ސްޓޫޑެންޓް ލޯނު - ފީ ޝީޓުގައި ސޮއިކުރާތާ 5 ދުވަހުގެ ތެރޭގައި ފައިސާ ލިބޭނެ
24 ސެޕްޓެމްބަރު 2023 | އާދީއްތަ 15:52ލިޔުންތައް ހަމަނުވުމުން ފައިސާ ދޫކުރުމުގައި ލަސްވާ ކަމަށް މިނިސްޓްރީން ވަނީ ބުނެފައި
ސްޓޫޑެންޓް ލޯނު
2023 ވަނަ އަހަރު ސްޓޫޑެންޓް ލޯނު ލިބުނު ދަރިވަރުންނަށް، ފީ ޝީޓުގައި ސޮއިކުރާތާ 5 ދުވަހުގެ ތެރޭގައި ފައިސާ ލިބޭނެ ކަމަށް ހަޔަރ އެޑިއުކޭޝަން މިނިސްޓްރީން ބުނެފިއެވެ.
އެ މިނިސްޓްރީން ބުނީ 2023 ވަނަ އަހަރު މަތީ ތައުލީމާއި ތަމްރީނަށް ދޭ ލޯނު އެހީގެ ދަށުން ލޯނަށް ކުރިމަތިލާފައިވާ، ޝަރުތު ފުރިހަމަވާ 1275 ދަރިވަރުންނަށް ލޯނު ހަމަޖެހިފައި ވާކަމަށެވެ. މިއީ އެހެން އަހަރުތަކާއި އަޅައިބަލާއިރު ގިނަ އަަދަދެއްގެ ދަރިވަރުންނަށް ލޯނު ލިބުނު އަހަރެއްކަމަށް އެ މިނިސްޓްރީން ވިދާޅުވިއެވެ. އެގޮތުން 2019 ވަނަ އަހަރު 249 ދަރިވަރުންނަށް، 2020 ވަނަ އަހަރު 514 ދަރިވަރުންނަށް، 2021 ވަނަ އަހަރު 450 ދަރިވަރުންނަށް ވަނީ ލޯނު ދޫކޮށްފައެވެ. އަދި 2022 ވަނަ އަހަރު 454 ދަރިވަރުންނަށް ލޯނު ދޫކުރިއެެވެ.
2023 ވަނަ އަހަރުގެ ޖުލައި 4ގައި ލޯނު ލިބުނުކަމުގެ ލިޔުން ލިބުނު ދަރިވަރުންނާ ހަވާލުކުރިފަހުން ލޯނުގެ ފައިސާ ހަމަޖައްސައިދޭން އެދުނީ 760 ދަރިވަރުންނެވެ. އެ ދަރިވަރުންގެ ފޯމުތައް ދަނީ ޕްރޮސެސް ކުރަމުންނެވެ.
20 ސެޕްޓެމްބަރުގެ ނިޔަލަށް ގިނަ ދަރިވަރުންނަށް ވަނީ ފައިސާ ދޫކޮށްފައި ކަމަށް އެ މިނިސްޓްރީން ވަނީ ބުނެފައެވެ. ލޯނަށް ހޮވޭ ދަރިވަރުންނަށް ފައިސާ ދޫކުރެވޭނީ އެކަމަށް އެދޭ ފޯމު ފުރިހަމަކޮށް، ހުށަހަޅަން ޖެހޭ ލިޔުންތައް ފުރިހަމަވުމުން ކަމަށް އެ މިނިސްޓްރީން ވަނީ ބުނެފައެވެ. ލިޔެކިޔުންތައް ފުރިހަމަވުމުން ލޯނުގެ ފީ ޝީޓް ތައްޔާރުކޮށް ދަރިވަރު ސޮއިކުރުމުން، ލޯނު އެގްރީމެންޓުގައި ސޮއިކުރާނެ ކަމަށް ވަނީ ބުނެފައެވެ. އަދި އެއަށްފަހު ދަރިވަރަށް ފައިސާ ދޫކުރާނެކަމަށް ބުނެފައިވެއެވެ.
މީގެ އިތުރުން ދަރިވަރު ލޯނަށް ހޮވުނުކަން އެންގުމަށް ތަފްސީލީ ސްޕޮންސަރޝިޕް ލިޔުމެއް ކިޔަވަން އެދޭ ޔުނިވަރސިީ/ކޮލެޖަށް ހުށަހެޅުމަށް ބޭނުންވާނަމަ ސްޕޮންސަރޝިޕް ލިޔުން ދޫކުރުމަށް ހަމަޖެހިފައި ވާކަމަށް އެ މިނިސްޓްރީން ވަނީ ބުނެފައެވެ. އަދި ލިޔުންތައް ހަަމަނުވުމުން، ފައިސާ ދޫކުރުމުގައި ލަސްވާކަމަށް މިނިސްޓްރީން ވަނީ ބުނެފައެވެ.
