ޔާމީން ގެކޮޅަށް ބަދަލުކުރައްވަން ރައީސް ސާލިހު ނިންމެވީ ގައުމުގެ މަސްލަހަތަށް ބައްލަވާފައި: އިންތިޚާބީ ރައީސް މުއިއްޒު
ގައުމުގައި މިހާރު ހުރި މައްސަލަތައް ހައްލުކުރެއްވުމުގައި ޔާމީންގެ ތަޖުރިބާއާއި ލަފާފުޅު ވަރަށް މުހިންމުވާނެ
އިންތިޚާބީ ރައީސް ޑރ. މުހައްމަދު މުއިއްޒު ނޫސްވެރިންނާ ވާހަކަފުޅު ދައްކަވަނީ
ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް ޔާމީން ގެކޮޅަށް ބަދަލުކުރައްވަން، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ނިންމެވީ މިވަގުތު ގައުމުގެ މަސްލަހަތަށް ބައްލަވާފައި ކަމަށް އިންތިޚާބީ ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ޔާމީން ގެކޮޅަށް ބަދަލުކޮށްފައިވަނީ އާދިއްތަ ދުވަހުގެ ހަވީރުގެ ވަގުތެއްގައެވެ.
އިންތިޚާބީ ރައީސް މުއިއްޒު ހ. ދޫވެހި ސަރަހައްދަށް ވަޑައިގަންނަވައި ނޫސްވެރިންނަށް މައުލޫމާތު ދެއްވަމުން ވިދާޅުވީ، ޔާމީން ގެކޮޅަށް ބަދަލުކުރުމުން މަސައްކަތްތަކަށް އިތުރު ފުރިހަމަ ކަމެއް އަންނާނެ ކަމަށެވެ. ގައުމުގައި މިހާރު ހުރި މައްސަލަތައް ހައްލުކުރެއްވުމުގައި ޔާމީންގެ ތަޖުރިބާއާއި ލަފާފުޅު ވަރަށް މުހިންމުވާނެ ކަމަށް އިންތިޚާބީ ރައީސް މުއިއްޒު ވިދާޅުވިއެވެ. އަދި ވިދާޅުވީ އެ މަސައްކަތްތައް ކުރިއަށް ގެންދަވާނީ ގާނޫނީ ހަމަތަކުގެ ތެރެއިން ކަމަށާއި، ޔާމީން ޖަލު ހުކުމެއްގައި ހުންނެވުމުން ކޮންމެވެސް ވަރެއްގެ ލިމިޓޭޝަންތަކެއް ހުންނާނެކަން ގަބޫލުކުރައްވާ ކަމަށެވެ.
ޔާމީން މިނިވަންކުރުމާ ގުޅޭގޮތުން އިންތިޚާބީ ރައީސް މުއިއްޒު ވިދާޅުވީ، އާދިއްތަ ދުވަހު ރައީސުލްޖުމްހޫރިއްޔާ އިބްރާހީމް މުހައްމަދު ސާލިހާ ބައްދަލުކުރެއްވީ ޓްރާންސިޝަން ޕީރިއަޑް ފެށުމާ ގުޅޭގޮތުން މަޝްވަރާ ކުރެއްވުމަށް ކަމަށެވެ. މި މަޝްވަރާ ބައްދަލުވުމުގައި ޔާމީން ގެކޮޅަށް ބަދަލުކޮށްދިނުމަށް އެދިވަޑައިގަތުމުން، އެއީ ގައުމުގެ މަސްލަހަތު އެންމެ ރަނގަޅު ގޮތް ކަމަށް ރައީސް ސާލިހު ވިދާޅުވެފައި ވާކަމަށް އިންތިޚާބީ ރައީސް މުއިއްޒު ވިދާޅުވިއެވެ.
އިންތިޚާބީ ރައީސް މުއިއްޒު ވިދާޅުވީ އުންމީދަކީ ޔާމީން އެއްކޮށް މިނިވަންވެ، މިނިވަންކަންމަތީގައި ވާހަކަފުޅު ދެއްކޭ ގޮތް ވުން ކަމަށެވެ. އަދި ވިދާޅުވީ މިއީ އަމިއްލަ މަސްލަހަތަށްވުރެ ގައުމުގެ މަސްލަހަތު އިސްކުރަންވީ ވަގުތުކަމަށާއި، މިވަގުތަކީ އެންމެން އެކަތިގަނޑަކަށް ވާންވީ ވަގުތު ކަމަށެވެ.
