"އެ ކުރެވުނީ އެންމެ ރަނގަޅު ގޮތަށް، އެންމެ ރަނގަޅުވަގުތުގައި ނޫންކަން ލަސްތަކެއް ނުވެ ފެނުމުގެ ވަރަށް ބޮޑު ފުރުސަތެއް އެބައޮތް"
27 ސެޕްޓެމްބަރު 2023 | ބުދަ 14:55އަޅުގަނޑުމެންގެ މި ކެމްޕޭނަކަށް މާބޮޑު ހުއްޓުމެއް ނާންނާނެ
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހާއި އެމްޑީއޭގެ ލީޑަރު އަހުމަދު ސިޔާމް މުހައްމަދު
މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)އަށް، ކޯލިޝަނާ ވަކިވެ އިދިކޮޅާ ގުޅުމަކީ އެންމެ ރަނގަޅު ގޮތަށް، އެންމެ ރަނގަޅު ވަގުތުގައި ނޫންކަން ލަސްތަކެއްނުވެ ފެނުމުގެ ވަރަށް ބޮޑު ފުރުސަތެއް އެބައޮތް ކަމަށް، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް ވިދާޅުވެއްޖެއެވެ.
ރިޔާސީ އިންތިޚާބުގެ ދެވަނަ ބުރުގެ ކެމްޕޭނަށް ދެކުނުގެ ތިން ސިޓީއަކަށް ކުރެއްވި ދަތުރުފުޅުގެ ތެރެއިން ރާއްޖެޓީވީއާ ވާހަކަފުޅުދައްކަވަމުން ރައީސް ވިދާޅުވީ، ކުރީ ބުރާ ޚިލާފަށް މާ އޮގަނައިޒްކޮށް ކަންތައްތައް ރާވައިގެން ވަރަށް ވިސްނުންތެރިކަމާއެކު ކުރިއަށްގެންދާތަން ފެނިވަޑައިގަންނަވާ ކަމަށެވެ. އިރާދަކުރެއްވިޔާ ތިން ސިޓީންވެސް ކުރިއާ އަޅައިބަލާއިރު ބޮޑު ތަފާތެއް ފެނިގެންދާނެކަމަށް ރައީސް ވިދާޅުވިއެވެ. ރައީސް ވިދާޅުވީ އެމްޑީއޭ ވަކިވުމަކީ އެއްވެސް ހާލެއްގައި ކަންބޮޑުވާންވީ ކަމެއް ކަމުގައި ދެކެވަޑައިނުގަންނަވާ ކަމަށެވެ. އެހެންނަމަވެސް އެކުގައި މަސައްކަތް ކުރި އެންމެ މީހަކުވެސް ވަކިވުމަކީ ދެރަކަމެއް ކަމަށެވެ.
ރައީސް ވިދާޅުވީ ބޭނުންފުޅުވަނީ އެކީގައި މަސައްކަތް ކުރައްވަން ކަމަށާއި، އެމްޑީއޭއިން ފުރަތަމަ ބުރުގައި ކުރި މަސައްކަތާއި ދެއްވި ތާއީދަށްޓަކައި ރައީސް ވަނީ ޝުކުރު އަދާކުރައްވާފައެވެ.
ރައީސް ވިދާޅުވީ، ރިޔާސީ އިންތިޚާބުގެ ދެވަނަ ބުރުގެ ނަތީޖާއާ ދޭތެރޭގައި ވަރަށް ބޮޑު އުއްމީދެއް އެބައޮތް ކަމަށާއި، ބޮޑު ތަފާތަކުން އިންތިޚާބު ކާމިޔާބުކުރައްވާނެ ކަމަށެވެ.
ރިޔާސީ އިންތިޚާބުގެ ފުރަތަމަ ބުރުގައި އެމްޑީޕީ ކޯލިޝަންގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ އަރިހުގައި އެމްޑީއޭގެ ރައީސް އަދި މީދޫ ދާއިރާގެ މެމްބަރު އަހުމަދު ސިޔާމް މުހައްމަދު ފެނިގެން ދިޔަނަމަވެސް، ފުރަތަމަބުރުގެ ނަތީޖާއަށްފަހު އެއްގޮތަކަށްވެސް ސިޔާމް ދެވަނަ ބުރުގެ ކެމްޕެއިން ތެރެއިން ފެނިފައިނުވެއެވެ. އެމްޑީއޭގެ އެހެން ބޭފުޅުން އެމްޑީޕީއާއެކު ކެމްޕެއިންތަކުން ފެނިގެންގޮސްފައި ވާއިރު، ދެވަނަ ބުރުގެ ވޯޓުލާން ތިން ދުވަހަށް ވެފައިވަނިކޮށް އަންގާރަ ދުވަހުގެ ރޭ އެމްޑީއޭއިން ވަނީ ދެވަނަ ބުރުގައި އަމަލުކުރާނެ ގޮތެއް ކަނޑައެޅުމަށް ކައުންސިލް ބައްދަލުވުމެއް ބާއްވާފައެވެ.
މީގެ އިތުރުން ކައުންސިލް ބައްދަލުވުމުގައި ރައީސް ސާލިހާއެކު ކުރިޔަށްދާން ހުށަހެޅި ހުށަހެޅުމަށް ތާއީދު ނުލިބި، އެމްޑީއޭ ކައުންސިލުގެ ތާއީދު ލިބުނީ ދެވަނަ ބުރުގައި ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ތާއީދުކުރުމަށެވެ.
