ކާމިޔާބުގެ އައްސޭރި ފެންނަން ފަށައިފި: ޝާހިދު
28 ސެޕްޓެމްބަރު 2023 | ބުރާސްފަތި 17:15އުފާވެރި އަމާން ރާއްޖެއަށް ދިޔުމަށް ރާއްޖޭގެ ރައްޔިތުން ތިބީ ކެތްމަދުވެފައި
ފޮރިން މިނިސްޓަރު، އަބްދުﷲ ޝާހިދު
ކާމިޔާބުގެ އައްސޭރި ފެންނަން ފަށައިފި ކަމަށް, ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
ބުރާސްފަތި ދުވަހުގެ ރޭ ސޯސަން ޖަގަހަ ކުރިމަތީގައި އޮތް އުފާވެރި އަމާން ރާއްޖެ ކެމްޕޭން ޖަލްސާގައި ވާހަކަފުޅު ދައްކަވަމުން ޝާހިދު ވިދާޅުވީ، އުފާވެރި އަމާން ރާއްޖޭގެ އައްސޭރި ފެންނަ ކަމަށެވެ.
އުފާވެރި އަމާން ރާއްޖެއަށް ދިޔުމަށް ރާއްޖޭގެ ރައްޔިތުން ކެތްމަދު ވެފައިވާ ކަމަށާއި، އެކަމަށް އަޒުމް ކަނޑައަޅައިގެން ތިބިކަމަށެވެ.
ޝާހިދު ވިދާޅުވީ އުފާވެރި އަމާން ރާއްޖޭގެ ވާހަކަ ދައްކަން ފެށުމުން އިދިކޮޅުގެ މޭ ކަރައިފި ކަމަށާއި، އެމީހުންގެ ތަސައްވަރެއް ނެތް ކަމަށެވެ.
އުފާވެރި އަމާން ރާއްޖޭގައި ތައުލީމީ ޖީލެއް އޮންނަން ރައީސް ބޭނުންފުޅުވާތީ، ހިލޭ ޑިގްރީ ޕްރޮގްރާމު ތައާރަފު ކުރެއްވި ކަމަށް ވިދާޅުވިއެވެ.
ޝާހިދު އިތުރަށް ވިދާޅުވީ ފިތުނައިގެ ދޮލަނގުގެ ދެވަނާގައި އޮތީ އުތުރުތިލަފަޅުގެ ވާހަކަ ކަމަށާއި، އެތަނުގައި ގާއިމުކުރަނީ ރާއްޖޭގެ ކޯސްޓްގާޑުގެ ބަނދަރެއް ކަމަށެވެ.
ހުރިހާ ރައްޔިތުންވެސް ވަކިވަކިން ގޮސް މީހުންނަށް ހަގީގަތް އޮޅުންފިލުވައިދޭން ޖެހޭނެ ކަމަށާއި، ރާއްޖެ ޚަރާބުގެ މަގަށް ރައީސް ދިޔަ ނުދެއްވާނެ ކަމަށްވެސް ވިދާޅުވިއެވެ.
ޝާހިދު އިތުރަށް ވިދާޅުވީ، އިދިކޮޅުން މަސައްކަތްކުރަނީ ރައްޔިތުންގެ މެދުގައި ފިތުނައާއި ނަފްރަތާއި ރުޅިވެރިކަން އުފައްދަން ކަމަށެވެ.
