އަނިޔާގެ ސަބަބުން އާސެނަލްގެ ފޯވާޑް ބުކާޔޯ ސަކާ އިނގިރޭސި ގައުމީ ސްކޮޑުން އުނިކޮށްފިއެވެ.

މިމަހު އިނގިރޭސި ގައުމީ ޓީމް ކުޅެން އޮތް ދެމެޗަށް އެކުލަވާލި ސްކޮޑްގައި ސަކާ ހިމެނި ނަމަވެސް, މިހާރު ޒުވާން ފޯވާޑަށް ރެސްޓްދޭން ސްކޮޑުން އުނިކުރިކަން އިނގިރޭސި އެފްއޭއިން ވަނީ ޔަޤީންކޮށްދީފައެވެ. އިނގިރޭސި އެފްއޭއިން ބުނީ ސަކާގެ ބަދަލުގައިވެސް ކުޅުންތެރިއަކު ނުނަގާނެ ކަމަށާއި, މިމަހު ކުޅޭ ދެމެޗަށް ކުރިއަށްދާނީ މިހާރު އޮތް 25 ކުޅުންތެރިންގެ ސްކޮޑާއެކު ކަމަށެވެ.

އަނިޔާގެ ސަބަބުން އާސެނަލް އާދިއްތަ ދުވަހުގެރޭ ޗެމްޕިއަން މެންޗެސްޓަރ ސިޓީއާ ދެކޮޅަށް ކުޅުނު މެޗުގައިވެސް ސަކާ ބޭނުމެއް ނުކުރެއެވެ. ކޯޗު އާޓެޓާ ބުނީ ސިޓީ އަތުން މޮޅުވި މެޗުގައި ސަކާ ބޭނުން ނުކުރީ އަނިޔާގައި ހުރުމުން ކަމަށާއި, ޓީމާއެކު އެއްވެސް ޕްރެކްޓިސްއެއް ވެސް ސަކާ ނުކުރާ ކަމަށެވެ. ސިޓީ މެޗާ ހަމައަށް ސަކާ ވަނީ އާސެނަލްގައި ވިދިވިދިގެން 87 މެޗު ކުޅެފައެވެ.

25 އަހަރުގެ ފޯވާޑަށް ގައުމީ ޓީމްގައި ގެއްލެނީ މިމަހު 13 ވަނަ ދުވަހު އޮސްޓްރޭލިޔާއާ ދެކޮޅަށް ކުޅޭ ބައިނަލްއަޤްވާމީ ރަހުމަތްތެރިކަމުގެ މެޗާއި, ޔޫރޯ ކޮލިފައިންގައި އިޓަލީއާ ވާދަކުރާ މެޗެވެ. އިންގްލެންޑް ގައުމީ ޓީމްގެ ކޯޗު ސައުތް ގޭޓް ބުނީ ރިސްކެއް ނަގައިގެން ސަކާ ލައްވާ ކުުވަން ބޭނުންނުވާކަމަށެވެ.