އިސްލާމިކް ޔުނިވަރސިޓީން ދެ ދާއިރާއަކުން ޕީއެޗްޑީ ހާސިލް ކުރަން ސްކޮލަރޝިޕް ފުރުސަތު
17 އޮކްޓޯބަރު 2023 | އަންގާރަ 00:18މި ސްކޮލަރޝިޕްގެ ދަށުން ކިޔަވާ ކޯހަކީ ފުލްޓައިމް ކޯހަކަށްވާން ޖެހޭ
ދިވެހިރާއްޖޭގެ އިސްލާމީ ޔުނިވަރސިޓީގެ ދަސްވެނިވުމުގެ ޙަފުލާ 2023
އިސްލާމިކް ޔުނިވަރސިޓީ އޮފް މޯލްޑިވްސް (އައިޔޫއެމް) އިން ދެ ދާއިރާއަކުން ޕީއެޗްޑީ ކިޔެވުމަށް ސްކޮލަރޝިޕް ފުރުސަތު ހުޅުވާލައިފިއެވެ.
އައިޔޫއެމުން ބުނެފައިވާ ގޮތުގައި އެ ޔުނިވަރސިޓީން ސްކޮލަރޝިޕް ފުރުސަތު ހުޅުވާލާފައިވަނީ ހިއުމަން ސައިންނާއި އިކޮނޮމިކްސް އެންޑް ފައިނޭންސް ދާއިރާއިންނެވެ. އެގޮތުން، 12 ޤައުމެއްގެ އެމްކިޔުއޭއިން ގަބޫލުކުރާ ޔުނިވަރސިޓީއެއްގައި ތައުލީމު ހާސިލް ކުރުމުގެ ފުރުސަތު ސްކޮލަރޝިޕް ހާސިލް ކުރާ ދަރިވަރުންނަށް ލިބޭނެއެވެ. މި ޤައުމުތަކުގެ ތެރޭގައި ހިމެނެނީ ރާއްޖެ އާއި އިންޑިއާ، ޕާކިސްތާން، މެލޭޝިއާ، ބަންގްލަދޭޝް، ސިންގަޕޯރ، ސްރީލަންކާ، ތައިލެންޑް، ނޭޕާލް، ބޫޓާން، ބުރުނާއި އަދި އިންޑޮނޭޝިއާއެވެ.
މި ސްކޮލަރޝިޕްގެ ދަށުން ކިޔަވާ ކޯހަކީ ފުލްޓައިމް ކޯހަކަށްވާން ޖެހޭނެ ކަމަށް ވެސް އައިޔޫއެމުން ވަނީ ބުނެފައެވެ.
މި ސްކޮލަރޝިޕަށް އެދޭ ފަރާތްތަކުން އޮފަރ ލެޓާ އާއި އެހެނިހެން ލިޔެކިޔުންތައް އަންނަ ނޮވެމްބަރު މަހުގެ 9 ވަނަ ދުވަހުގެ މެންދުރު 2:00 ގެ ކުރިން އައިޔޫއެމްގެ އެޗްއާރު މެއިލްއަށް އީމެއިލް ކުރުމަށް ވަނީ އެދިފައެވެ.
އައިޔޫއެމުން ދޭ މި ސްކޮލަރޝިޕްގެ ދަށުން ޓިއުޝަންފީއާއި، ޔުނިވަރސިޓީއަށް ދައްކަންޖެހޭ ފީތަކާއި ކޯސް ހިންގާ ޤައުމަށް ދެކޮޅު ޓިކެޓާއި އެސްޓަބްލިޝްމަންޓް އެލަވަންސް، ސްޓައިޕަންޑް އަދި ބުކް އެލަވެންސް ދޭނެއެވެ.
މި ސްކޮލަރޝިޕްގެ ދަށުން ކިޔަވާ ފަރާތްތަކުން، ކިޔަވާ ނިންމުމަށްފަހު 5 އަހަރުގެ މުއްދަތަށް ޔުނިވަރސިޓީއަށް ޚިދުމަތްކުރަންޖެހޭ ގޮތަށް ބޮންޑުކުރެވޭނެ ކަމަށް ވެސް އައިޔޫއެމުން ބުންޏެވެ.
