށަވަރުކުރެވެން އޮތް ހަމައެކަނި މަގަކީ 1967ވަނަ އަހަރުގެ ކުރީގެ ބޯޑަރުގެ މައްޗަށް އެކުލެވިފައިވާ، އިރުމަތީ ގުދުސް، ވެރިރަށެއްގެ ގޮތުގައި ކަނޑައެޅިފައިވާ، މުސްތަގިއްލު، މިނިވަން ފަލަސްތީނުގެ ދައުލަތެއް ގާއިމުކުރެވިގެން ކަން ވެސް ފާހަގަކުރެއްވިއެވެ.
މިބައްދަލުވުމުގައި ސްޓޭޓް މިނިސްޓަރ ޚަލީލްގެ އަރިހުގައި ރާއްޖޭގެ ވަފުދުގައި ބައިވެރިވެވަޑައިގެންނެވީ ދިވެހިރާއްޖެއިން އޯއައިސީއަށް ކަނޑައަޅުއްވާފައި ހުންނަވާ ދާއިމީ މަންދޫބު، އަދި ދިވެހިރާއްޖެއިން ސައޫދީ އަރަބިއްޔާއަށް ކަނޑައަޅުއްވާފައި ހުންނަވާ ސަފީރު މުހައްމަދު ޚަލީލާއި ޖިއްދާގައި ހުންނަ ދިވެހިރާއްޖޭގެ ކޮންސިއުލޭޓްގެ ފަސްޓް ސެކްރެޓަރީ މުހައްމަދު ރަމީޒާއި މިނިސްޓްރީ އޮފް ފޮރިން އެފެއާޒްގެ ޗީފް ޖެނެރަލް ސަރވިސް އޮފިސަރު އާއިޝަތު ރިފްގާ މުހައްމަދެވެ.
57 މެމްބަރު ގައުމުގެ މައްޗަށް އެކުލެވޭ އޯއައިސީން އަންނަނީ ފަލަސްތީނުގެ ރައްޔިތުންގެ ހައްގުތައް ކަށަވަރުކުރުމަށްޓަކައި އެބައިމީހުންގެ ފަރާތުން ވަކާލާތު ކުރަމުންނެވެ. ދިވެހިރާއްޖެއިން އަންނަނީ 1976ވަނަ އަހަރު އޯއައިސީގެ މެމްބަރަކަށް ވީއްސުރެ، ހަރަކާތްތެރިކަމާއެކު އެ ޖަމިއްޔާގައި މަސައްކަތްކުރަމުންނެވެ.
އިސްރާއީލުން ފަލަސްތީނަށް ދެމުން އަންނަ ހަމަލާތަކުގައި 3500ށްވުރެ ގިނަ މީހުން ވަނީ ޝަހީދުވެފައެވެ. މީގެ ތެރޭގައި ގިނައީ ކުޑަކުދިންނާއި އަންހެނުންނެވެ.
