ދިވެހިރާއްޖޭގެ ޤައުމީ ޔުނިވާސިޓީގެ ދަރިވަރުންގެ ޔޫނިއަން (އެމްއެންޔޫއެސްޔޫ) އިން އިންތިޒާމުކޮށްގެން ކުރިއަށް ގެންދިޔަ، އެމްއެންޔޫއެސްޔޫ ފުޓްސަލް ފިއެސްޓާ 2023ގެ ފިރިހެން ޑިވިޝަންގެ ޗެމްޕިއަންކަން ވެސް އެމްއެންޔޫބީއެސް އިން ހޯދައިފި އެވެ.

ހުކުރު ދުވަހުގެ ރޭ ހުޅުމާލޭ ރެހެންދި ދަނޑުގައި ކުޅުނު މެޗު އެމްއެންޔޫބީއެސް އިން ކާމިޔާބު ކުރީ މޯލްޑިވްސް ޕޮލިޓެކްނިކާ ވާދަކޮށެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ޕޮލިޓެކްނިކުންނެވެ. އެ ޓީމަށް ލީޑު ނަގައިދިނީ އަޙުމަދު ސުދައިސް އަލީ އެވެ. ނަަމަވެސް އެމްއެންޔޫބީއެސް އިން ވަނީ ގާތް ގާތުގައި ތިން ލަނޑު ޖަހައިފަ އެވެ. އެ ޓީމަށް ނަތީޖާ ހަމަހަމަ ކޮށްދިނީ އަޙުމަދު ރިޔުޝަން އެވެ. އޭގެ ދެ މިނެޓު ފަހުން އެ ޓީމަށް ލީޑު ނަގައިދިނީ މުޙައްމަދު އަނާން އެވެ. ޖެހިގެން އައި މިނެޓުގައި މުޙައްމަދު ނާބިތު ޙުސެއިން ވަނީ އެ ޓީމުގެ ތިން ވަނަ ލަނޑު ޖަހައިފަ އެވެ. ފައިނަލް މެޗުގެ މޮޅު ކުޅުންތެރިޔަކަށް ހޮވުނީ އެމްއެންޔޫބީއެސްގެ އަނާން އެވެ.

ފިރިހެން ޑިވިޝަންގެ އެންމެ މޮޅު ފަސް ކުޅުންތެރިންނަށް ހޮވުނީ ޕޮލިޓެކްނިކްގެ ޙުސެއިން މައިސަންގެ އިތުރުން، އެމްއެންޔޫބީއެސްގެ އަނާން، ރިޔުޝަން، ނާބިތު އަދި އަނޫފް އަޙުމަދު އެވެ. ފިރިހެން ޑިވިޝަންގެ އެންމެ މޮޅު ކޯޗަަކަށް ހޮވުނީ އެމްއެންޔޫބީއެސްގެ އަޙުމަދު ނިސާމް އެވެ. މި ޑިވިޝަންގެ އެންމެ އުންމީދީ ކުޅުންތެރިޔަކަށް ހޮވުނީ ޕޮލިޓެކްނިކްގެ ސުދައިސް އެވެ. އެންމެ ގިނަ ލަނޑު ޖެހި ކުޅުންތެރިޔާ އަދި މުބާރާތުގެ އެންމެ މޮޅު ކުޅުންތެރިޔަަކަށް ހޮވުނީ އެމްއެންޔޫބީއެސްގެ ރިޔުޝަން އެވެ.

މިދިޔަ އަހަރު އޮތް މުބާރާތުގެ ފައިނަލްގައި ވެސް އެމްއެންޔޫބީއެސް އިން ވަނީ ވާދަކޮށްފަ އެވެ. ނަމަވެސް މެޕްސް ކޮލެޖާ ވާދަކޮށް ފައިނަލްގައި ބަލިވީ، ލީޑު ވެސް ލިބިފައި ވަނިކޮށެވެ. މިއަހަރުގެ މުބާރާތުގެ ސެމީ ފައިނަލްގައި މި ދެ ޓީމު ބައްދަލުކުރިއިރު، ކުރި ހޯދީ އެމްއެންޔޫބީއެސް އިންނެވެ.

މިއީ އެމްއެންޔޫއެސްޔޫ އިން އިސްނަގައިގެން 2013 ވަނަ އަހަރުން ފެށިގެން ބާއްވަމުން އަންނަ މުބާރާތެކެވެ. އެންމެ ފުރަތަމަ މުބާރާތް ފެށީ ފިރިހެން ޑިވިޝަނަށް އަމާޒުކޮށްގެންނެވެ. ނަމަވެސް އޭގެ ފަހުން 2018 ވަނަ އަހަރު ވަނީ އަންހެން ޑިވިޝަން ވެސް ތައާރަފުކޮށްފަ އެވެ. އޭގެ ފަހުން ކޮންމެ އަހަރަކު ވެސް މުބާރާތް ބާއްވަމުން އަންނަނީ ދެ ޑިވިޝަނަށެވެ. މިއަހަރުގެ މުބާރާތަކީ މީގެ ނުވަ ވަނަ މުބާރާތެވެ. ކޯވިޑް-19 ގެ ބަލިމަޑުކަމުގެ ސަބަބުން 2020 އަދި 2021 ވަނަ އަހަރު މުބާރާތް ނުބޭއްވުނު ނަމަވެސް، 2022 ވަނަ އަހަރު އަލުން ވަނީ މުބާރާތް ފަށައިފަ އެވެ.