މަޖިލިސް އިންތިޚާބަށް އީސީން ގިނަ އަދަދެއްގެ މުވައްޒަފުން ހޯދަނީ
އޮފިސަރުންގެ މަޤާމަށް 218 މުވައްޒަފުން ހޯދަން ވަނީ އިއުލާންކޮށްފައި
އިލެކްޝަންސް ކޮމިޝަން
ކުރިއަށް އޮތް ރައްޔިތުންގެ މަޖިލީހުގެ އިންތިޚާބަށް ގިނަ ޢަދަދެއްގެ މުވައްޒަފުން ހޯދުމަށް އިލެކްޝަންސް ކޮމިޝަނުން އިޢުލާނު ކޮށްފިއެވެ.
އެ ކޮމިޝަނުން ވަނީ 300އަށްވުރެ ގިނަ މުވައްޒަފުން ހޯދުމަށް އިއުލަންކޮށްފައެވެ. ކޮމިޝަނުން މުވައްޒަފުން ހޯދަމުންދާ ދާއިރާތަކުގެ ތެރޭގައި އެންމެ ގިނައީ އޮފިސަރުންނެވެ. އެގޮތުން އޮފިސަރުންގެ މަޤާމަށް 218 މުވައްޒަފުން ހޯދަން ވަނީ އިއުލާން ކޮށްފައެވެ. އަދި އެސިސްޓަންޓް އޮފިސަރުންގެ މަޤާމަށް 40 މުވައްޒަފުން، އަދި ސެކިއުރިޓީ އޮފިސަރަކަށްވުމަށް 6 މުވައްޒަފުން ހޯދަން ވަނީ އިއުލާންކޮށްފައެވެ. އިތުރު ބައެއް މަޤާމުތަކަށް ކުރިމަތިލުމަށް އެދި ހުށަހެޅުމުގެ ފުރުޞަތު އިލެކްޝަނުން ވަނީ ހުޅުވާލާފައެވެ.
މުވައްޒަފުން ހޯދަމުންދާ މަޤާމާއި ބެހޭ ތަފްސީލްތައް އިލެކްޝަނުންވަނީ ގެޒެޓުގައި ހާމަކޮށްފައެވެ. އެ މަޤާމުތަކަށް ކުރިމަތިލުމުގެ ފުރުސަތު އަންނަ ޑިސެމްބަރު 31 ވަނަ ދުވަހުގެ ނިޔަލަށް އޮންނާނެއެވެ. އެހެންނަމަވެސް އިންތިޚާބު އޮންނާނެ ދުވަހެއް އިޢުލާންކޮށްފައެއް ނުވެއެވެ.
2024 ވަނަ އަހަރުގެ މަޖިލިސް އިންތިޚާބުގައި 93 ދާއިރާއަކަށް މެންބަރުން އިންތިޚާބު ކުރުމަށް ވަނީ ހަމަޖެހިފައެވެ. ކުރިއަށް މަޖިލީހުގެ ދައުރުގައި ބައެއް ދާއިރާތަކަށް ކިޔާ ނަމާއި، ދާއިރާތަކަށް ބައެއް ބަދަލުތައް ވަނީ ގެނެސްފައެވެ.
