ބަލިވުމުގެ ޒިންމާ އަހަރެން ނަގަން: އަންޗެލޮޓީ

ސްޕެނިޝް ލީގުގައި އެތުލެޓިކޯ މެޑްރިޑާ ދެކޮޅަށް ކުޅުނު މެޗުން ރެއާލް މެޑްރިޑު ބަލިވުމުގެ ޒިންމާ ނަގާނެ ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.

އެތުލެޓިކޯގެ ދަނޑުގައި އެ ޓީމާ ދެކޮޅަށް ކުޅުނު މެޗުން ރެއާލް ބަލިވެފައި ވަނީ 3-1 އިންނެވެ. މިއީ މި ސީޒަންގެ ސްޕެނިޝް ލީގުގައި ރެއާލް މެޑްރިޑު ބަލިވި ފުރަތަމަ މެޗެވެ. މި ނަތީޖާ އާއެކު އަލުން އެއް ވަނަ އަށް ޖެހިލަން ލިބުނު ފުރުސަތު ވެސް ރެއާލަށް ވަނީ ގެއްލިފަ އެވެ.

އެ މެޗަށްފަހު ވާހަކަ ދައްކަމުން އަންޗެލޮޓީ ބުނީ، ބަލިވުމުގެ ޒިންމާ އޭނާ ނަގާ ކަމަށެވެ. އަދި ބަލިވީ އޭނާ އަށް ހެދުނު ގޯސްތަކެއްގެ ސަބަބުން ކަމަށް ވެސް އަންޗެލޮޓީ ވަނީ ބުނެފަ އެވެ. ނަމަވެސް އެކަމުގެ މާ ބޮޑު ތަފްސީލެއް އޭނާ ދީފައެއް ނުވެ އެވެ. އިތުރަށް ވާހަކަ ދައްކަމުން އަންޗެލޮޓީ ބުނީ، ހުރިހާ ލީގެއްގައި ވެސް ކޮންމެ ޓީމަކީ ވަރަށް ވަރުގަދަ ޓީމުތަކެއް ކަމަށެވެ. ނޫން ނަމަ، ލީގަށް ވާދަކުރެވޭ ފެންވަރުގެ ގިނަ ޓީމުތަކެއް އޮތް ކަމަށް އޭނާ ބުންޏެވެ. އަންޗެލޮޓީ ބުނީ ކޮންމެ މެޗަކުން މޮޅުވުމަކީ ޓީމަކަށް އުނދަގޫވާނެ ކަމެއް ކަމަށާއި، ބަލިވާ ވަގުތު ވެސް އަންނާނެ ކަމަށެވެ. ޚާއްސަކޮށް ފުޓުބޯޅައިގެ ރީތިކަން ބިނާވެގެން ވަނީ އެކަންކަމުގެ މައްޗަށް ކަމަށް ވެސް އޭނާ ވަނީ ބުނެފަ އެވެ.

ކުރިއަށް އޮތް މެޗުތަކާ ގުޅޭ ގޮތުން އަންޗެލޮޓީ ބުނީ، ރެއާލަކީ އެއްވެސް އިރެއްގައި މާޒީ އަށް ބަލަހައްޓައިގެން ތިބޭނެ ޓީމެއް ނޫން ކަމަށެވެ. އެހެންކަމުން ދެން މަސައްކަތް ކުރާނީ ކުރިއަށް އޮތް މެޗުން ރަނގަޅު ނަތީޖާއެއް ނެރުމަށް ކަމަށާއި، ލީގު އަތުން ދޫވެގެން ނުދާ ކަމަށް އޭނާ ވަނީ ބުނެފަ އެވެ.

ލީގުގައި ދެން ރެއާލަށް އޮންނާނީ އަމިއްލަ ދަނޑުގައި ސެޕްޓެމްބަރު މަހުގެ 27 ވަނަ ދުވަހު ލަސް ޕަލްމާސްއާ ދެކޮޅަށް ކުޅޭ މެޗެވެ.