އަނިޔާވެރިކަމަށް ވޯޓުދީގެން ނުވާނެ
އައްޑޫ ސިޓީގެ މޭޔަރު އަލީ ނިޒާރު ވާހަކަދައްކަވަނީ
ކުރީގެ ރައީސް އަދި މިހާރު ޖަލު ހުކުމެއް ތަންފީޒުކުރައްވަމުން ގެންދަވާ އަބްދުﷲ ޔާމީންގެ ސިޔާސަތު ނޫން އެހެން ސިޔާސަތެއް ޕީއެންސީގެ ރިޔާސީ ކެންޑިޑޭޓު ޑރ.މުހައްމަދު މުއިއްޒު ގެންނަވާނެ ކަމަށް ވިސްނާ ވިސްނުމަކީ ކުންހީއެއް ކަމަށް އައްޑޫ ސިޓީގެ މޭޔަރު އަލީ ނިޒާރު ވިދާޅުވެއްޖެއެވެ.
ބުދަ ދުވަހު އައްޑޫސިޓީ ހިތަދޫގައި ބޭއްވި ކެމްޕޭން ޖަލްސާގައި ނިޒާރު ވިދާޅުވީ ޔާމީންގެ ވެރިކަމުގައި ރައްޔިތުންނަށް ދިން ހުރިހާ އަނިޔާއެއްގައި އެއަށް އެއްބާރުލުން ދެއްވުމަށް އެންމެ ކައިރީގައި ހުންނެވީ ޑރ.މުއިއްޒު ކަމަށާއި، އެބޭފުޅާ ވެރިކަމަށް އަތުވެދާނެ ކަމުގެ ބިރު އެބައޮތް ކަމަށެވެ.
ޑރ.މުއިއްޒާއި، ޔާމީން ތަފާތުތަކެއް ހުންނާނެ ކަމަށް ގަބޫލުކޮށް، ތަފާތު ސިޔާސަތުތަކެއް ތަންފީޒު ކުރާނެ ކަމަށް ގަބޫލުކުރުމަކީ ކުންހީއެއް ކަމަށާއި، އެގޮތަށް ވިސްނުމަކީ ވެސް ކުރަން ހެޔޮވާވަރުގެ ކަމެއް ނޫން ކަމަށް ނިޒާރު ވިދާޅުވިއެވެ.
ގައުމުތައް ފަނާވެދާ ސަބަބުތަކަށް އިޝާރާތް ކުރައްވައި ނިޒާރު ވިދާޅުވީ އަނިޔާވެރިކަމަށް ވޯޓުދީގެން ނުވާނެ ކަމަށާއި، އަނިޔާއަކީ ފަނާވެދާ ސަބަބެއް ކަމަށެވެ. ރައީސް ސާލިހު ވެރިކަން ކުރެއްވި ގޮތް ވަރަށް ސާފު ކަމަށާއި، ރާއްޖޭގެ ރައްޔިތުން އެދުނު ހުރިހާ ކަމެއް އެމަނިކުފާނު ކޮށްދެއްވި ކަމަށެވެ. އަދި ވިދާޅުވީ އުފާވެރިކަމާއެކު ސުލްހަމަސަލަސްކަމާއެކު ދިރިއުޅުމުގެ ފުރުސަތު ފަހިކޮށްދީފައިވާ ކަމަށާއި، ތަފާތު ފިކުރުތަކަށް އިހުތިރާމްކޮށް ފުރުސަތު ފަހިކޮށްދިން ކަމަށެވެ.
