ޑިމޮކްރެޓްސްގެ ހުށަހެޅުމާ ޚިލާފަށް، ނަޝީދުގެ އިތުބާރު ނެތްކަމުގެ މައްސަލައިގެ ބަހުސް ކުރިއަށްދާނީ 2 ގަޑިއިރަށް

ދަ ޑިމޮކްރެޓްސް އިން ހުށަހެޅި ހުށަހެޅުންތަކާ ހިލާފަށް، ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލައިގެ ބަހުސް 2 ގަޑިއިރަށް ކުރިއަށް ގެންދިޔުމަށް މަޖިލީހުގެ އާންމު ކޮމެޓީ އިން ނިންމައިފި އެވެ.

މިއަދު ބޭއްވި މަޖިލީހުގެ 11 ވަނަ އާންމު ކޮމެޓީގައި ނަޝީދުގެ މައްސަލައިގެ ބަހުސް ކުރިއަށް ގެންދިޔުމުގައި ވަގުތު ކަނޑައެޅުމަށް ދެ ހުށަހެޅުމެއް ހުށަހެޅި އެވެ. އެގޮތުން ހުށަހެޅުން ހުށަހެޅުއްވީ ފުނަދޫ ދާއިރާގެ މެމްބަރު މުހައްމަދު ޝާހިދު އަދި ހެންވޭރު މެދު ދާއިރާގެ މެމްބަރު އަލީ އާޒިމް އެވެ. އެގޮތުން ފުނަދޫ ދާއިރާގެ މެމްބަރު އަދި އެ ކޮމެޓީގެ މުޤައްރިރުގެ ނައިބު މުހައްމަދު ޝާހިދު ހުށަހެޅުއްވި ހުށަހެޅުމަށް ކޮމެޓީގައި އެ ވަގުތު ތިއްބެވި 6 މެމްބަރުންގެ ތެރެއިން 4 މެމްބަރުން އެއްކޮޅަށް ވޯޓު ދެއްވި އިރު، 2 މެމްބަރަކު އެ ހުށަހެޅުމަށް ދެކޮޅު ހެއްދެވި އެވެ.

Advertisement

ޝާހިދު ހުށަހެޅުއްވީ އެ މައްސަލައިގެ 2 ގަޑިއިރަށް ކުރިއަށް ގެންދިޔުމަށެވެ. އެއީ:

ޝާހިދު އެފަދައިން ހުށަހެޅުއްވުމާއެކު މަޖިލީހުގެ މައިނޯރިޓީ ލީޑަރު އަދި ހެންވޭރު މެދު ދާއިރާގެ މެމްބަރު އަލީ އާޒިމް ވަނީ ބަހުސުގައި ޖަވާބުދާރީ ވުމަށް ނަޝީދަށް 3 ގަޑިއިރު ދެއްވުމަށް އެދިވަޑައިގެންފަ އެވެ.

މިއާއެކު ޝާހިދު ވަނީ މަޖިލީހުގައި މީގެ ކުރީގައި ވެސް 3 ގަޑިއިރަށް ވުރެ ދިގުނުވާ ގޮތަކަށް މަޖިލިސް ރައީސްގެ އިތުބާރު ނެތްކަމުގެ މައްސަލައިގެ ބަހުސް ކުރިއަށް ގެންގޮސްފައިވާކަން ފާހަގަ ކުރައްވާފަ އެވެ. އެހެން ނަމަވެސް ޝާހިދު ވިދާޅުވީ މި ފަހަރު އެހެން ހުށަހެޅުމުގެ ބޭނުމަކީ 2 ގަޑިއިރަށް ބަހުސް ކުރު ކުރުން ކަމަށެވެ.

ޝާހިދު އެހެން ވިދާޅުވުމާއެކު އާޒިމް ވަނީ ކުރިން އެފަދައިން ކަން ހިނގިކަމަށް ވީ ނަމަވެސް، އެ ފުރުސަތު ދެއްވުމަށް ކޮމެޓީގެ ކިބައިން އެދިވަޑައިގަންނަވައިފަ އެވެ.

އާޒިމް އެހެން ވިދާޅުވުމުން ފުރުސަތު ނަންގަވައި ހުޅުދޫ ދާއިރާގެ މެންބަރު އިލްޔާސް ލަބީބު ވެސް ވަނީ އާޒިމްގެ ވާހަކަތަކަށް ތާއީދު ކުރައްވާފަ އެވެ. އެގޮތުން އިލްޔާސް ވިދާޅުވީ މަޖިލީހުގެ ގަވާއިދުގެ 205 ވަނަ މާއްދާގެ (ޅ) ދަށުން 3 ގަޑިއިރަށް ވުރެ ދިގު ނޫން ގޮތަކަށް ބަހުސް ކުރިއަށް ގެންދެވޭނެ ކަމަށާއި، އެ މައްސަލަ ރައްދުވާ ފަރާތަށް ޖަވާބުދާރީ ވުމަށް ގަވާއިދުގައި ވަކި ވަގުތެއް ބަޔާން ކޮށްފައި ނުވާ ކަމަށެވެ.

