މަސްތުވާތަކެތީގެ މައްސަލައެއްގައި ހިމެނޭ ފައިސާ އިސްތިއުނާފު ނިމެންދެން ހިފެހެއްޓުމަށް އަމުރުކޮށްފި
ފޭދޫ މެޖިސްޓްރޭޓް ކޯޓުން ނިންމާފައިވަނީ އަލީ ވަރުދީގެ ކޮޓަރިން ފެނުނު ފައިސާ އަކީ ކުށްކޮށްގެން ހޯދާފައިވާ ފައިސާކަން ސާބިތުކޮށްނުދެވޭކަން
ދިވެހިރާއްޖޭގެ ހައިކޯޓު
މަސްތުވާތަކެތީގެ މައްސަލައެއްގައި ހިމެނޭ ފައިސާ އިސްތިއުނާފު ނިމެންދެން ހިފެހެއްޓުމަށް ހައިކޯޓުން ފުލުހުންގެ މައްޗަށް އަމުރުކޮށްފިއެވެ.
މި މައްސަލައަކީ ސ. ފޭދޫ، މަގިކެޑަގެ، އަލީ ވަރުދީގެ މައްޗަށް އައްޑޫ ސިޓީ ފޭދޫ މެޖިސްޓްރޭޓް ކޯޓުގެ ގަޒިއްޔާގައި ޑައިމޯފިން ޓްރެފިކް ކުރުމުގެ ކުށުގެ ދައުވާއެވެ. މި ދައުވާގައި ޑައިމޯފިކް ޓްރެފިކް ކުރުމުގެ ކުށް އަލީ ވަރުދީގެ މައްޗަށް ސާބިތުވިއެވެ. ނަމަވެސް އެ މައްސަލައިގައި އަލީ ވަރުދީގެ ކޮޓަރިން ފެނުނު 29925 ރުފިޔާއަކީ ކުށްކޮށްގެން ހޯދާފައިވާ ފައިސާކަމަށް ބުރަ ނުވެވޭތީ އެ ފައިސާ ދައުލަތަށް ނެގުމަށް އަމަލުކުރާނެ ތަނެއް ނެތް ކަމަށް އެ ގަޒިއްޔާގައި ކަނޑައަޅާފައިވާ ހުކުމްގައި ބުނެފައިވެއެވެ.
އަދި މި ހުކުމާއި މެދު ހިތްހަމަނުޖެހިގެން ޕްރޮސެކިއުޓަރ ޖެނެރަލްގެ ފަރާތުން އެ ގަޒިއްޔާ ހައިކޯޓުގައި އިސްތިއުނާފުކުރިއެވެ. މި އިސްތިއުނާފީ ގަޒިއްޔާގައި ޕީޖީގެ ފަރާތުން ނެރެދިނުމަށް އެދިފައިވަނީ ވަގުތީ އަމުރެކެވެ.
ޕީޖީގެ ފަރާތުން މި މައްސަލައިގައި އިސްތިއުނާފުކޮށްފައިވަނީ އަލީ ވަރުދީގެ ކޮޓަރިން ފެނުނު ފައިސާ ދައުލަތަށް ނެގުމަށް އަމުރުކުރާނެ ތަނެއް ނެތްކަމަށް ކަނޑައަޅާފައިވާ ބަޔާ މެދު ހިތްހަމަނުޖެހިގެންނެވެ. އަދި މި މައްސަލައިގައި ދައުލަތުން ނެރެދިނުމަށް އެދޭ ވަގުތީ އަމުރަކީ ދިވެހިރާއްޖޭގެ ހައިކޯޓުން މި ގަޒިއްޔާ ނިމެންދެން އަލީ ވަރުދީގެ ކޮޓަރިން ފެނުނު 29925 ރުފިޔާ އެއްވެސް ފަރާތަކަށް ދޫނުކޮށް ފުލުހުންގެ ހިދުމަތުން އެ ފައިސާ ހިފެހެއްޓުމުގެ ވަގުތީ އަމުރެކެވެ. ސަބަބެއްގެ ގޮތުގައި ޕީޖީން ބުނެފައިވަނީ އެ ފައިސާ އަލީ ވަރުދީއަށް ދޫކޮށްފިނަމަ، އެ ފައިސާ ދައުލަތަށް ނެގުމަށް ހުރަސްއެޅިދާނެ ފިޔަވަޅު އެޅުމުގެ އިހްތިމާލު އޮތް ކަމަށެވެ.
ހައިކޯޓުން މި މައްސަލައިގައި ބުނެފައިވަނީ ފައިސާ ނެގުމުގެ ބައި އިސްތިއުނާފަށް ހުށަހަޅާފައިވާތީ، އިސްތިއުނާފީ މަރުހަލާގައި މައްސަލަ ނިމިގެންދާގޮތަކުން ދަށު ކޯޓުގެ ހުކުމަށް ބަދަލު އައުމުގެ ފުރުސަތު އޮތުމުން، ހައިކޯޓުން ވަކި ގޮތެއް ކަނޑައަޅަންދެން އެ ފައިސާ އެއްވެސް ފަރާތަކަށް ދޫނުކޮށް ފުލުހުން އެ ފައިސާ ހިފަހެއްޓުމަށެވެ.
މި މައްސަލައިގައި އަމުރުގައި ބުނެފައިވަނީ އަލީ ވަރުދީގެ މައްޗަށް ޑައިމޯފިން ޓްރެފިކް ކުރުމުގެ ކުށުގެ ދައުވާ ސާބިތުވެފައިވާ އިރު، އަލީ ވަރުދީ ކުށް ކޮށްގެން ހޯދާފައިވާ ފައިސާކަމަށް ތުހުމަތުކޮށް އެ ގަޒިއްޔާގައި ދައުލަތުން ނަގައިދިނުމަށް އެދިފައިވާ ފައިސާ ދަށުކޯޓުން ނަގައިދީފައި ނުވުމުން، އެ ފައިސާ ދައުލަތަށް ނެގުމުގެ ބައި ޕީޖީގެ ފަރާތުން އިސްތިއުނާފަށް ހުށަހަޅާފައިވާތީ، އިސްތިއުނާފީ މަރުހަލާގައި މައްސަލަ ނިމިގެންދާ ގޮތަކުން ދަށު ކޯޓުގެ ހުކުމަށް ބަދަލު އައުމުގެ ފުރުސަތު އޮތުމުން، ހައިކޯޓުން ވަކި ގޮތެއް ކަނޑައަަޅަންދެން އެ ފައިސާ އެއްވެސް ފަރާތަކަށް ދޫނުކޮށް ހިފެހެއްޓުމަށް ފުލުހުންގެ މައްޗަށް ވަނީ އަމުރުކޮށްފައެވެ.
މި މައްސަލައިގެ ރިޔާސަތު ބެލެހެއްޓެވީ ފަނޑިޔާރު ހުސައިން މަޒީދު އަދި މި ބެންޗުގައި ފަނޑިޔާރު ހަސަން ޝަފީއު އާއި ފަނޑިޔާރު މުހައްމަދު ނިޔާޒް އިންނެވިއެވެ.
