މިދަނޑިވަޅުގައި ނިޒާމީ ވޯޓެއް ނެގުމަކީ ޤައުމުގެ ހަމަޖެހުން ގެއްލި ފަސާދައަށް މަގުފަހިވެގެންދާނޭ ކަމެއް: ގާސިމް
1 އޮކްޓޯބަރު 2023 | އާދީއްތަ 06:47ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކުރުމަށް ވަކާލާތު ކުރުން ހުއްޓާލުމަށް ގޮވާލެއްވި
ޖުމްހޫރީ ޕާޓީގެ ލީޑަރު ޤާސިމް އިބްރާހީމް
މިދަނޑިވަޅުގައި ނިޒާމީ ވޯޓެއް ނެގުމަކީ ޤައުމުގެ ހަމަޖެހުން ގެއްލި ފަސާދައަށް މަގުފަހިވެގެންދާނޭ ކަމެއް ކަމަށް ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލި ދާއިރާގެ މެންބަރު ގާސިމް އިބްރާހީމް ވިދާޅުވެއްޖެއެވެ.
އާދީއްތަ ދުވަހު ގާސިމް ކުރެއްވި ޓްވީޓެއްގައި ވިދާޅުވީ މި މަހުގެ 30 ވަނަ ދުވަހުގެ ކުރިން ނިޒާމީ ވޯޓެއް ނެގުމަށް މަޖިލީހުން ގަރާރެއް ފާސްކޮށް އިލެކްޝަންސް ކޮމިޝަނަށް ހުށަހަޅާފައިވީ ނަމަވެސް ރިޔާސީ އިންތިޚާބުގެ ދެ ބުރެއް ބާއްވައި ކުރިއަށް އޮތް ފަސް އަހަރަށް ރައީސެއް އިންތިިޚާބު ކޮށް މަޤާމުގެ ހުވާކުރުމުގެ ކުރީން ވެރިކަން ކުރަންވީ ކޮން ނިޒާމަކުން ތޯ ބެލުމަށް އަލުން ނިޒާމީ ވޯޓެއް ނެގުމަކީ ޤާނޫނު އަސާސީގެ ރޫހާ ޚިލާފު އަދި ބައިނަލްއަޤްވާމީ މުޖުތައުގައި އަމަލު ކުރާ އުސޫލުތަކާ ވެސް މުޅިން ޚިލާފުކަމެއް ކަމަށެވެ. އަދި އިންތިޚާބުގެ ނަތީޖާ ދިވެހި ރައްޔިތުންނާއި ބައިނަލްއަގުވާމީ މުޖުތަމައުން ގަބޫލު ކޮށްފައިވާކަން ވެސް އޭނާ ފާހަގަކުރެއްވިއެވެ.
ގާސިމް ވިދާޅުވި ގޮތުގައި މިފަދަ ދަނޑިވަޅެއްގައި ނިޒާމީ ވޯޓު ނެގުމަކީ މިހާތަނަށް ދުނިޔޭގެ އެއްވެސް ޤައުމަކުން އަމަލު ކޮށްފައިވާ ގޮތެއް ނޫން ކަމަށެވެ. އަދި ރައްޔިތުން ކުރިއަށް އޮތް ފަސް އަހަރު ދުވަހަށް ރައީސް އަކާއި ނައިބު ރައީސަކު އިންތިޚާބު ކޮށްފައި ވަނިކޮށް، ވެރިކަމުގެ ބާރުވެރިކަން ލިބުމުގެ ނިޔަތުގައި، ބާރުހުރި ފަރާތްތަކުން ޤާނޫނު އަސާސީ އާއި ޤާނޫނީ ވެރިކަމާއި، ޑިމޮކްރަސީގެ އަސާސްތަކާ ޚިލާފަށް، ވެރިކަމުގެ ނިޒާމު ކުއްލިއަކަށް ބަދަލުކުރުމުގެ ވިސްނުމުގައި މުޅި ނިޒާމު ގަނޑުބަނޑުކުރުމަކީ ޤައުމަށް ހެޔޮ އެދޭ އެއްވެސް ރައްޔިތަކު ޤަބޫލު ކުރާނޭކަމެއް ނޫންކަމަށް ވެސް ވިދާޅުވިއެވެ.
