މަޖިލިސް ހުއްޓުވާފައި އޮތީ މި ސަރުކާރުގެ ވައްކަމުގެ މައްސަލަތައް ބަލައިފާނެތީ: ސައުދު
އިލެކްޝަންސް ކޮމިޝަނާއި މަޖިލީހުން ވަނީ ސައުދުގެ ގޮނޑި ގެއްލުވާލާފައި
މެމްބަރު ސައުދު ހުސައިން
ރައްޔިތުންގެ މަޖިލިސް ހުއްޓުވާފައިވަނީ މިސަރުކާރުން ދައުލަތުގެ ހަޒާނާއިން ބިލިއަން ރުފިޔާ ވަގަށް ނެގި މައްސަލަ އާއި ކޮރަޕްޝަނުގެ މައްސަލަތައް ބަލާފާނެތީ ކަމަށް ރައްޔިތުންގެ މަޖިލީހުގެ ވިލިނގިލީ ދާއިރާގެ މެމްބަރު ސައުދު ހުސައިން ވިދާޅުވެއްޖެ އެވެ.
ސައުދު ކުރެއްވި ޓްވީޓެއްގައި ވިދާޅުވެފައިވަނީ މިހާރު ހިންގަމުންދާ ރިޔާސީ ދައުރުގައި ދައުލަތުގެ ހަޒާނާއިން އެތައް ބިލިއަން ރުފިޔާއެއް ވަނީ ވަގަށް ނަގާފައި ކަމަށެވެ. މި ވައްކަމުގެ ފެށުމާއި ނިމުން ހޯދޭނީ މަޖިލިސް ތެރެއިން ކަމަށް ސައުދު ވިދާޅުވި އެވެ.
މީގެއިތުރުން ސައުދު ވިދާޅުވީ ދައުލަތުގެ ހަޒާނާއިން ވަގަށް ނަގާފައިވާ ބިލިއަން ރުފިޔާގެ ހަގީގަތް މަޖިލިސް މެދުވެރިކޮށް ބަލާނެތީ، މަޖިލިސް ހުއްޓުވުމަށްފަހު ގާނޫނުއަސާސީއާ ހިލާފު ވަމުންދާ ކަމަށްވެސް ސައުދު ވިދާޅުވި އެވެ.
ސައުދު އެގޮތަށް ވިދާޅުވިއިރު، ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދު މަޖިލިސް ކުރިއަށް ގެންދަނީ މަޖިލީހުގެ ގަވާއިދާ ހިލާފަށް ކަމަށް ތަކުރާރުކޮށް މަޖިލީހުގެ ގިނަ މެމްބަރުން މަޖިލީހުގެ ތަޅުމުގައި ގޮވާލައްވާފައިވެއެވެ. މަޖިލީހުގެ ރައީސް މަސީހު ތަކުރާރުކޮށް މަޖިލީހުގެ ގަވާއިދާއި އެއްގޮތަށް މަޖިލީހުގެ ކަންކަން ކުރައްވަމުން ނުގެންދަވާކަމަށް ބުނެ، ގުޅިފައިވާ ސިޔާސީ ޕާޓީތަކުގެ ޖޮއިންޓް ޕާލިމެންޓްރީ ގްރޫޕާއި ސަރުކާރަށް ނިސްބަތްވާ ރައްޔިތުންގެ މަޖިލީހުގެ 11 މެމްބަރުންނާއެކު، ޖުމްލަ 45 މެމްބަރުންގެ ސޮޔާއެކު މަސީހުގެ އިތުބާރު ނެތްކަމުގެ މައްސަލަ މަޖިލީހަށް ވައްދާފައި ވަނިކޮށް އެމައްސަަލަ މަޖިލީހުން ބޭރުކޮށްލާފައެވެ.
މަސީހުގެ އިތުބާރުނެތް ކަމުގެ މައްސަލަ މަޖިލީހުން ބޭރުކޮށްލާފައިވަނީ މެމްބަރު ސައުދުގެ އިތުރުން، މަސީހުގެ އިތުބާރު ނެތްކަމުގެ މައްސަލައިގައި ސޮއި ކުރެއްވި އިތުރު ތިން މެމްބަރުންގެ ގޮނޑި ގެއްލިފައިވާ ކަމަށް މަޖިލީހުން ނިންމާ، އެމައްސަލައިގެ ސައްހަކަމެއް ނެތްކަމަށް ބުނެއެވެ.
