މަކިޓާ ޖޫނިއާ އެތްލެޓިކްސް ޗެންޕިއަންޝިޕް 2023 ކުޅުދުއްފުށީގައި ފަށައިފި

އެސްޓިއޯ މަކިޓާ ޖޫނިއަރ އެތްލެޓިކްސް ޗެންޕިއަންޝިޕް 2023 ކުޅުދުއްފުށި ސިޓީގައި މިއަދު ހެނދުނު ފަށައިފިއެވެ.

ކުޅުދުއްފުށި ޒޯން ސްޓޭޑިއަމްގައި މި މުބާރާތުގެ އިވެންޓް ތައް ފެށުމުގެ ގޮތުން ބޭއްވި ރަސްމިއްޔާތުގައި ދިދަނެގުމާއި މުބާރާތުގެ ލަވަ އިފްތިތާހު ކުރުން ވަނީ ކުރިއަށް ގެންގޮސްފައެވެ.

އެގޮތުން ޤައުމީ ދިދަ ނަންގަވައިދެއްވީ ކުޅުދުއްފުށި ސިޓީ މޭޔަރ މުހައްމަދު އާތިފްއެވެ. އަދި ކައުންސިލްގެ ދިދަ ޑެޕިޓީމޭޔަރ އަލީ އަހުމަދު ނަންގަވައިދެއްވިއިރު އެސޯޝިއޭޝަންގެ ދިދަ ނަންގަވައި ދެއްވީ އެތްލެޓިކްސް އެސޯޝިއޭޝަންގެ ސެކްރެޓަރީ ޖެނެރަލް މުންތަގިމްއެވެ. މީގެ އިތުރުން މުބާރާތުގެ ބައިވެރިވި ޓީމް ތަކުގެ ދިދަ ނަގާފައިވަނީ ކޮންމެ ޓީމަކުންވެސް އެޓީމެއް ތަމްސީލްކުރާ އެތްލީޓެވެ.

މިމުބާރާތުގެ އޮފިޝިއަލް ލަވަ ހުށައަޅައިދެއްވީ ރާއްޖޭގެ މަޝްހޫރު ލަވަކިއުންތެރިޔާ ޝަލަބީ އަދި އަސްރާއެވެ. ލަވަޔާއެކު ސްކޫލް ކުދިންގެ ހަރަކާތްތަކެއް ފެނިގެންދިޔައެވެ.

މިރަސްމިއްޔާުގައި ވާހަކަ ދައްކަވަމުން ކުޅުދުއްފުށި ސިޓީގެ މޭޔަރ މުހައްމަދު އާތިފް ވިދާޅުވީ ކޮންމެ ކަމެއްވެސް ކާމިޔާބުކުރުމަށް ކުރާކަމެއް ލޯބިން ކަމަށް ކަމޭހިތައިގެން ކުރުމަކީ ވަރަށް މުހިންމު ކަމެއް ކަމުގައެވެ. މީގެ އިތުރުން މުބާރާތް ކުރިއަށްދާއިރުގަވެސް އަދި ކޮންމެ ކަމެއްގައި ހަރަކާތްތެރިވިއަސް ރިވެތި އަހުލާގައި ތިބުމަށް އެތްލީތުންނަށް ނަސޭހަތް ދެއްވިއެވެ.

އެތްލެޓިކްސް އެސޯޝިއޭޝަނާއި ކުޅުދުއްފުށީ ސިޓީ ކައުންސިލް ގުޅިގެން ބާއްވާ މި މުބާރާތުގައި 04 އުމުރު ފުރާއަކުން 35 ޓީމާއެކު ޖުމްލަ 1150 އެތްލީޓުން ހަރަކާތްތެރިވާނެ އެވެ. މިމުބާރާތް ފެށުމަށް ބާއްވާ ހާއްޞަ ރަސްމިއްޔާތު ހޮނިހިރު ދުވަހުގެ ރޭ ބޭއްވުމަށް ކުރިން ހަމަޖެހިފައިވީނަމަވެސް ވިއްސާރަވުުމުގެ ސަބަބުން ރޭވަނީ އެރަސްމިއްޔާތު ކެންސަލް ކޮށްފައެވެ. އަދި މިހާރު އެ ރަސްމިއްޔާތު މިރޭ ބާއްވާގޮތަށްވަނީ ހަމަޖެހިފައެވެ.