ސިފްކޯ ހިޔާއާ ގުޅޭގޮތުން ދޮގު ވާހަކަ ނުފެތުރުމަށް އެމްއެންޑީއެފުން އިލްތިމާސްކޮށްފި
24 ސެޕްޓެމްބަރު 2023 | އާދީއްތަ 15:43ގުރުއަތުލުމުގެ ކުރިން ސިފައިންގެ އިސްވެރިން ބޭނުންފުޅު ފްލެޓެއް އިޚްތިޔާރު ކުރެއްވުމުގެ ފުރުސަތު ދޭކަމަށް އިދިކޮޅު ފަރާތްތަކުން ދަނީ ބުނަމުން
ސިފްކޯ ހިޔާ
ސިފްކޯ ހިޔާއާ ގުޅޭގޮތުން ދޮގު ވާހަކަ ނުފެތުރުމަށް އެމްއެންޑީއެފުން އިލްތިމާސްކޮށްފިއެވެ.
ގުރުއަތުލުމުގެ ކުރިން ސިފައިންގެ އިސްވެރިން ބޭނުންފުޅު ފްލެޓެއް އިޚްތިޔާރު ކުރެއްވުމުގެ ފުރުސަތު ދޭކަމަށް އިދިކޮޅު ފަރާތްތަކުން ދަނީ ބުނަމުންނެވެ.
އެމްއެންޑީއެފުން ބުނީ ސިފްކޯ ހިޔާއާ ގުޅޭގޮތުން ބައެއް ފަރާތްތަކުން ހަގީގަތާ ޚިލާފު ވާހަކަތައް ފަތުރަމުންދާ ކަމަށެވެ. ސިފްކޯ ހިޔާގެ ރެސިޑެންޝަލް މަސައްކަތްތައް ނިމުމާއެކު، ސިފްކޯ ލިބޭ ފަރާތްތަކަށް ތަން ހަވާލުކުރުމަށްޓަކައި އެޕާޓްމެންޓްތަކުގެ އެލޮކޭޝަން ހެދުމަށްޓަކައި ގުރުއަތުލުން ބާއްވައި، އެ ލޮކޭޝަންގެ ކަންކަން ކުރިއަށް ގެންދިޔަކަމަށް އެމްއެންޑީއެފުން ވަނީ ބުނެފައެވެ. އަދި އެގްރިމެންޓްތައް ހެދުމުގެ ކުރިން، އެޕާރޓްމެންޓްތައް އެކެއް އަނެކެއްގެ އެޕާރޓްމެންޓާ ބަދަލުކުރުމުގެ ފުރުސަތު ދީ އެލޮކޭޝަންގެ ކަންކަން އެއްކޮށް ނިމުމާއެކު މިހާރު ވަނީ އެގްރިމެންޓްކޮށް ތަން ހަވާލުކުރަން ފަށާފައިކަމަށް އެމްއެންޑީއެފުން ވަނީ ބުނެފައެވެ. މިގޮތުން މިހާތަނަށް 68 ފަރާތަކާ އެގްރިމެންޓްކުރެވި، 10 ފަރާތަކަށް ތަޅުދަނޑި ހަވާލުކުރެވިފައި ވާއިރު، އިތުރު 22 ފަރާތަކަށް އާދިއްތަ ދުވަހުގެ ވަގުތެއްގައި ތަޅުދަނޑި ހަވާލުކޮށްފައި ވާނެކަމަށް އެމްއެންޑީއެފުން ވަނީ ބުނެފައެވެ.
ސިފްކޯ ހިޔާގެ ފްލެޓްތައް ލިބޭ ފަރާތްތަކާއި ތަން ހަވާލުކުރުމަށްޓަކައި މިވަގުތު ޚިދުމަތުގައި ތިބި ސިފައިންނާއެކު އެގްރިމެންޓްކޮށް ނިމުމާއެކު، ޚިދުމަތުން ވަކިވެވަޑައިގެންފައިވާ ބޭފުޅުންނާ އެގްރިމެންޓްކޮށް ތަން ހަވާލުކުރަން ފެށޭނެ ކަމަށްވެސް އެމްއެންޑީއެފުން ވަނީ ބުނެފައެވެ. އަދި އެގްރިމެންޓްތަކުގައި ސޮއިކޮށް ތަން ހަވާލުކުރުމުގައި ސިފްކޯގެ މުވައްޒަފުން އެއްވެސް ވަރުބަލިކަމެއްނެތި މިހާރުވެސް ދަނީ މަސައްކަތް ކުރައްވަމުންކަމަށް އެމްއެންޑީއެފުން ވަނީ ބުނެފައެވެ. އެހެންކަމުން ސިފްކޯ ހިޔާގެ މައުލޫމާތުތައް ފްލެޓްތައް ލިބޭ ފަރާތްތަކަށާއި މީޑިއާއަށް ފޯރުކޮށްދެމުން ދަނިކޮށް، ކަމުގެ ހަގީގަތް އޮޅޭގޮތަށް ބައެއް ފަރާތްތަކުން މީޑިއާގެ އެކި ވަސީލަތްތައް މެދުވެރިކޮށް ފަތުރަމުންދާ ހަގީގަތާ ޚިލާފު ވާހަކަތައް ހުއްޓާލުމަށް އެމްއެންޑީއެފުން ވަނީ އިލްތިމާސްކޮށްފައެވެ.
