ޕާމް ބީޗް ސޮކާކަޕް: ސްޕޯޓިން ވަކާންޒް އަދި ހިންނަވަރު ބައްދަލުކުރި މެޗު އެއްވަރުވެއްޖެ

ޕާމް ބީޗް ރިސޯޓް އެންޑް ސްޕާއިން އިންތިޒާމުކޮށްގެން ކުރިއަށް ގެންދާ ޕާމް ބީޗް ސޮކާ ކަޕް 2017 ގައި ސްޕޯޓިން ވަކާންޒް އަދި ހިންނަވަރު އެފްސީ ބައްދަލުކުރި މެޗު އެއްވަރުވެގެން ނިމިއްޖެ އެވެ.

ޕާމް ބީޗްގައި ހުކުރު ދުވަހު ހަވީރު ކުޅުނު މި މެޗު އެއްވަރުވީ 2-2 ގެ ނަތީޖާއަކުންނެވެ.

މެޗުގެ މޮޅު ކުޅުންތެރިޔަކަށް ހޮވިފައިވަނީ ހިންނަވަރު އެފްސީގެ ވިޖާޒް އީސާ ފުޅެވެ. އޭނާ ވަނީ މެޗުގައި ދެ ލަނޑު ކާމިޔާބުކޮށްފައެވެ. މުބާރާތުގައި ހޮނިހިރު ދުވަހުވެސް މެޗެއް ކުޅެވޭނެއެވެ. ހޮނިހިރު ދުވަހު ކުޅޭ މެޗުގައި ބައްދަލުކުރާނީ ކުރެއްދޫ އަދި ކޮކޫން ފުޓްބޯލް ޓީމެވ.

ރިސޯޓް ތަކާއި، އަވައްޓެރި ރަށްތަކަށް ހުޅުވާލައިގެން ކުރިއަށް ގެންދާ މި މުބާރާތުގައި ޖުމްލަ 7 ޓީމު ވާދަކޮށްފައި ވާއިރު، މި މުބާރާތުގެ ކުޅުން ކުރިއަށް ގެންދިއުމަށް ހަމަޖެހިފައިވަނީ 2 ގުރޫޕަކަށް ބަހާލައިގެންނެވެ.

މުބާރާތުގެ ފުރަތަމަ މެޗުގައި ބައްދަލު ކޮށްފައިވަނީ ގްރޫޕް "އޭ"ގެ ޕާމް ބީޗް ސޮކާ ކްލަބް އާއި ކޭ ޔުނައިޓެޑް އެވެ. މި މެޗް ތަފާތުބޮޑު ނަތީޖާއަކުން ކާމިޔާބުކޮށްފައިވަނީ ޕާމް ބީޗް ސޮކާ ކްލަބުންނެވެ. އެޓީމުން މެޗް ކާމިޔާބުކުރީ 7-0 ގެ ތަފާތުބޮޑު ނަތީޖާއަކުންނެވެ.

މިމުބާރާތުގެ ގްރޫޕް "އޭ" ގައި ހިމެނެނީ ޕާމް ބީޗް ސޮކާ ކްލަބް އާއި، ހިންނަވަރު އެފްސީ އާއި، ސްޕޯޓިން ވެކެންޒާގެ އިތުރުން ކޭ ޔުނައިޓެޑެވެ. ގްރޫޕް "ބީ" ގައި ހިމެނެނީ ކޮކޫން ފޫޓްބޯލް ޓީމާއި، ކުރެއްދޫ އެފްސީ އާއި، އައިޑިއަލް މޫވްމެންޓްސް އެވެ.

މުބާރާތް ރޭވިފައިވާގޮތުން ގްރޫޕް ސްޓޭޖުގެ ކުޅުން ކުރިއަށް ގެންދިއުމަށް ފަހު ކޮންމެ ގުރޫޕަކުންވެސް އެންމެ ގިނަ ޕޮއިންޓް ހޯދާ ދެޓީމަށް ސެމީއިން ޖާގަ ލިބޭނެއެވެ. އެގޮތުން ސެމީގެ ފުރަތަމަ މެޗުގައި ކުޅޭނީ ގްރޫޕް "އޭ" ގެ އެއްވަނައަށްދާ ޓީމާއި ގްރޫޕް "ބީ" ގެ ދެވަނައަށްދާ ޓީމެވެ. ދެވަނަ ސެމީގައި ކުޅޭނީ ގްރޫޕް "ބީ"ގެ އެއްވަނައަށްދާ ޓީމާއި ގްރޫޕް "އޭ"ގެ ދެވަނައަށްދާ ޓީމެވެ.

ޗެމްޕިއަން ޓީމަށް 30،000 ރުފިޔާގެ ފައިސާގެ އިނާމެއް ލިބޭ މި މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ އަންނަ އޯގަސްތް މަހުގެ 4 ވަނަ ދުވަހުއެވެ.

މިމުބާރާތުގައި ފެއާ ޕްލޭ ޓީމާއި، ޑްރީމް ޓީމާއި، އެންމެ ގިނަ ލަނޑު ޖަހާ ކުޅުންތެރިޔާ އާއި، މުޅި މުބާރާތުގެ އެންމެ މޮޅު ކުޅުންތެރިޔާގެ މަގާމުވެސް ހޮވުމަށް ވަނީ ހަމަޖެހިފައެވެ.