ދެ ވަނަ ހާފުގެ ލަނޑުތަކުން މޮޅުވެ، ޔުވެންޓަސް ތިން ވަނައިގައި

އިޓާލިއަން ލީގުގައި ޓޮރީނޯއާ ދެކޮޅަށް ކުޅުނު މެޗުން މޮޅުވެ، ޔުވެންޓަސް އިން ތިން ވަނައިގައި ހަމަޖެހިލައިފި އެވެ.

ޔުވެންޓަސްގެ ދަނޑުގައި ކުޅުނު މެޗު 2-0 އިން އެ ޓީމު ކާމިޔާބު ކުރީ ދެ ވަނަ ހާފުގައި ޖެހި ލަނޑުތަކުންނެވެ. މެޗުގެ ފުރަތަމަ ހާފުގައި ވެސް ޔުވެންޓަސް އިން ވަނީ ލަނޑެއް ޖަހައިފަ އެވެ. މެޗު ފަށައިގެން ފަސް ވަނަ މިނެޓުަގައި މޮއިސް ކީން ލަނޑެއް ޖެހި ނަމަވެސް، ވީއޭއާރު ބެލުމަށްފަހު ރެފްރީ ނިންމީ އެ ލަނޑު ބަލައި ނުގަތުމަށެވެ. ދެ ވަނަ ހާފު ފަށައިގެން ދެ ވަނަ މިނެޓުގައި ޔުވެންޓަސް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޑިފެންޑަރު ފެޑެރިކޯ ގަޓީ އެވެ. އޭގެ ފަހުން މެޗުގެ 62 ވަނަ މިނެޓުގައި އެ ޓީމުގެ ދެ ވަނަ ލަނޑު ޖެހީ އާކަންޑިއުސް މިލިކް އެވެ. އޭނާ އެ ލަނޑު ޖެހީ ފިލިޕް ކޮސްޓިކް ތަނަވަސްކޮށްދިން ފުރުސަތެއްގަ އެވެ. މެޗުގައި މިލިކް ކުޅެން ނިކުމެފައި ވަނީ ވެސް ބަދަލު ކުޅުންތެރިޔެއްގެ ގޮތުގަ އެވެ.

މޮޅާއެކު ޔުވެންޓަސް ތިން ވަނައިގައި އޮތީ އަށް މެޗުން 17 ޕޮއިންޓު ހޯދައިގެންނެވެ. ދެ ވަނައިގައި އޮތް އިންޓަ މިލާނާ ދެމެދު މިހާރު އޮތީ ދެ ޕޮއިންޓުގެ ފަރަގެކެވެ. ކުޅުނު އަށް މެޗުގެ ތެރެއިން ޔުވެންޓަސް ވަނީ ފަސް މެޗުން މޮޅުވެފަ އެވެ. ދެ މެޗު އެއްވަރުވީއިރު، އެއް މެޗުން ވަނީ ބަލިވެފަ އެވެ. މެޗުން ބަލިވި ޓޮރީނޯ އޮތީ އަށް މެޗުން ނުވަ ޕޮއިންޓު ހޯދައިގެން 12 ވަނައިގަ އެވެ.