ޕްލާސްޓިކް މާއްދާތަކުން އުފެއްދި ވެނީލާ އައިސްކްރީމް: ކާލަން ކެރޭނެތަ؟
އަދި އެ އެއްޗެއް ކެއުމުގައި ހިމެނުމަށް އިންސާނުން ތައްޔާރުވެފައި ވަނީ ކޮންކޮން ބާވަތްތަކެއްތޯއާއި، ނުކާނީ ކޮންކޮން ބާވަތްތަކެއްތޯ ބެލުން
"ގިލްޓީ ފްލޭވަރޒް"ގެ ނަން ދީފައިވާ އައިސްކްރީމުގެ ފަންނުވެރި މޭސްތިރިއަކީ އުމުރުން 27 އަހަރުގެ އިލިއޮނޯރާ އުރުތުލާނީ
އުފެއްދި ފަރާތުން ބުނާގޮތުގައި ދުނިޔެއިން ލިބެންހުރި ކާބޯތަކެތީގެ ލިސްޓުގައި، ޕްލާސްޓިކުން ތައްޔާރުކޮށްފައިވާ ފުރަތަމަ އުފެއްދުމަކީ އޭނާގެ ވެނީލާ އައިސްކްރީމްއެވެ. ލަންޑަންގެ ފްރީޒަރެއްގައި އެ އައިސްކްރީމް މިއަދު ތަޅުލާފައި ހުއްޓެއްކަމަކު، އުފެއްދި ފަރާތުގެ އުއްމީދަކީ ކާބޯތަކެތީގެ ކުރިމަގާއި ޕްލާސްޓިކުން ތަޣައްޔަރުވެފައިވާ ވުމާ ބެހޭގޮތުން ހޫނުގަދަ ބަހުސްތަކެއް ކުރެވިގެން ދިއުމެވެ.
"ގިލްޓީ ފްލޭވަރޒް"ގެ ނަން ދީފައިވާ އައިސްކްރީމުގެ ފަންނުވެރި މޭސްތިރިއަކީ އުމުރުން 27 އަހަރުގެ އިލިއޮނޯރާ އުރުތުލާނީއެވެ. އޭނާގެ މަގުސަދަކަށްވީ، ކުނީގެ ގޮތުގައި އުކާލާ ޕްލާސްޓިކާމެދު މީހުން ދެކޭގޮތަށް ގޮންޖެހުމެވެ. އަދި އެ އެއްޗެއް ކެއުމުގައި ހިމެނުމަށް އިންސާނުން ތައްޔާރުވެފައިވަނީ ކޮންކޮން ބާވަތްތަކެއްތޯއާއި ނުކާނީ ކޮންކޮން ބާވަތްތަކެއްތޯ ބެލުމެވެ.
އެޑިންބްރަރގެ ސައިންސްވެރިން ތަރައްގީކުރި މި މަރުހަލާގައި، ބެކްޓީރިއާއާއި އެންޒައިމްތަކުގެ މެޓަބޮލިކް ބާރު ބޭނުންކޮށްގެން، ވެއްޓާ ރައްޓެހި ކާރުޚާނާތަކެއްގެ ގޮތުގައި މަސައްކަތްކޮށް، ޕޮލިއެތިލިން ޓެރެފްތަލެޓް (ޕީއީޓީ) ހަޖަމުކޮށް، ވެނީލާގެ ރަހަދޭ މޮލިކިއުލް ކަމަށްވާ ވެނިލިންއަށް ބަދަލުކުރެއެވެ.
ޕްލާސްޓިކް އުފައްދަނީ ގުޅިފައިވާ މޮލެކިއުލްތަކެއް އެއްކޮށްގެންނެވެ. އެއަށް މި ކިޔަނީ ޕޮލިމަރޒްއެވެ. ޔުނިވަރސިޓީ އޮފް އެޑިންބްރަރގެ ބަޔޯޓެކްނޮލޮޖިސްޓެއް ކަމަށްވާ ޑރ. ޖޮއޭނާ ސޭޑްލަރގެ މަސައްކަތަކަށް ވީ، ހައިވެފައި ވާ މައިކްރޯބެއް ބޭނުންކޮށްގެން، އެކުވެފައިވާ މޮލެކިއުލްތައް ބައިބައިކޮށްލުމެވެ. އެހާ ހިސާބުން އެ މޮލެކިއުލްތަކަކީ ޕްލާސްޓިކު ކަމަކަށް ނުބުނެވޭނެއެވެ. އެއަށްފަހު، ކުރިން އޮތް ޕީއީޓީ "ރިހަގަނޑު" ފަސޭހަކަމާއެކު އެހެން ބެކްޓީރިއާއަކަށް ބަދަލުކުރީއެވެ. އެއީ ވެނިލިން ނުވަތަ ވެނީލާގެ ރަހަ ލައްވައިދޭ މާއްދާއެވެ.
ޑރ. ސޭޑްލަރގެ މި ދިރާސާއަކީ ޑިސެމްބަރު 2021ގައި، "ޖަރނަލް ބަޔޯކެމިސްޓް"ގައި ވެސް ޝާއިއުކޮށްފައިވާ ދިރާސާއެކެވެ. އުރުތުލާނީގެ ޕްރޮޖެކްޓް ކުރިއަށް ގެންދިއުމަށް ބޭނުންވި "ބަގްތައް" ތައްޔާރުކޮށްދިނީ ޑރ. ސޭޑްލަރއެވެ. އުރުތުލާނީގެ ޕްލާސްޓިކް ވެނީލާ އައިސްކްރީމަކީ ދިރާސާ މަޝްރޫއެކެވެ. އިންސާނުންގެ އަރުތެރެއިން އަދި ދިރޭކަށް ނެތެވެ.
އިޓަލީގެ ވެރޯނާއަށް ނިސްބަތްވާ އުރުތުލާނީ ބުނިގޮތުގައި، ގިލްޓީ ފްލޭވަރސް އުފައްދަން ޚިޔާލު އައީ، ޕްލާސްޓިކުން ތިމާވެށި ތަޣައްޔަރުވުން ހުއްޓުވުމަށް، ރީސައިކަލް ކުރުމުގެ ނިޒާމް ނާކާމިޔާބުވުމުން ލިބުނު މާޔޫސްކަމުން ކަމެއްގެ ބޮޑު ކަމުންނެވެ. އަދި އެއީ ދުނިޔެއަށް ކުރިމަތިވަމުން ދާ ކާބޯތަކެތީގެ ކަށަވަރުކަން ނެތިދިއުމުގެ ކާރިސާއަށް އަލިއަޅުވާލަނިވި ކަމެއްގެ ގޮތުގައިވެސްމެއެވެ.
ބައެއް ފަހަރު ފެހި ރަނުގެ ގޮތުގައިވެސް ރިއާޔަތްކުރަމުން އަންނަ ވެނީލާއަކީ، ކާބޯތަކެތީގައި ރަހަ ހެޔޮވަރުކުރުމަށް ބޭނުންކުރާ އެކިއެކި ބާވަތްތަކުގެ ތެރެއިން ދެވަނައަށް އެންމެ އަގު ބޮޑު ބާވަތެވެ. ލިސްޓުގެ އެއްވަނަ ގެންދަނީ ސެފްރޯނެވެ.
