ފާރިސް ފުލުހުންގެ ބެލުމުގެ ދަށަށް ބަދަލުކޮށްފި
22 ޖުލައި 2017 | ހޮނިހިރު 09:12ކަރެކްޝަންސްއިން ބުނީ ފުލުހުން ތަހުގީގު ކުރާ މައްސަލައެއްގެ ތަހުގީގަށް ފާރިސް ގެންދިޔައީ ކަމަށް
މެމްބަރު ފާރިސް މައުމޫން ހައްޔަރުކޮށްގެން ދޫނިދޫއަށް ގެންދިއުމަށް ލޯންޗަށް އަރުވާފައި
ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު ފާރިސް މައުމޫން ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް މޯލްޑިވްސް ކަރެކްޝަނަލް ސާރވިސް އިން ބުނެފި އެވެ.
ކަރެކްޝަންސްގެ މީޑިއާ އޮފިޝަލް "ރާއްޖެއެމްވީ"އަށް ހޮނިހިރު ދުވަހު ވިދާޅުވީ ފާރިސް މިވަގުތު ހުންނެވީ ފުލުހުންގެ ބެލުމުގެ ދަށުގައި ކަމަށާއި ފުލުހުންގެ ބެލުމުގެ ދަށަށް ފާރިސް ގެންގޮސްފައިވަނީ ފުލުހުން ހިންގާ ތަހުގީގަކަށް ކަމަށެވެ.
މާފުށި ޖަލުން ފާރިސް ފުލުހުންގެ ބެލުމުގެ ދަށަށް ގެންގޮސްފައިވާ ކަމުގެ އަޑުތައް ފެތުރުމާއި ގުޅިގެން ފާރިސްގެ ގާނޫނީ ވަކީލު މައުމޫން ހަމީދު ވަނީ ކަމާބެހޭ އިދާރާތަކަށް ގުޅައި ވެގެންއުޅޭ ގޮތެއް ސާފު ކުރެއްވުމަށް މަސައްކަތް ކުރައްވާފަ އެވެ.
މައުމޫން ހަމީދު ވިދާޅުވީ ފާރިސް ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ދެކެވޭ ވާހަކަތަކާއި ގުޅިގެން ކަމާބެހޭ އިދާރާތަކަށް ގުޅި ނަމަވެސް ޖަވާބެއް ލިބިފައިނުވާ ކަމަށެވެ. އެހެންކަމުން ވެގެން އުޅޭގޮތް ސާފު ނުވާކަމަށް މައުމޫން ހަމީދު ވިދާޅުވި އެވެ.
މިކަމާއި ގުޅިގެން ފުލުހުންގެ މީޑިއާ އޮފިޝަލަށް ގުޅާލުމުން ވިދާޅުވީ "ފާރިސް އާއި ގުޅޭގޮތުން އެއްވެސް ކޮމެންޓެއް މިވަގުތު ކުރެވެން ނެތް" ކަމަށެވެ.
ރިޝަވަތުގެ ތުހުމަތުގައި ފާރިސް ބަންދުކޮށްފައިވާއިރު، ކްރިމިނަލް ކޯޓުން ވަނީ ޝަރީއަތް ނިމެންދެން ހޯމް މިނިސްޓްރީން ކަނޑައަޅާތަނެއްގައި އޭނާ ބަންދުގައި ބެހެއްޓުމަށް އަމުރުކޮށްފަ އެވެ. އެއާއެކު ދޫނިދޫގައި ބަންދުކުރުމަށް ފަހު ފާރިސް ވަނީ މާފުށީ ޖަލަށް ބަދަލުކޮށްފަ އެވެ.
ނަމަވެސް ރިޝްވަތުގެ މައްސަލައިގައި ފާރިސްގެ މައްޗަށް ދައުވާ ކުރުމަށް ފުލުހުން ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވާކަމެއް އެނގޭކަށް ނެތެވެ. އަދި ޕްރޮސެކިއުޓަރ ޖެނެރަލްގެ އޮފީހުން އެމައްސަލައިގައި ފާރިސްގެ މައްޗަށް ދައުވާ ކުރުމަށް ކްރިމިނަލް ކޯޓަށް ހުށަހަޅާފައިވާކަން ވެސް އެނގޭކަށް ނެތެވެ.
