ކުރިޔަށް އޮތް ދެދުވަހުވެސް ވިއްސާރަކުރާނެ، ޚާއްސަކޮށް މެދުރާއްޖެތެރެއާއި ދެކުނަށް މޫސުން ގޯސްވާނެ
7 އޮކްޓޯބަރު 2023 | ހޮނިހިރު 00:26ޚާއްސަކޮށް މެންދަމުގެ ވަގުތުގައި ވާރޭވެހި ގޯތިތެރެއަށާއި ގެއަށް ފެން ވަނުމުގެ ސަބަބުން ފަރުނީޗަރަށާއި ހިފާގެންގުޅޭ ސާމާނަށް ގެއްލުންވެދާނެތީ ސަމާލުވުމަށް ވަނީ އެދިފައި
އއ ފެރިދޫގައި ފެންބޮޑުވެފައި
ކުރިޔަށް އޮތް ދެ ދުވަހުވެސް ރާއްޖޭގެ ބޮޑުބަޔަކަށް ވިއްސާރަކުރާނެކަމަށް ބެލެވޭތީ އެކަމަށް ސަމާލުކަންދިނުމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ)ން އިލްތިމާސްކޮށްފިއެވެ.
އެންޑީއެމްއޭއިން ބުނީ މޫސުމާއި ބެހޭ ގައުމީ އިދާރާއިން ލަފާކުރާ ގޮތުގައި ޚާއްސަކޮށް މެދުރާއްޖެތެރެއާއި ދެކުނުގެ އަތޮޅުތަކަށް ވައިބާރުވެ، ކަނޑުތައް ގަދަވާނެކަމަށާއި ބޯކޮށް ވާރޭވެހޭނެކަމަށެވެ. އެހެންކަމުން ވާރޭވެހި ފެން ބޮޑުވެދާނެކަމަށް ރައްކާތެރިކަމުގެ ފިޔަވަޅު އެޅުމަށާއި ދަތުރުފަތުރު ކުރުމުގައި ސަމާލުވުމަށް މެޓް އޮފީހުން ވަނީ އިލްތިމާސްކޮށްފައެވެ.
ޚާއްސަކޮށް މެންދަމުގެ ވަގުތުގައި ވާރޭވެހި ގޯތިތެރެއަށާއި ގެއަށް ފެން ވަނުމުގެ ސަބަބުން ފަރުނީޗަރަށާއި ހިފާގެންގުޅޭ ސާމާނަށް ގެއްލުންވެދާނެތީ ގޭތެރެއަށް ފެންނުވަންނާނެހެން ވެލި ބަސްތާ ޖެހުމަށް އެންޑީއެމްއޭއިން ވަނީ އިލްތިމާސްކޮށްފައެވެ.
މިހާރު ރާއްޖެއަށް ކުރަމުންދާ ވިއްސާރައިގައި 4 ރަށެއްގައި ފެންބޮޑުވުމުގެ ސަބަބުން އެންޑީއެމްއޭއަށް ރިޕޯޓްކޮށްފައިވާކަމަށްވެސް އެއޮތޯރިޓީން ބުނެއެވެ.
