ލިވަޕޫލާއި ނިއުކާސަލްއިން ފާރަލަމުން އައި ބޮވެން ވެސްޓް ހޭމްގެ އެއްބަސްވުން އާކޮށްފި

އިނގިރޭސި ފޯވާޑް ޖެރޮޑް ބޮވެން ވެސްޓް ހޭމް ޔުނައިޓެޑްގައި މަޑުކުރަން ނިންމާ, އެއްބަސްވުން އާކޮށްފިއެވެ.

ބޮވެން ކްލަބްގައި މަޑުކުރަން ނިންމިކަން ހާމަކުރީ ކޯޗު ޑޭވިޑް މޮއިސް އެވެ. ބޮވެން އަކީ ޕްރިމިއަރ ލީގުގެ ލިވަޕޫލާއި, ނިއުކާސަލް ޔުނައިޓެޑުން ޝައުޤުވެރިވާ ކުޅުންތެރިއެކެވެ. ކޯޗު މޮއިސް ބުނީ 26 އަހަރުގެ ފޯވަޑް ކްލަބްގައި މަޑުކުރުމަކީ އުފާވެރި ޚަބަރެއްކަމަށާއި, އެއީ ރަނގަޅު ނިންމުމެއް ކަމަށެވެ. ވެސްޓް ހޭމް އަށް ބަދަލުވެ ބޮވެން ކްލަބްގައި މުހިއްމު ދައުރެއް އަދާކޮށް އަދިވެސް ކުރިއެރުން ހޯދަމުން އަންނަކަން ކޯޗު ފާހަގަކުރިއެވެ. ބޮވެން ވެސްޓް ހޭމްއާ ގުޅުނީ 2020 ވަނަ އަހަރުއެވެ. ހަލް ސިޓީން ވެސްޓް ހޭމްއަށް ބަދަލުވީ ފަސް އަހަރުގެ އެއްބަސްވުމެއްގެ ދަށުން 18 މިލިއަން ޕައުންޑަށެވެ.

މިދިޔަ މުއްދަތުގައި ވެސްޓް ހޭމް އަށް ކުޅެދިން 166 މެޗުން 45 ގޯލް ވަނީ ކްލަބަށް ޖަހައިދީފައެވެ. އޭގެތެރޭގައި މިދިޔަ ސީޒަންގައި ޔޫރަޕާ ކޮންފެރެންސް ލީގު ފައިނަލްގައި ފިޔޮރެންޓީނާ ކޮޅަށް ޖެހި ގޯލް ހިމެނެއެވެ. މިސީޒަންގައިވެސް ނުވަ މެޗުން އޭނާ ވަނީ ފަސް ގޯލް ޖަހާފައެވެ. މިމަހު އިނގިރޭސި ގައުމީ ޓީމް ކުޅޭ ދެ މެޗަށް ނެގި ސްކޮޑުންވެސް ކޯޗު ސައުތް ގޭޓް ވަނީ ބޮވެންއަށް ޖާގަ ދީފައެވެ.