ކުޑަކުއްޖަކަށް އަނިޔާކުރި މައްސަލައެއް ޖެންޑަރއިން ބަލަނީ
ދައުރުވަމުންދާ ވީޑިއޯއިން ފެންނަނީ އިތުބާރުހުރި މަގާމެއްގައި ހުރި މީހަކު ކުއްޖާއަށް އަނިޔާކުރާ މަންޒަރު
ޖެންޑަރ މިނިސްޓްރީ
ކުޑަކުއްޖަކަށް އަނިޔާކުރި މައްސަލައެއް, ޖެންޑަރ މިނިސްޓްރީން ބަލަން ފަަށައިފިއެވެ.
ޖެންޑަރ މިނިސްޓްރީން ބުނީ ކުޑަކުއްޖަކަށް އަނިޔާކުރާ މަންޒަރު ފެންނަ ވީޑިއޯއެއް ސޯޝަލް މީޑިއާގައި ދައުރުވަމުންދާ މައްސަލަ ވަނީ މިނިސްޓްރީގެ ސަމާލުކަމަށް އައިސްފައި ކަމަށެވެ. އަދި އެ މިނިސްޓްރީން ވަނީ ކުއްޖާގެ ރައްކާތެރިކަން ކަށަވަރުކުރުމަށް އަޅަންޖެހޭ ފިޔަވަޅުތައް އަޅާފައި ކަމަށް އެ މިނިސްޓްރީން ވަނީ ބުނެފައެވެ. ޖެންޑަރ މިނިސްޓްރީން ބުނީ މިހާދިސާއާ ގުޅިގެން ކުއްޖާ ވަނީ ރައްކާތެރި މާހައުލަކަށް ބަދަލުކުރެވިފައި ކަމަށެވެ.
ދައުރުވަމުންދާ ވީޑިއޯއިން ފެންނަނީ، އިތުބާރު ހުރި މަގާމެއްގައި ހުރި މީހަކު ކުއްޖާއަށް އަނިޔާކުރާ މަންޒަރެވެ.
މިފަދަ ހާދިސާއެއް ފެނިއްޖެނަމަ ސޯޝަލް މީޑިއާގައި ވީޑިއޯ/ ފޮޓޯ ހިއްސާނުކޮށް، ވީ އެންމެ އަވަހަށް މިނިސްޓްރީގެ ނަންބަރ 1412 ނުވަތަ ދިވެހި ފުލުހުންގެ ނަންބަރ 3322111 ގުޅުއްވާ މައުލޫމާތު ހިއްސާކުރުމަށް އެ މިނިސްޓްރީން އިލްތިމާސްކުރެއެވެ. އަދި އެފަދަ ވީޑިއޯތައް ދައުރުކުރުމަކީ ކުޑަކުދިންގެ ކަރާމާތަށްވެސް އުނިކަން ލިބޭފަދަ ކަމަކަށް ވުމުން، އެފަދަ ކަންކަން ނުކުރުމަށް ކަމާބެހޭ އިދާރާތަކުން އިލްތިމާސްކުރެއެވެ.
