އަލްހަލައިފީގެ ރައްދު މެސީ އަށް: ޕީއެސްޖީއަކީ ފްރާންސްގެ ކުލަބެއް

ޕީއެސްޖީގެ ރައީސް ނަސީރު އަލް ހަލައިފީ އޭނާގެ ޓީމަށް މިދިޔަ ދެ އަހަރު ކުޅުނު ދުނިޔޭގެ އެންމެ މޮޅު ކުޅުންތެރިޔާ އާޖެންޓީނާގެ ކެޕްޓަން ލަޔޮނަލް މެސީ ރައްދުދީފި އެވެ.

އެއީ ވޯލްޑްކަޕް ކާމިޔާބުކުރުމުން ކުލަބުގައި އެ އުފާފާޅު ކުރަން ނުލިބުނު ހަމައެކަނި ކުޅުންތެރިއަކީ ތިމަންނާ ކަމަށް މެސީ މިހަފުތާގައި ބުނުމާ ގުޅިގެންނެވެ. މިދިޔަ އަހަރުގެ ޑިސެމްބަރު މަހު އާޖެންޓީނާ ދުނިޔޭގެ ޗެމްޕިއަންކަން ހޯދީ ފައިނަލުގައި ފްރާންސް ޕެނަލްޓީ ޖަހައިގެން ބަލިކޮށްގެންނެވެ.

ގަތަރުގެ މަހުޖަނު ބުނީ މެސީ ދެއްކި ކޮން ވާހަކައެއްކަން އޭނާ އަށް ޔަގީންނުވާ ކަމަށެވެ. ނަމަވެސް ވަރަށް އިހްތިރާމާއެކު ބުނަން ޖެހެނީ ޕީއެސްޖީން މެސީގެ ކާމިޔާބީ ފާހަގަކުރިކަން ކަމަށެވެ.

އޭނާ އަދި ބުނީ މެސީ ވޯލްޑްކަޕް ކާމިޔާބުކުރުމުގެ އުފަލުގައި ބޮޑު ޕާޓީއެއް ދަނޑުގައި ނުބޭއްވުނީ ކުލަބާއި ސަޕޯޓަރުންނާއި އެޓީމުގައި ތިބި ފްރާންސް ކުޅުންތެރިންނަށް އިހްތިރާމް ކުރުމުގެ ގޮތުން ކަމަށެވެ.

މިދިޔަ ހަފުތާގައި މެސީ ބުނެފައިވަނީ ޕީއެސްޖީން އޭނާގެ ކާމިޔާބީ ފާހަގަ ނުކުރާނެކަން ވެސް ކުރިން ވެސް އެނގޭ ކަމަށެވެ.

ބާސެލޯނާ އަށް 18 އަހަރު ކުޅެދިނުމަށްފަހު މިދިޔަ 2 އަހަރު ޕީއެސްޖީން ކުޅުނު މެސީ މިދިޔަ މެއި މަހު ކުލަބު ދޫކޮށްލީ ޕީއެސްޖީގެ ސަޕޯޓަރުންނާ ރަނގަޅު ގުޅުމެއް ނެތުމުންނާ ވެސް އެކުގަ އެވެ. އޭނާ އަށް ބައެއް މެޗުގައި އެންމެ މޮޅަށް ނުކުޅެވުމުން އެކުލަބުގެ ސަޕޯޓަރުން މަލާމާތްކުރުމަކީ މެސީ ކޮންޓްރެކްޓް އާނުކުރި ސަބަބެކެވެ.