ސިހުރު ހައްދަވާކަމުގެ ތުހުމަތުގައި ސޭޝެސްލްގެ އިދިކޮޅު ލީޑަރުގެ މައްޗަށް ދައުވާ އުފުލައިފި

ސިހުރު ހައްދަވާކަމުގެ ތުހުމަތުގައި، ސޭޝެލްސްގެ އިދިކޮޅު ލީޑަރު ޕެޓްރިކް ހަރމިނީއާއި އިތުރު ހަތް މީހުންގެ މައްޗަށް ދައުވާ އުފުލައިފިއެވެ. ފުލުހުން ބުނީ މިމައްސަލަ ފެށިފައިވަނީ މާހޭ-ޖަޒީރާގެ ގަބުރުސްތާނަކުން ނަގާފައިވާ ދެ ގަބުރު ފެނުނު ހިސާބުން ކަމުގައެވެ.

ހަރމިނީ ވަނީ މި ތުހުމަތުތައް ދޮގުކުރައްވާފައެވެ. އަދި މިކަމަކީ ރައީސް ރާމް ކަލަވަންގެ އެންގެވުމަށް އޭނާގެ އަބުރުފުޅު ނަގާލުމަށް ކުޅޭ ސިޔާސީ "ޝޯ"އެއް ކަމަށް ވިދާޅުވެފައި ވެއެވެ.

މިވަގުތު އެންމެ އިސް އިދިކޮޅު ލީޑަރުގެ ގޮތުގައި ހުންނެވި ޕެޓްރިކް ހަރމިނީ ވަނީ 2025 ވަނަ އަހަރު އޮންނަ ރިޔާސީ އިންތިޚާބުގައި ވާދަކުރައްވާނެކަން އިއުލާން ކުރައްވާފައެވެ. އެއީ ޔުނައިޓަޑް ސޭޝެލްސް ޕާޓީ ޔޫއެސްޕީގެ ކެންޑިޑޭޓުގެ ގޮތުގައެވެ.

2007ން 2016އަށް ސޭޝެލްސްގެ ޕާލިމެންޓްގެ ސްޕީކަރކަން ވެސް ކުރައްވާފައިވާ ހަރމިނީ ވިދާޅުވީ، ވެރިރަށް ވިކްޓޯރިއާގައި ހުންނަ އޭނާގެ ޕާޓީ އޮފީހަށް ހުކުރު ދުވަހު 40 ފުލުހުން ގޮސް އެތަން ރެއިޑްކޮށްފައި ވާކަމަށެވެ. ނަމަވެސް އެތަނުން ސިހުރު ހެދުމަށް ބޭނުންކުރާ އެއްވެސް އެއްޗެއް ފެނިފައި ނުވާކަމުގައެވެ.   

މައްސަލަ ހުށަހެޅުނު މެޖިސްޓްރޭޓް ކޯޓުން މިހާރު ވަނީ 30ހާސް ސޭޝެލްސް ރުޕީސް ނުވަތަ 2،100 ޑޮލަރުގެ ކަފާލާތު ބެހެއްޓުމަށްފަހު، ހަރމިނީއާއި ހަ މީހަކު ދޫކޮށްލާފައެވެ. ނަމަވެސް ޓެންޒޭނިޔާއަށް ނިސްބަތްވާ މީހާ، ނޮވެމްބަރު މަހު އޮންނަ އަޑުއެހުމާ ޖެހެންދެން ބަންދުގައި ބަހައްޓަން ކޯޓުން ނިންމާފައިވެއެވެ.

މީޑިއާ ރިޕޯޓްތައް ބުނާގޮތުން ހަރމިނީއާއި އޭނާގެ ބައިވެރިންގެ މައްޗަށްވަނީ އެތައް ކުށެއް ކުރިކަމުގެ ދައުވާ އުފުލާފައެވެ. އޭގެތެރޭގައި ސިހުރު ހެދުމަށް ބޭނުންކުރެވިދާނެ ތަކެތި ގެންގުޅުމާއި، ސިހުރު ހަދަން ރޭވުމާއި، އަދި އެކަންކުރާ ފަރާތްތަކުގެ ޚިދުމަތް ހޯދުން ހިމެނެއެވެ. ޕްރޮސެކިއުޓަރުން ބުނާގޮތުގައި ސިހުރު ހަދާކަމަށް ބެލެވޭ ޓެންޒޭނިޔާ މީހާއަށް ސޭޝެލްސްގެ ރައްޔިތަކު ފޮނުވި ވަޓްސްއެޕް މެސެޖެއްގައި ހަރމިނީގެ ނަން އައިސްފައި ވެއެވެ.

ޓެންޒާނިޔާ މީހާ ހައްޔަރުކޮށްފައި ވަނީ ސެޕްޓެމްބަރ 21 ވަނަ ދުވަހު މައި އިންޓަރނޭޝަނަލް އެއާޕޯޓުންނެވެ.