ކެޕްޓަން ސާޖިއޯ ރޮބާޓޯ އަށް ބާސެލޯނާ ދޫކޮށްލަން މަޖުބޫރުވެއްޖެ ކަމަށް ސްޕޭނުގެ ނޫސްތަކުން ބުނަން ފަށައިފި އެވެ.
އުމުރުން 31 އަހަރުގެ ޑިފެންޑަރަކަށް ބާސެލޯނާގެ ކެޕްޓަންކަން ލިބުނީ މި ސީޒަނުގަ އެވެ. އެއީ މިވަގުތު ޓީމުގައި ހުރި އެންމެ ސީނިއާ ކުޅުންތެރިޔާގެ ހައިސިއްޔަތުންނެވެ.
ނަމަވެސް އޭނާ އަށް ފުރަތަމަ 11އިން އެއްގޮތަކަށް ވެސް ޖާގަ ނުލިބޭތީވެ އަންނަ ސީޒަނުގައި އޭނާ އަށް ކުލަބުން ޖާގަ ނުލިބޭނެ ކަމަށް ސްޕޭނުގެ ނޫސްތަކުން ބުނެ އެވެ. ސަބަބަކީ ބާސެލޯނާއިން އޭނާގެ ކޮންޓްރެކްޓް އައުކުރީ އެއް އަހަރަށް ކަމަށްވާތީ އެވެ. އެ ކޮންޓްރެކްޓް މި ސީޒަނުގެ ނިޔަލަށް ހަމަވާނެ އެވެ.
ސާޖިއޯ ރޮބާޓޯ ކުޅޭ ކަނާތު ބެކުގެ ޕޮޒިޝަނަށް ފިޓްވާ ތިން ކުޅުންތެރިއަކު ޓީމުގައި އެބަތިއްބެވެ. އެއީ ޔާއޯ ކަންސެލޯ އާއި ހޫލްސް ކޫންޑޭ އާއި ރޮނަލްޑް އަރައުހޯ އެވެ. މިހެންވެ ކޯޗު ޒަވީ ހަނާންޑޭޒް އަންނަ ސީޒަނުގައި ޓީމު ވަރުގަދަ ކުރުމަށް އެހެން މަގާމަކަށް ކުޅުންތެރިއަކު ހޯދުމަށް ރޮބާޓޯ ދޫކޮށްލާނެ ކަމަށް ބާސެލޯނާގެ ވެރިންނާ ގާތް ފަރާތްތަކުން ވެސް ދަނީ ބުނަމުންނެވެ.
