އިސްރާއީލުން ޣައްޒާ ހިފުމަކީ ހެދޭނެ ބޮޑު ގޯހެއް - ބައިޑަން

ޣައްޒާއަށް އަރައިގަތުމަށް ޔަހޫދީ ހަރުކަށި ބޮޑުވަޒީރު ނަތަންޔާހޫގެ ސަރުކާރުން ތައްޔާރުވަމުންދާއިރު، އިސްރާއީލުން ޣައްޒާ ހިފުމަކީ "ބޮޑު ގޯހެއް" ކަމަށް ވިދާޅުވެ އެމެރިކާގެ ރައީސް ޖޯ ބައިޑަން އިންޒާރު ދެއްވައިފިއެވެ.

ސީބީއެސް ނިއުސްގެ 60 މިނެޓްސް އިން އާންމުކުރި ވީޑިއޯ ކްލިޕެއްގައި ބައިޑަން ވިދާޅުވީ ޣައްޒާއިން މީހުން ނުކުތުމުގެ އިތުރުން ކާބޯތަކެއްޗާއި ފެން ހިމެނޭ ގޮތަށް އިންސާނީ އެހީތައް ޣައްޒާއަށް ފޯރުކޮށްދިނުމުގެ ފުރުސަތު ލިބޭ އިންސާނީ ކޯރިޑޯއަކަށް ތާއީދު ކުރައްވާ ކަމަށެވެ.

އަދި އިސްރާއިލުން އަމަލު ކުރަން އުޅެނީ ހަނގުރާމައިގައި އަމަލުކުރާ އުސޫލުން ކަމަށް ވެސް ބައިޑަން ވިދާޅުވި އެވެ.

ސްކޮޓް ޕެލީގެ 60 މިނިޓްސް އަށް ދެއްވި އިންޓަރވިއުއެއްގައި ބައިޑަން ވިދާޅުވެފައިވަނީ ހަމާސް އިން "ފަލަސްތީނުގެ ހުރިހާ ރައްޔިތުން" ތަމްސީލުކުރާ ކަމަށް ގަބޫލު ނުކުރާ ކަމަށާއި އެ ޖަމާއަތް މުޅިން ނައްތާލެވޭތަން ދެކެން ބޭނުންވާ ކަމަށެވެ.

އިސްރާއިލުން ހުއްޓުމެއް ނެތި ޣައްޒާއަށް ބޮން އަޅަމުން އަންނަ އިރު، އދ ގެ ރިލީފް އެންޑް ވޯރކްސް އެޖެންސީ ފޮރ ޕަލެސްޓީނިއަން ރެފިއުޖީ (ޔޫއެންއާރުޑަބްލިއުއޭ) އިން ބުނެފައިވަނީ އިސްރާއިލުން އިސްރާއީލުގެ ރޭޑްތަކުގެ ސަބަބުން "ކުރިން ނުފެންނަ އިންސާނީ ކާރިސާއެއް" އުފެދިފައިވާ ކަމަށެވެ. މީގެ އިތުރުން އދ ގެ އިންސާނީ ހައްގުތަކާ ބެހޭ އޮފީހުން ވަނީ ކުރިއަށް އޮތް 24 ގަޑި އިރު ތެރޭގައި ޣައްޒާގެ ހޮސްޕިޓަލްތަކުން ރިޒަރވް ތެޔޮ ހުސްވެދާނެ ކަމަށް ވެސް އިންޒާރު ނެރެފައެވެ.

ޣައްޒާ ހުއްޓުމަކާ ހަމައަށް އައިސްފައިވާއިރު، ޔަހޫދީ އެތަކެއް ހާސް ސިފައިން ވަނީ ޣައްޒާގެ ބޯޑަރު ވަށާލާފައެވެ. އަދި އެއްގަމު މަގުން ކޮންމެ ވަގުތެއްގައި ވެސް ޣައްޒާއަށް އަރާފާނެކަމަށް މީޑިއާތަކުން ވަނީ ރިޕޯޓްކޮށްފައެވެ.