ތިމާމެން އެދޭގޮތް ހާސިލް ކުރުމަށް ނިޒާމީ ވޯޓެއް ނެގުމަކީ ދިވެހި ޤައުމުގެ ސިޔާސީ، އިޖްތިމާއީ އަދި އިގްތިސާދީ ހަމަޖެހުން ގެއްލި، ފަސާދައަށް މަގުފަހިވެގެންދާނޭ ކަމެއް ކަމުގައި މެނުވީ ނުވާނެކަން ފާހަގަކުރައްވައި ގާސިމް ވަނީ މިފަދަ ދަނޑިވަޅެއްގައި އެފަދަ ވޯޓެއް ނެގުމަށް ކުރާ މަސައްކަތުގެ ސަބަބުން ޤައުމުގައި އުފެދިގެންދާނީ، ފިތުނައާއި ފަސާދައިގެ އަލިފާނުގެ ހުޅުގަނޑު ނޫން ކޮން އެއްޗެއްތޯ ސުވާލު އުފައްދަވައިފައެވެ.
ގާސިމް ވިދާޅުވީ ނިޒާމީ ވޯޓުގެ ސަބަބުން މުޅި ޤައުމާއި ރައްޔިތުންނަށް ލިބިގެންދާނޭ ނިކަމެތިކަން ތަސައްވުރު ކުރެއްވޭ ކަމަށެވެ. އަދި މި ވޯޓަކީ ރާއްޖޭގެ ގިނަ ރައްޔިތުން ގަބޫލު ކުރާނެ ވޯޓެއް ނޫން ކަމަށާއި ތާއީދު ކޮށްގެންވާނޭ ވޯޓެއް ނޫން ކަމަށްވެސް ގަބޫލުފުޅު ކުރައްވާކަމަށް އޭނާ ވިދާޅުވިއެވެ.
މީގެ އިތުރުން ޤައުމުގެ ހަމަޖެހުމާއި، ކުރިމަގަށްޓަކައި ވެރިކަމުގެ ބާރުތައް ރައްޔިތުން އިންތިޚާބު ކުރި ފަރާތްތަކާއި ހަވާލުކޮށް، އަމާން ކަމާއި އޮމާން ކަމާއެކު ގައުމައިގެން ކުރިއަށްދިއުމަށް ގާސިމް އިލްތިމާސްކުރެއްވިއެވެ. އަދި ޤައުމު ދަރަނިވެރިވެފައިވާ މިންވަރުން ސަލާމަތް ކޮށް، ތަފާތު ރޮނގުރޮނގުގައި ޤައުމު ކުރިއަށް ގެންދެވޭނީ ޤައުމުގައި ސިޔާސީ އަދި އިޖްތިމާޢީ ހަމަޖެހުން ޤާއިމުވެފައި އޮތް މިންވަރެއްގެ މައްޗަށް ކަމަށްވާތީ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކުރުމަށް ވަކާލާތު ކުރުން ހުއްޓާލުމަށް އޭނާ ވަނީ މަޖިލީހުގެ މެމްބަރުންނަށް ގޮވާލައްވާފައެވެ.
ބަރުލަމާނީ ނިޒާމަކުން ފައިދާވާނީ މަޖިލިސް މެންބަރުންނާއި، މަދު ވޯޓުކޮޅަކުން މަޖިލީހަށް ވަޑައިގެން ބޮޑުވަޒީރުކަން ހޯއްދަވާ ފަރާތަށާއި، މަޖިލީހުގެ މެންބަރުންގެ ތެރެއިން ވަޒީރުންނަށް އައްޔަންކުރެވޭ މެންބަރުންނަށާއި، ސަރުކާރު ހިންގުމަށް ހަވާލު ކުރާ ފަރާތްތަކަށް ކަމަށް ވެސް ގާސިމް ވިދާޅުވިއެވެ.
