ރޮނާލްޑޯގެ ލަނޑާއެކު އަލް ނަސްރު މޮޅުވެއްޖެ

ސައުދީ ޕްރޯ ލީގުގައި އަލް ޓާއީއާ ދެކޮޅަށް ކުޅުނު މެޗުން އަލް ނަސްރު މޮޅުވެއްޖެއެވެ.

ލީގު ފެށުނުކޮޅާ ގާތު ނަތީޖާ ދަށްވިނަމަވެސް، މިފަހުން އަލް ނަސްރު އަންނަނީ މޮޅު ކުޅުމެއް ދައްކަމުންނެވެ. ހުކުރު ދުވަހުގެ ރޭ އަލް ޓާއީއާ ދެކޮޅަށް ކުޅުނު މެޗު އެ ޓީމުން ކާމިޔާބު ކުރީ 2-1ންނެވެ. މެޗު ފަށައިގެން 32 ވަނަ މިނެޓުގައި އަލް ނަސްރުން ވަނީ ލަނޑު ޖަހައި ލީޑު ނަގާފައެވެ. އެ ޓީމަށް ލީޑު ނަގައިދިނީ ބްރެޒިލްގެ ޓަލިސްކާއެވެ. އޭގެ ފަހުން ފުރަތަމަ ހާފުގައި ލީޑު ފުޅާކުރުމަށް އަލް ނަސްރަށް ވަނީ ފުރުސަތު ލިބިފައެވެ. އަލް ޓާއީން މެޗުގެ ނަތީޖާ ހަމަހަމަކުރީ ދެވަނަ ހާފުގައެވެ. މެޗުގެ 79 ވަނަ މިނެޓުގައި އެ ޓީމަށް ނަތީޖާ ހަމަހަމަ ކޮށްދިނީ ވާޖިލް މިސްޖާންއެވެ. މެޗުން އަލް ނަސްރު މޮޅުކޮށްދިނީ ކެޕްޓަން، ކްރިސްޓިއާނޯ ރޮނާލްޑޯއެވެ. އެއީ 87 ވަނަ މިނެޓުގައި ލިބުނު ޕެނަލްޓީއެއް ކާމިޔާބުކޮށްގެން، ރޮނާލްޑޯ ޖެހި ލަނޑެކެވެ.

މޮޅާއެކު އަލް ނަސްރު ވަނީ ލީގު ތާވަލްގެ ހަތަރުވަނައަށް ޖެހިލާފައެވެ. އެއީ މިހާތަނަށް ލީގުގައި ކުޅުނު އަށް މެޗުން 18 ޕޮއިންޓު ހޯދައިގެންނެވެ. ކުޅުނު އަށް މެޗުގެ ތެރެއިން އެ ޓީމު ވަނީ ހަ މެޗުން މޮޅުވެފައެވެ. އަނެއް ދެ މެޗުން ވަނީ ބަލިވެފައެވެ.