ރިޔާސީ އިންތިޚާބުގެ ދެވަނަ ބުރުގައި ވޯޓުލުމުގެ ޙައްގު ލިބިގެންވާ މީހުންގެ ތެރެއިން 86 އިންސައްތައަށްވުރެ ގިނަ މީހުން ވޯޓު ލާފައިވާ ކަމަށް އިލެކްޝަންސް ކޮމިޝަނުން ބުނެފިއެވެ.
އީސީން ހޮނިހިރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެ ކޮމިޝަނުގައި ނައިބު ރައީސް އިސްމާއިލް ހަބީބު ވިދާޅުވީ މިހާތަނަށް ލިބިފައިވާ ވަގުތީ ޖަތީޖާއިން ދައްކާ ގޮތުގައި މި އިންތިޚާބުގައި 246000 މީހުންނަށް ވުރެ ގިނަ މީހުން ވޯޓުލާފައިވާ ކަމަށެވެ. ދެވަނަ ބުރުގައި 282،804 މީހުންނަށް ވޯޓުލުމުގެ ހައްގު ލިބުނެވެ.
ރިޔާސީ އިންތިޚާބުގެ ފުރަތަމަ ބުރުގައި 282،395 މީހުންނަށް ވޯޓުލުމުގެ ހައްގު ލިބުނުއިރު، ވޯޓުލީ 80 އިންސައްތައެއްހާ މީހުންނެވެ.
ހަބީބު ވިދާޅުވީ މި އިންތިޚާބަކީ ހުރިހާ ގޮތަކުން ވެސް ކާމިޔާބު އިންތިޚާބެއް ކަމަށެވެ. އަދި އިންތިޚާބުގެ ކަންކަން ކުރިއަށްދިޔައީ އަމާންކާމައެކުގައި ކަމަށާއި އިންތިޚާބުގެ ނަތީޖާއަށް ބަދަލު އަންނަވަރުގެ ކަމެއް ހިނގާފައިނުވާ ކަމަށް ވެސް އޭނާ ވިދާޅުވިއެވެ.
ވޯޓުލުން ފަށަން ނިންމާފައި އޮތް ގަޑިއަށް ހުރިހާ މަރުކަޒެއްގައި ވެސް ވޯޓުލުން ފަށާފައިވާކަން ފާހަގަކުރައްވައި ހަބީބު ވިދާޅުވީ ފުރަތަމަ ބުރުގައި ދިމާވި ކަންކަމުގެ ތަޖުރިބާގެ އަލީގައި ދެވަނަ ބުރު ބަދަލުތަކެއް ގެނައި ކަމަށެވެ. އެ ކަންކަމަކީ ރަނގަޅު ކަންކަންކަމަށް ގަބޫލުކުރައްވާ ކަމަށް ވެސް އޭނާ ވިދާޅުވިއެވެ.
އީސީން ރިޔާސީ އިންތިޚާބުގެ ދެވަނަ ބުރުގައި ވޯޓުލުމުގެ އިންތިޒާމުތައް ހަމަޖައްސާފައި ހުރިގޮތް ފުރިހަމަކަމަށް ބުނެ ގިނަ ބަޔަކު ވަނީ ސޯޝަލް މީޑިއާ މެދުވެރިކޮށް ވެސް އެ ކޮމިޝަނަށް ތައުރީފު ކޮށްފައެވެ.
ހަބީބު ވިދާޅުވި ގޮތުގައި އިންތިޚާބުގެ ދެވަނަ ބުރާ ގުޅިގެން މާލޭގައި ހުންނަ ކޮމްޕްލެއިންޓްސް ބިއުރޯއަށް 15 ޝަކުވާ އަދި އަތޮޅުތަކުގެ ބިއުރޯތަކަށް 15 ޝަކުވާ ހުށަހެޅިއެވެ. މީގެ ތެރެއިން ދެ ޝަކުވާއަށް ޖަވާބު ދީފައިވާއިރު 28 ޝަކުވާގެ ކަންކަން ބަލަމުން އަންނަ ކަމަށް އޭނާ ވިދާޅުވިއެވެ.
