އިޒްރޭލާ ދެކޮޅަށް ހުށަހެޅި ކުއްލި މައްސަލައެއް އެޖެންޑާ ނުކުރަން ނިންމައި، ގަރާރު ކުރިއަށް ގެންދަނީ
ކުއްލި މައްސަލައަކަށް ބަހުސް ކުރެވެން އަންނަނީ އެޖެންޑާގައި އެމައްސަލަ ނުހިމެނޭ ކަމަށްވާނަމަ
މަޖިލީހުގެ ނައިބުރައީސް އީވާ އަބްދުﷲ
އިޒްރާއީލުން ފަލަސްތީނުގެ އެކި ސަރަހައްދުތަކަށް ދެމުންގެންދާ ނުރައްކާތެރި އުދުވާނީ ހަމަލާތަކާއި ގުޅިގެން ގަރާރެއް ހުށަހަޅާފައި ވަނިކޮށް، އެކަމާއި ގުޅޭގޮތުން ހުށަހެޅި ކުއްލި މައްސަލައެއް އެޖެންޑާ ނުކުރަން ރައްޔިތުންގެ މަޖިލީހުން ނިންމައިފިއެވެ.
ހޯމަ ދުވަހުގެ މަޖިލީހުގެ ރިޔާސަތުގައި އިންނެވީ މަޖިލީހުގެ ނައިބުރައީސް އީވާ އަބްދުﷲ އެވެ.
ކުއްލި މައްސަލައާ ގުޅޭގޮތުން އީވާ ވިދާޅުވީ މަޖިލީހުގެ ގަވާއިދު ޖާގަ ދެނީ ގަރާރާއިގެން ކުރިއަށްދިއުމަށް ކަމަށާއި، ކުއްލި މައްސަލައަކަށް ބަހުސް ކުރެވެން އަންނަނީ އެޖެންޑާގައި އެމައްސަލަ ނުހިމެނޭ ކަމަށްވާނަމަ ކަމަށެވެ.
ފަލަސްތީނުގެ މައްސަލާގައި ހުށަހެޅި ކުއްލި މައްސަލަ އެޖެންޑާ ނުކުރުމުން ކާށިދޫ ދާއިރާގެ މެންބަރު އަބްދުﷲ ޖާބިރު ވަނީ ކަންބޮޑުވުން ފާޅުކުރައްވައި ވާހަކަދައްކަވާފައެވެ.
ޖާބިރުގެ ވާހަކަތަކަށް ރައްދުދެއްވައި އީވާ ވިދާޅުވީ އިޒްރޭލާ ދެކޮޅު ގަރާރު ހޯމަ ދުވަހަށް އެޖެންޑާ ނުކޮށް ކުއްލި މައްސަލަ އެޖެންޑާކުރަން ގަރާރު ހުށަަހެޅުއްވި މެމްބަރަށާއި ކުއްލި މައްސަލަ ހުށަހެޅުއްވި މެމްބަަރަށް ރިޔާސަތުން ފުރުސަތު ދިން ކަމަށެވެ. ނަމަވެސް ގަރާރު ހުށަހެޅުއްވި މެމްބަރު އެދިވަޑައިގެންނެވީ ގަރާރު ހޯމަ ދުވަހަށް އެޖެންޑާ ކުރަން ކަމަށެވެ.
އީވާ ވިދާޅުވީ އަމަލުކުރާނީ މަޖިލީހުގެ ގަވާއިދާ އެއްގޮތަށް ކަމަށާއި، މެންބަރުން ހުށަހަޅުއްވާފައިވާ މައްސަލަތައް އެޖެންޑާކޮށްގެން ވަކި ގޮތަކަށް ކުރިއަށް ނުގެންދާނެ ކަމަށެވެ.
