ދިވެހިން ފަލަސްތީނާއެކު ތިބިކަން އަންގައިދިނުމަށް ހުކުރު ދުވަހު މާލޭގައި ބޮޑު ރެލީއެއް ބާއްވަނީ
މި ރެލީ އަކީ 2014 ވަަނަ އަހަރު ފަލަސްތީނުގެ ހައްގުގައި އޮތް ބޮޑު ރެލީގައި ހަރަކާތްތެރިވި ޒުވާނުންގެ ގްރޫޕަކުން އިސްނަގައިގެން ބާއްވާ ރެލީއެއް
ދިވެހިން ފަލަސްތީނާއެކު
ދިވެހިން ފަލަސްތީނާއެކު ތިބިކަން އަންގައިދިނުމަށް ހުކުރު ދުވަހު މާލޭގައި ބޮޑު ރެލީއެއް ބާއްވަން ނިންމައިފިއެވެ.
ބުދަ ދުވަހުގެ ރޭ ރާއްޖެޓީވީގެ "ފަލަސުރުޚީ" ޕްރާގްރާމްގައި ވާހަކަފުޅުދައްކަވަމުން އިންޓަރނޭޝަނަލް އެއިޑް ކެމްޕެއިން (އައިއޭސީ) ގެ ޖެނެރަލް ސެކެޓްރީ އިބްރާހިމް ޝާޒް ވިދާޅުވީ، އިސްރާއީލުން ފަލަސްތީނުގެ ޣައްޒާއަށް ދެމުންގެންދާ ލާއިންސާނީ ހަމަލާތަކާއި ގުޅިގެން ހުކުރު ދުވަހު މާލޭގައި ރެލީއެއް ބޭއްވުމަށް ހަމަޖެހިފައިވާކަމަށެވެ.
އެގޮތުން ޝާޒް ވިދާޅުވީ، މި ރެލީ އަކީ 2014 ވަަނަ އަހަރު ފަލަސްތީނުގެ ހައްގުގައި އޮތް ބޮޑު ރެލީގައި ހަރަކާތްތެރިވި ޒުވާނުންގެ ގްރޫޕަކުން އިސްނަގައިގެން ބާއްވަން ހަމަޖެހިފައިވާ ރެލީއެއްކަމަށެވެ. އަދި މި ރެލީ ކުރިއަށް ދާނީ ހުކުރު ދުވަހު ގެ ހަވީރު ރަސްފަންނުން ފެށިގެން އާޓިފިޝަލް ބީޗް ސަރަހައްދަކަމަށް ޝާޒް ވަނީ ފާހަގަކުރައްވާފައެވެ. މީގެއިތުރުން ޝާޒް ވިދާޅުވީ، ހުކުރު ދުވަހު މާލެ އަދި ހުޅުމާލޭގައިވެސް ފަންޑްރައިޒިންގ އިވެންޓްތައް ކުރިއަށްދާނެކަމަށެވެ.
ޝާޒް އިތުރަށް ވިދާޅުވީ، މިވަގުތު ހަމައެކަނި ޣައްޒާއަށް ބޭނުންވަނީ ފައިސާގެ އެހީ ނޫންކަމަށާއި، އެމީހުންގެ ހައްގުގައި އަޑު އުފުލާ އިންޓަނޭޝަނަލް ކޮމިއުނިޓީއަށް ޕްރެޝަރ ކުރަންޖެހޭކަމަށެވެ.
ޝާޒް ވަނީ ވީހާވެސް ގިނަ ފަރާތްތަކުން މި ހަރަކާތުގައި ބައިވެރިވެ އަޑު އުފުލުމަށް ގޮވާލާފައެވެ.
ދިވެހިން ފަލަސްތީނާއެކު ތިބިކަން އަންގައިދިނުމަށް "ދިވެހިންގެ ބޮޑު އެއްވުން" މި ނަމުގައި މިދިޔަ ހުކުރު ދުވަހުގެ ހަވީރުވެސް އާޓިފިޝަލް ބީޗް ސަރަހައްދުގައި ވަނީ އެއްވުމެއް ބާއްވާފައެވެ. މާލެ ސަރަހައްދުގެ މި އެއްވުމުގައި ގިނަ އަދަދެއްގެ އާންމުން ވަނީ ބައިވެރިވެފައެވެ. އަދި ސަރުކާރުގެ އެކި ވުޒާރާތަކުގެ މިނިސްޓަރުންނާއި އިސްވެރިންވެސް ބައިވެރިވެފައިވެއެވެ.