އެހެން ކަމުން ބަހުސްގެ ފުރުސަތު އާޒިމް އެދިވަޑައިގެންނެވި ފަދައިން ދެއްވުމަށް އިލްޔާސް ވެސް ކޮމެޓީގައި އެދިވަޑައިގެންނެވި އެވެ.

އިލްޔާސް އެފަދައިން ވިދާޅުވުމުން ފޮނަދޫ ދާއިރާގެ މެމްބަރު މުހައްމަދު ޝާހިދު އަނެއްކާ ވެސް ވިދާޅުވީ މަޖިލީހުގައި މީގެ ކުރިން ވެސް މަޖިލިސް ރައީސްގެ މައްސަލަތަކުގައި އަމަލު ކުރަމުން އައީ އެ "އައިޓަމަށް" 2 ގަޑިއިރުގެ ވަގުތު ދެއްވަމުން ކަމަށެވެ. އެހެން ކަމުން އެފަދައިން ކުރިއަށް ގެންދިޔުމުގެ އިއުތިރާޒެއް ނެތް ކަމަށް ޝާހިދު ވިދާޅުވި އެވެ. އަދި ޝާހިދު އިތުރަށް ވިދާޅުވީ މަޖިލިސް ގަވާއިދުގައި 3 ގަޑިއިރު ކަމަށް ބަޔާންކޮށްފައިވުމުގެ މާނައަކީ 3 ގަޑިއިރަށް ވުރެ ދިގުނޫން ގޮތަކަށް އެ ބަހުސް ކުރިއަށް ގެންދިޔުމުގެ ބާރު އާންމު ކޮމެޓީއަށް ލިބިފައިވުން ކަމަށެވެ.

ޝާހިދުގެ ވާހަކަތަކަށް ތާއީދު ކުރައްވަމުން މަޖިލީހުގެ އަލިފުށީ ދާއިރާގެ މެންބަރު މުހައްމަދު ރަޝީދު ހުސައިން ވިދާޅުވީ މަޖިލީހުގެ ގަވާއިދުގައި ބަޔާންކޮށްފައިވާ 3 ގަޑިއިރުގެ މާނައެއް ކަމުގައި މަޖިލީހުން ނިމިދިޔަ 10 އަހަރު ވެސް ބަލަމުން އައީ އެ 3 ގަޑިއިރުގެ ތެރޭގައި މައްސަލަ ރައްދުވާ ފަރާތަށް ޖަވާބުދާރީ ވުމާއި އަދި މުޅި ބަހުސާ އެއްކޮށް ވެސް ހިމެނޭ ކަމަށެވެ. އެހެންކަމުން މަޖިލީހުން އަމަލު ކުރަމުން އައި ގޮތާ ހިލާފަށް، އަސްލު އޮޅޭ ފަދަ ގޮތަކަށް އަމަލު ކުރެއްވުން ބަލައި ނުގަނެވޭނެ ކަމަށް ހުސެއިން ވިދާޅުވި އެވެ.

ހުސެއިންގެ ފަހުން ވެސް އާޒިމް ވަނީ އެ ފުރުސަތު 3 ގަޑިއިރަށް ނުދެއްވަން އެމްޑީޕީގެ މެމްބަރުން ބޭނުންފުޅު ނުވަނީ ކީއްވެތޯ ތަކުރާރުކޮށް ސުވާލުކުރައްވާފަ އެވެ. އެގޮތުން އެ ސުވާލު ކުރައްވަމުން އާޒިމް ވަނީ އެމްޑީޕީ މިއަދު ހަލާކުވުމުގެ އެންމެ މައިގަނޑު ސަބަބަކީ ވެސް ބާރުގެ ބޭނުން ނަހަމަ ގޮތުގައި ހިފުން ކަމުގައި ވިދާޅުވެފަ އެވެ.

އާޒިމް އެފަދައިން ވިދާޅުވުމުން އެ ކޮމެޓީގެ މުގައްރިރު ކުރެންދޫ ދާއިރާގެ މެމްބަރު ޢަބްދުލްޣަނީ ޢަބްދުލްޙަކީމް ވެސް ވަނީ މަޖިލީހުގެ ގަވާއިދުގެ 205 ވަނަ މާއްދާގެ (ޅ) ގައި ބަޔާންކޮށްފައި އޮތް އޮތުމުން ދޭހަވަނީ މައްސަލަ ރައްދުވާ ފަރާތަށް ޖަވާބުދާރީ ވުމާއި އަދި މުޅި ބަހުސާ އެއްކޮށް ކަމަށް ވިދާޅުވެފަ އެވެ. އެއީ މަޖިލީހުން މީގެ ކުރިން ވެސް އަމަލު ކުރަމުން އައީ އެފަދައިން ކަމަށް ވުމުން ކަމަށް ވެސް އޭނާ ވިދާޅުވި އެވެ.