ގައުމުގެ ސިޔާސީ މަޝްރަޙު ހަލަބޮލިނުވާނޭހެން އަމަލުތައް ބެހެއްޓުމަށް އެޗްއާރްސީއެމުން އިލްތިމާސްކޮށްފި
ރިޔާސީ އިންތިޚާބު ކުރިއަށް ދަނިކޮށް ރައްޔިތުންގެ މަޖިލީހުގެ ދެ މެމްބަރަކަށް ހަމަލާ ދީފައިވޭ
އެޗްއާރުސީއެމް
ގައުމުގެ ސިޔާސީ މަޝްރަޙު ހަލަބޮލިނުވާނޭހެން އަމަލުތައް ބެހެއްޓުމަށް ރާއްޖޭގެ ހިއުމަން ރައިޓްސް ކޮމިޝަން އެޗްއާރްސީއެމުން އިލްތިމާސްކޮށްފިއެވެ.
ހޮނިހިރު ދުވަހު ބޭއްވި ރިޔާސީ އިންތިޚާބުގެ ދެވަނަ ބުރު، މާލެ ސިޓީގެ މޭޔަރު އަދި ޕީއެންސީގެ ކެންޑިޑޭޓް ޑރ. މުޙައްމަދު މުއިއްޒު ވަނީ ކާމިޔާބުކުރައްވާފައެވެ. އެޗްއާރްސީއެމުން ކުރި ޓްވީޓެއްގައި ބުނެފައި ވަނީ ދިމިޤްރާތީ އުޞޫލުން ރައްޔިތުން ބައިވެރިވެ ނިންމާ ނިންމުން ބަލައިގަތުމަށް ގޮވާލާ ކަމަށެވެ. އަދި ދިމިޤްރާތީ ގޮތުން ނިންމާފައިވާ ރައްޔިތުންގެ އެ ނިންމުމަށް އިޙްތިރާމުކުރުމަށް ވެސް އެ ކޮމިޝަންގެ ފަރާތުން ވަނީ އިލްތިމާސްކޮށްފައެވެ. ހަމައެހެންމެ ގައުމުގެ ސިޔާސީ މަޝްރަޙު ހަލަބޮލިނުވާނޭހެން އަމަލުތައް ބެހެއްޓުމަށް އެންމެހާ ފަރާތްތަކަށް އިލްތިމާސްކުރާ ކަމަށް ކޮމިޝަންގެ ފަރާތުން ވަނީ ބުނެފައެވެ.
ކޮމިޝަނުން ވަނީ މީގެ ކުރިން ވެސް ރިޔާސީ އިންތިޚާބަށް ފަހު ރާއްޖޭގެ ސުލްހަ މަސަލަސްކަން ޤާއިމްކުރުމަށް އިލްތިމާސްކުރައްވާފައެވެ. އެޗްއާރްސީއެމުން މިފަދަ އިލްތިމާސެއް ކޮށްފައި މި ވަނީ ރިޔާސީ އިންތިޚާބު ކުރިއަށް ދަނިކޮށް ރައްޔިތުންގެ މަޖިލީހުގެ ދެ މެމްބަރަކަށް ހަމަލާ ދީފައިވާ ދަނޑިވަޅެއްގައެވެ. އަދި އިންތިޚާބުގެ ފަހުން ވެސް ސިޔާސީ ޕާޓީތަކުގެ ދިދަތައް ކެނޑުމާއި ޕޯސްޓަރުތައް ހަލާކުކޮށް ވީދުން ފަދަ މަސްލަހަތު ގެއްލުމަށް މަގުފަހިވާ ކަންކަން ހިނގަމުންދާކަން ފާހަގަކޮށްލެވެއެވެ.
