ގްރީން މުއާވިއަތާއި މާޒިޔާ ކޮކީ އެފްއޭއެމުން އިސްތިއުފާދީފި
14 އޮކްޓޯބަރު 2023 | ހޮނިހިރު 15:24އެކްސްކޯގައި މިހާރު އިސްތިއުފާ ނުދީ ތިބީ 7 މެމްބަރުން
ކޮކީ (ވ) އާއި މުއާވިއަތު: އެފްއޭއެމް އެކްސްކޯގެ ކުރީގެ ދެ މެމްބަރުން
ފުޓްބޯޅަ އެސޯސިއޭޝަން އޮފް މޯލްޑިވްސްގެ އެކްސްކޯގައި ތިބި މެމްބަރުންގެ ތެރެއިން ދެ މެމްބަރަކު އިސްތިއުފާދީފި އެވެ.
އެއީ މާޒިޔާ ސްޕޯޓްސް ކުލަބުގެ ފަރާތުން އެކްސްކޯ އަށް އިންތިހާބުވި އެފްއޭއެމުގެ ދެ ނާއިބް ރައީސުންގެ ތެރޭގައި ހިމެނޭ ހުސައިން ޝާފިއު (ކޮކީ) އާއި ގްރީން ސްޓްރީޓްސްގެ ފަރާތުން އިންތިހާބުވި މުއާވިއަތު ހަލީލް އެވެ.
މީގެ ތެރެއިން މުއާ އިސްތިއުފާދިނީ މީގެ ހަތަރު ދުވަސް ކުރިންނެވެ. ކޮކީ އިސްތިއުފާ ދިނީ މދިޔަ މަހުގެ ތެރޭގައި ކަމަށް އޭނާ ވަނީ ކަށަވަރުކޮށްދީފަ އެވެ.
2020 ވަނަ އަހަރު އިންތިހާބު ކުރި އެފްއޭއެމުގެ އެކްސްކޯގައި ތިބެނީ ރައީސް ބައްސާމް އަދީލް ޖަލީލާއެކު އެގްޒެކެޓިވް ކޮމިޓީގައި ތިބެނީ 9 މެމްބަރުންނެވެ. އިސްތިއުފާ ނުދީ މިވަގުތު ތިބީ ނައިބް ރައީސް އަލީ އުމަރާއި، އީގަލްސްގެ މުފާވިޒް ހާޝިމް (މުފާ) އާއި ޓީސީގެ އަހުމަދު ނަޝީދު (ޑޭވް) އާއި ދަ ގްރާންޑޭގެ މުހައްމަދު ޝިފާއު އާއި އެފްއޭއެމުގެ މުވައްޒަފުންގެ ގެ ގޮތުގައި މަސައްކަތް ކުރާ އާމިނަތު ޝާނީޒް އާއި ޑޮކްޓަރު އަހުމަދު ޝަކީބް އެވެ.
އެފްއޭއެމުގެ އަސާސީ ގަވާއިދު ބުނާ ގޮތުން އެކްސްކޯގެ ހަތަރު އަހަރުގެ މުއްދަތު ހަމަވުމުގެ ކުރިން އިންތިހާބެއް ބާއްވަންޖެހޭނީ ހިންގާ ކޮމިޓީގެ ދެބައިކުޅަ އެއްބައި އިސްތިއުފާދިނުމުންނެވެ.
އެކްސްކޯއިން މެމްބަރުން އިސްތިއުފާދޭން ފަށާފައިވަނީ މިހާރު ހިނގަމުންދާ ދައުރު ހަމަވާން ބާކީ އަހަރެއް އޮއްވަ އެވެ. އަދި އިސްތިއުފާދިން މެމްބަރުން ދަނީ ފޯވަޑް އަލީ އަޝްފާގް (ދަގަނޑޭ) އެފްއޭއެމުގެ ރައީސް ކަމަށް ގެނައުމަށް ހިންގާ ކެމްޕޭނަށް ތާއީދު ކުރަމުންނެވެ.
